Landa Mbandu a Yesu Muna Yingila
“Nuyingila yo samba.”—MAT. 26:41.
NKIA MVUTU OVANA?
․․․․․
Aweyi tulenda songela vo tuyingilanga muna sambu?
․․․․․
Aweyi tulenda songela vo tuyingilanga muna salu kia umbangi?
․․․․․
Ekuma tufwete kwamanana yingila muna ntangw’a mpasi? Aweyi tulenda wo vangila?
1, 2. (a) Nkia yuvu tulenda yuvula mu kuma kia mbandu a Yesu muna yingila? (b) Nga asumuki balenda tanginina mbandu a Yesu wa muntu alunga e? Yika nona.
NANGA lenda yuvula vo: ‘Nga dilendakana mu tanginina mbandu a Yesu muna yingila? O Yesu muntu alunga kakala.’ Ezak’e ntangwa, Yesu wazayanga oma ma kusentu. Nga diamfunu kikilu diakala kwa Yesu vo kayingilanga? (Mat. 24:37-39; Ayib. 4:15) Yambula twabadika yuvu yayi kimana twazaya e kuma dinina mfunu diambu diadi.
2 Nga asumuki balenda tanginina mbandu a muntu alunga e? Elo, kadi o muntu lenda longoka kwa nlongi ambote yo tanginina mbandu andi. Kasikil’owu, yindula muntu olongokanga nonga nzanza. Kalendi nonga bulu ko mu nkumbu antete, divava vo kalongoka yo teza nkumbu miayingi. Muna kulukiana nonga e nzanza, kafwete toma talanga nkongo azikuka. Muna nana nkau una ufwene, kafwete sia sungididi una o nkongo ketelamenanga yo singika moko ye nlembo. Malembe-malembe, ozaya e ngolo zivavwanga muna nana nkau yo sia sungididi kuna kutukanga e tembwa. Muna tanginina nkongo azikuka, ozaya tuba e nzanza yo lenda nonga e bulu. Diau a dimosi mpe, muna kwamanana tomesa nkal’eto ya Kikristu, tufwete lemvokelanga luludiku lwa Yesu yo tanginina mbandu andi alunga.
3. (a) Aweyi Yesu kasongela vo yingila kavwanga mfunu? (b) Nkia diambu tubadika mun’elongi diadi?
3 Adieyi tuvova mu kuma kia yingila? Nga diavavanga vo Yesu kayingila? Elo. Kasikil’owu, muna fuku wansuka kakala ova ntoto, Yesu wavovesa ntumwa zandi za kwikizi vo: ‘Nuyingila yame.’ I bosi, wakudikila vo: “Nuyingila yo samba, ke nwakota mu umpukumuni.” (Mat. 26:38, 41) Kana una vo ntangwa zawonso wayingilanga, muna ntangwa yayina yampasi Yesu wakala y’etima dia yingila yo toma finama S’andi ezulu. Wazaya wo vo alandi andi bafwete yingila, ke mu ntangwa yayina kaka ko kansi yakuna sentu. Muna kuma kiaki, yambula twabadika ekuma Yesu kevavilanga vo twakwamanana yingila. I bosi, tubadika mpila tatu tulenda tanginina Yesu muna yingila mu zingu kieto kia lumbu ke lumbu.
EKUMA YESU KEVAVILANGA VO TWAYINGILA
4. Olembi zaya oma ma kusentu, aweyi dilenda kutusadisila mu kwamanana yingila?
4 Muna mvovo miakiá, Yesu ovavanga vo twakwamana yingila mu kuma kia mana tulembele zaya ye mana tuzeye. Nga Yesu vava kakala ova ntoto wazaya mawonso ma kusentu? Ve kikilu. Kuna lusakalalu lwawonso wavova vo: “Owu wa lumbu kiakina ye ola, ke ven’on’ozeye wo ko, kana mbasi ezulu, yovo Mwana, nangu Se kaka.” (Mat. 24:36) Muna kolo kiakina, o Yesu i sia vo “o Mwana,” kazaya e lumbu kia mbaninu a nza yayi yambi ko. Adieyi tuvova kwa yeto o unu? Nga makete kaka tuzeye mu kuma kia kusentu? Elo. Katuzeye ko e lumbu Yave kesinga tuma Mwan’andi mu fwasa e nza yayi yambi. Kele vo twazaya lumbu kiakina, nga mfunu diadi kala muna yingila? Nze una Yesu kavova, e mbaninu ku kinsalukisa ikwizila, muna lumbu tulembele zaya; i kuma vo tufwete yingilanga e lumbu yawonso.—Tanga Matai 24:43.
