Yesu Wavanga Masivi Mayingi

Yesu wayiza ova ntoto mu samuna e nsangu zambote za Kintinu kia Nzambi. Muna songa mana Yesu kesinga vanga nze Ntinu, Yave wamvana mwand’avelela mu vanga masivi. Wawukanga yimbevo ya mpila zawonso. Konso fulu kayendanga, ambevo bayizanga kwa yandi mu vava lusadisu, wabawukanga yau awonso. E mpofo zamonanga, afwe matu bawanga, mbevo za malu badiatanga, awana babundunuanga kwa nkuya bavevolwanga. Kana nkutu vana nsuk’a mvuatu andi kaka basimbidi, basasukanga. Wantu balandanga Yesu konso fulu kayendanga. Kana nkutu vava kazolanga kala va fulu kia yandi kaka, Yesu kavovesanga wantu ko vo beza mu ola yankaka.

Lumbu kimosi, wantu batwasa muntu wayelanga kimbevo kia vola kuna nzo ina kakala o Yesu. Kansi, e nzo yazala yakala yo wantu, ke balenda kota ko. Muna kuma kiaki, bamanta kuna nludi a nzo yo kunkulumuna yavana vakala Yesu. I bosi, Yesu wavovesa muntu ndioyo vo: ‘Telama yo diata.’ Vava katelama, wantu awonso basivika.

Lumbu kiankaka, ekolo Yesu kakotanga mu vata dimosi, wantu kumi bakala ye kimbevo kia wazi batelama kuna vala yo boka vo: ‘E Yesu, utusadisa.’ Muna lumbu yayina, akwa wazi ke bayambulwanga ko vo bafinama vana vena wantu ankaka. Yesu wavovesa wantu awaya vo benda kuna tempelo, nze una Nsiku a Yave wakanikinanga akwa wazi bafwete vanga avo bawukilu. Ekolo bayendanga, yau awonso bawukwa. Vava mosi muna akwa wazi kabakula vo owukilu, wavutuka mu vutula matondo kwa Yesu yo kembelela Nzambi. Muna yau kumi, yandi kaka wavutula matondo kwa Yesu.

Nkento mosi wayelanga se vioka mvu 12, kakala diaka ye vuvu ko vo olenda sasuka. Wayiza kuna nim’a Yesu vana kati kwa ndonga yo simba nsuk’a mvuatu andi. Vana vau, wasasuka. Vava diavangama, Yesu wayuvula vo: “Nani umpiakane?” O nkento ndiona wamona kikilu wonga, kansi wayenda kwa Yesu yo kumvovesa e ludi. Muna kumfiaulwisa, Yesu wamvovesa vo: ‘E mwan’ame, wendela kuna luvuvamu.’

Muntu mosi wayikilwanga vo Yairo wadodokela Yesu vo: ‘Wiza ku nzo ame. O mwan’ame kimbevo kiangolo kena kiau.’ Kansi, vitila Yesu kenda kuna nzo a Yairo, o mwana ofwidi. Vava Yesu kalwaka, wawana wantu ayingi bayiza didisa ana bafwilwa. Yesu wabavovesa vo: ‘Ke nudidi ko, o mwana leka kaka kalele.’ I bosi, wasimba koko kwa mwana yo vova vo: “E mwana, telama!” Vana vau, otelamene. Yesu ovovese mase mandi vo bamvana lekwa kia dia. Yindula e kiese bamona mase mandi!