Nyingidi a Pelezo Olongokele Ludi

Muna mbanza Filipi, mwazingilanga ntaudi mosi ankento wakala ye nkuya. O nkuya wau wasadilanga nkento ndioyo se ngang’a ngombo. E salu kasalanga nzimbu zayingi kiatwasanga kwa mfumu zandi. Vava Paulu yo Sila bayiza kuna Filipi, wabalanda mu lumbu yayingi. O nkuya wankazisanga vo: “Wantu awaya ntaudi za Nzambi a Mpungu-ngolo.” I bosi, Paulu wavovesa nkuya vo: ‘Muna nkumbu a Yesu Kristu, vaika muna yandi.’ Nkuya wavaika muna nkento ndioyo.

Vava mfumu za ntaudi ndioyo bamona vo ke bebaka diaka nzimbu ko muna salu kiasalanga nkento ndioyo, bafunga kikilu makasi. Banata Paulu yo Sila kwa mfumu za mbanza, bavova vo: ‘Wantu awaya nsiku bena kulula yo tokanesa wantu awonso mu mbanza.’ E mfumu zazi bakanikina vo Paulu yo Sila bawandwa yo siwa muna pelezo. Nyingidi a pelezo wabasia muna suku diasunda tombe muna pelezo yo kubakanga muna nsinga.

Abakami ankaka bawanga Paulu yo Sila ekolo bakembelelanga Yave muna nkunga. Vana vau, muna dingi-dingi, nzakam’angolo ya ntoto yanikuna pelezo tuka vana ntandu yakuna yanda. E mielo mia pelezo miaziuka, o tuvambu twa abakami twadanuka. Vava o nyingidi katikuna yamuna kati kwa pelezo, wamona vo e mielo miaziuka. Abakami awonso batinini. Wabaka nsosolo kimana kayivonda.

Vana vau, Paulu wavova mu nding’a ngolo vo: ‘Kuyivondi ko. Yeto awonso tuna vava.’ Nyingidi watikuna yo fukama vana malu ma Paulu yo Sila. Wabayuvula vo: “Adieyi mfwete vanga muna vuluzwa?” Bamvovesa vo: ‘Ngeye ye esi nzo aku nufwete kwikila muna Yesu.’ I bosi, Paulu yo Sila babalonga e diambu dia Yave. O nyingidi ye esi nzo andi awonso bavubwa.