5, 6. (a) O zaya oma ma kusentu y’ekani dia Nzambi aweyi dilenda kutusadisila mu yingila? (b) Mana tuzeye mu kuma kia Satana, aweyi malenda kutusadisila mu kwamanana yingila?
5 Kuna diak’e sambu, Yesu wazaya mambu mayingi mambote mevangama kuna sentu. Kansi, ndonga muna lumbu yandi ke bazaya mo ko. Kana una vo katuzeye mawonso ko nze Yesu, muna lusadisu lwandi tuzeye mambu mayingi mu kuma kia Kintinu kia Nzambi ye mana kisinga vanga kuna sentu. Muna fulu yawonso tukalanga, kuna sikola, kuna salu yovo muna salu kia umbangi, nga ke tumonanga ndonga ko bena mu tombe balembele zaya ludi mu kuma kia Kintinu? Elo, kiaki i kuma kiakaka tufwete yingilanga. Nze Yesu, tufwete kalanga wa lungalala yo sadila konso elau muna samuna oma tuzeye mu kuma kia Kintinu kia Nzambi. Tufwete toma sadilanga konso elau tuwanananga diau. E mioyo mia wantu mu vonza mina.—1 Tim. 4:16.
6 Vena ye diambu diakaka diafila Yesu mu kwamanana yingila. Wazaya wo vo Satana wakala y’ekani dia kumvukumuna, kumbangika yo vava fwasa kwikizi kiandi. E mbeni ndioyo wavingilanga “yavana kevw’e ntangwa” muna ntonta Yesu. (Luka 4:13) Yesu kayambula yingila ko. Wakubama kakala muna zizidila konso ntonta, lubangamu, yovo kitantu. Adieyi tuvova oku kwa yeto? Tuzeye wo vo Satana “nga nkosi ankwinti ovemanga, kend’avavi ona kevempola.” Muna kuma kiaki, Nkand’a Nzambi ulukisanga Akristu awonso vo: “Nulungalala, nuyingila.” (1 Pet. 5:8) Aweyi tulenda wo vangila?
UNA TULENDA YINGILA MUNA SAMBU
7, 8. Nkia luludiku kavana Yesu mu kuma kia sambu? Nkia mbandu ambote kasisa?
7 Nkand’a Nzambi uyikilanga o lungalala muna mwanda yovo yingila kumosi ye sambu. (Kol. 4:2; 1 Pet. 4:7) Vava kazayisa alongoki andi vo bayingila yandi, Yesu wakudikila vo: “Nuyingila yo samba, ke nwakota mu umpukumuni.” (Mat. 26:41) Nga mu kuma kia mpasi zabalwakila muna lumbu kiakina kaka kabavanina luludiku lwalu? Ve kikilu, luludiku lwandi i nkanikinu tufwete sadilanga muna zingu kieto kia lumbu ke lumbu.
8 Yesu mbandu ambote kasisa mu kuma kia sambu. Nanga osungamenanga fuku wawonso kaviokesa muna samba kwa S’andi. Yambula twabadika diambu diadi. (Tanga Luka 6:12, 13.) Nanga e nzo a Yesu lukufi yakala ye Kafanau, mbanza alowi a mbizi za maza. O kuma vava kwabwita, Yesu watomboka vana mongo watalana ye Mbu a Ngalili. Vava tombe kia fuku kiawokelanga, nanga wamona mini yayantika zima muna Kafanau ye mavata makaka makala lukufi. Vava kayantika mokena yo Yave, Yesu wasia emvimba sungididi muna sambu kiandi. Wasamba fuku wawonso. Kasia sungididi ko vava ngonde kavaika yo vila ye vava bulu ya futa yadianga titi muna fuku. Nanga wasamba muna baka e nzengo za sola ntumwa zandi 12. Tulenda yindula Yesu vava kasonganga ngindu zandi ye mawonso mantokanesanga mu kuma kia konso nlongoki yo lomba luludiku ye ngangu kwa S’andi.
9. Adieyi tulenda longoka muna mbandu a Yesu vava kasamba fuku wawonso?
9 Adieyi tulenda longoka muna mbandu a Yesu? Nga tufwete viokesanga ola zayingi muna sambu? Ve, kadi Yesu wazaya eziku eki muna alandi andi: “O mwand’ele uzolele, kansi nitu yatovoka.” (Mat. 26:41) Kansi, tulenda tanginina Yesu. Kasikil’owu, nga tusambanga kwa Yave vava tubakanga nzengo muna mambu ma yeto kibeni, esi nzo eto y’akw’eto minkwikizi? Nga tusambanga muna wete dia mpangi zeto z’akala ye z’akento muna mwanda? Nga tusambanga ye nsi a ntima lembi vovololanga diambu dimosi? Sungamena mpe vo, Yesu watoma zitisanga kikundi kiandi yo S’andi, wamokenanga yandi vana fulu kia yandi kaka. Wau vo o unu twazala ye salu yo ntelamw’a moyo, diasazu mu vilakana oma masundidi o mfunu muna zingu kieto. Avo tuvaulanga e ntangwa yafwana muna samba, tuyingila muna mwanda. (Mat. 6:6, 7) Avo tutomene finama Yave, tusiamisa ngwizani eto yo yandi yo venga konso diambu dilenda yo fwasa.—Nku. 25:14.
UNA TULENDA YINGILA MUNA SALU KIA UMBANGI
10. Nkia nona kisonganga vo Yesu watoma yingilanga yo sia sungididi kia sia umbangi muna konso elau kawanananga diau?
10 Yesu wayingilanga muna sala e salu kavewa kwa Yave. Vena ye salu yakaka kalenda sala o muntu yo sia sungididi mu mambu makaka yo lembi twasa vonza kiampwena. Kansi, vena ye salu yayingi ivavanga vo muntu katoma yingila yo lembi sia sungididi mu mambu makaka. Ediadi i divavwanga muna salu kia Kikristu. Yesu watoma lungalalanga muna salu kiandi; wasianga sungididi kia sadila konso elau mu samuna nsangu zambote. Kasikil’owu, vava kakangala mene wawonso ye alongoki andi yo lwaka muna mbanz’a Sika, alongoki bayenda sumba madia. Yesu wavunda vana ndambu a sima kia maza, kansi kayambula yingila ko. I bosi, wamona elau muna sia umbangi. Nkento a Nsamaria wayiza teka maza vana sima. Yesu wafwana leka kwandi yo lembi mokena yandi. Kansi, wamokena yo nkento, wansila umbangi watwasa nluta kwa wantu ayingi muna mbanza. (Yoa. 4:4-26, 39-42) Nga tulenda tanginina mbandu a Yesu muna yingila yo sia sungididi kia samuna nsangu zambote kwa wantu tuwanananga yau muna salu yeto ya lumbu ke lumbu?
11, 12. (a) Adieyi kavova Yesu kw’awana bavava kumvengomona muna salu kiandi? (b) Nkia tezo kasonga Yesu muna salu kiandi?
11 Ezak’e ntangwa, akaka y’ekani diambote bavava vengomona Yesu muna salu kiandi. Vava Yesu kawuka akwa mayela muna mbanza a Kafanau, nkangu bavava kunsima kimana kalembi kwenda mu fulu yakaka. Kani diambote bakala diau. Kansi, Yesu wayiza mu sila umbangi “kwa mameme [mawonso] mavila ma nzo a Isaele,” ke mu mbanza mosi kaka ko. (Mat. 15:24) Muna kuma kiaki, wavovesa nkangu vo: “Muna mavata makaka mpe nkwend’asamwin’e nsangu zambote za kintinu kia Nzambi: e kuma i ntuminu diodio.” (Luka 4:40-44) Kieleka, Yesu salu kia umbangi kasianga va fulu kiantete muna zingu kiandi. Kayambula konso diambu ko diamvunzanesa.
12 Nga Yesu kakala ye tezo ko muna salu kiandi? Wau kayivananga emvimba muna salu kiandi, nga kazayanga nsatu za yitu yandi ko? Ve, Yesu wasisa mbandu alunga muna sala ye tezo. Wayangalelanga e zingu yo kala entwadi y’akundi andi. Wavwanga esi nzo o mfunu yo tokanena nsatu za wantu ye mpasi zau, wasonga o zola kwa yingyana-ngyana.—Tanga Maku 10:13-16.
13. Aweyi tulenda tanginina mbandu a Yesu muna yingila yo kala ye tezo vava tusamunanga nsangu za Kintinu?
13 Aweyi tulenda kadila ye tezo ekolo tutangininanga mbandu a Yesu muna yingila? Ke tuyambula ko vo nza yayi yatuvengomona muna salu kieto. Y’ekani diambote e yitu y’akundi eto balenda kutukasakesa twakulula o vema muna salu ya mwanda kimana twalanda e mpila zingu bebadikilanga vo kiambote. Avo tutanginini Yesu, tubadikila salu kieto nze madia. (Yoa. 4:34) E salu kieto kikutukumikanga muna mwanda yo kutuvana kiese. Kansi, ka tufwete salanga ko kondwa tezo yo kuyibadikila nze ansongi. Nze Yesu, tufwete kala ye tezo ekolo tusadilanga “Nzambi a kiese.” —1 Tim. 1:11 NW.
UNA TULENDA YINGILA MUNA NTANGW’AMPASI
14. Nkia fu tufwete venga muna ntangw’ampasi, ekuma?
14 Nze una tumwene, Yesu wavana luludiku lwalu lwa yingila muna ntangw’ampasi. (Tanga Maku 14:37.) Vava tukalanga mu mpasi, i ntangwa tufwete tangininanga mbandu a Yesu. Muna ntangw’ampasi, ndonga ke besungamenanga ko e kingana eki kiasonama nkumbu miole muna nkand’a Ngana: “Vena ye nzila, kuna kwa muntu, yasonga, kansi mbaninu andi, se nzil’a lufwa.” (Nga. 14:12; 16:25) Avo tubundidi e vuvu muna ngindu za yeto kibeni musungula muna ntangw’ampasi, tulenda kuyisia mu vonza kumosi ye azolw’eto.
15. Nkia ntota kalenda wanana zau o se yovo ngudi muna ntangw’ampasi?
15 Kasikil’owu, o se yovo ngudi, olenda kala ye nkakalakani za lungisa e nsatu za “awana bena muna nzo andi.” (1 Tim. 5:8) Ediadi dilenda kumfila mu tambulwila e salu kilenda kunyiya e ntangwa yakala mu tukutakanu, fila nsambila y’esi nzo yovo sala e salu kia umbangi. Avo obundidi e vuvu muna ngindu za wantu, dilenda moneka vo diambote kwandi muna tambulwila e salu kiaki. Kansi, dilenda yoyesa yovo fwasa emvimba kimwanda kiandi. Diambote mu landa luludiku lwa Ngana 3:5, 6. Solomo wavova vo: “Bunda Yave e vuvu yo ntim’aku wawonso, kuyekamena waku umbakuzi ko: Muna ngyenda zaku zawonso untadila, oyandi osingika nzila zaku.”
16. (a) Vana fulu kia yekamena wandi umbakuzi, o Yesu nkia mbandu kasisa ya bunda e vuvu muna ngangu za Yave? (b) Mase mayingi muna ntangw’ampasi aweyi betangininanga mbandu a Yesu muna bunda e vuvu kwa Yave?
16 Vava Yesu kakala mu mpasi, kayekamena wandi umbakuzi ko. Yindula ediadi. O muntu sundidi e ngangu ona wazinga ova ntoto, muna vanga konso diambu kabundanga e vuvu muna wandi umbakuzi ko. Kasikil’owu, vava katontwa kwa Satana, Yesu nkumbu miayingi kavutukila mvovo owu: “Diasonama.” (Mat. 4:4, 7, 10) Muna sunda umpukumuni, wabunda e vuvu muna ngangu za S’andi yo songa lulembamu luna Satana kakala lwau ko. Nga tulenda vanga diau adimosi? O se otangininanga lulungalalu lwa Yesu, olandanga luludiku lwa Nkand’a Nzambi musungula muna ntangw’ampasi. Mase mayingi mu nza yawonso i diau bevanganga. Bezindalalanga sia Kintinu kia Nzambi ye nsambil’a ludi va fulu kiantete muna zingu kiau ke mu vava mavwa ko. Kansi, bevanganga mpe wawonso mu toma lunga-lunga esi nzo zau. Nze una kesianga nsilu muna Nkand’a Nzambi, Yave osambulanga e ngolo bevanganga muna lungisa e nsatu zau.—Mat. 6:33.
17. Adieyi dikufilanga mu tanginina mbandu a Yesu muna yingila?
17 Ka lukatikisu ko, Yesu mbandu ambote kasisa muna yingila. E mbandu andi yambote kikilu, nluta itwasanga, isinga vuluza mpe mioyo mia wantu. Sungamena vo Satana ozolele yoyesa lukwikilu y’etima diaku muna mambu ma mwanda. (1 Tes. 5:6) Kuyambula ko vo kasunda. Nze Yesu, kwamanana yingila muna sambu, muna salu kia umbangi ye muna ntangw’ampasi. Muna vanga owau, ovwa nsambu, kiese ye zingu kiasikila kana nkutu mu nza yayi yambi. Avo kwamanana yingila okala mpe ye ziku vo vava Mfumu eto kelwaka muna fwasa e nza yayi, o wanuka walungalala yo vanga luzolo lwa S’andi. Ekwe kiese kemona Yave muna kusambula mu kuma kia lukwikilu lwaku!—Lus. 16:15.
[Foto ina muna lukaya lwa 6]
Yesu wasia umbangi kwa nkento vana sima kia maza. Adieyi ovanganga muna vwa elau dia samuna e nsangu zambote lumbu yawonso?
[Foto ina muna lukaya lwa 7]
O lunga-lunga e nsatu za mwanda za esi nzo aku disonganga vo mu yingila wina