NTU A DIAMBU WA FUKWA | NGA NZAMBI OKUVWANGA KIELEKA MFUNU?
Nzambi Okumonanga
‘O meso ma Nzambi memona nzila za muntu, ye ngyenda zandi zawonso.’—YOBI 34:21.
Ekolo kakinu kingiana-ngiana, i ntangwa ina mwana kafwete toma siwa e sungididi kwa mase mandi
EKUMA AKAKA BEKATIKISILANGA? Lufimpu lumosi lwavangwa lusonganga vo muna buka kia ntetembwa kina mfinangani ye ntoto, muna ye malundu 100 (100 bilhões) ma planeta. Ayingi vava bemonanga o nene wa nsema beyindulanga vo ‘Mvangi wa Mpungu-ngolo kalendi lunga-lunga mpasi wantu ko.’
NKAND’A NZAMBI ADIEYI ULONGANGA? Nzambi katuvana kaka Nkand’a Nzambi ko yo kutumbembola. Kansi, okutusilanga nsilu vo: “Ikulongesela, yo kusia meso.”—Nkunga 32:8.
Badika nona kia Anga wa nkento a mwisi Engipito ona wazinga muna tandu kia 20 vitila tandu kieto (V.T.K.). Anga wakondwa Sarai wa mfumu andi o luzitu, muna kuma kiaki Sarai wanyinga, vo i Anga watina kuna makanga. Nga Nzambi wabembola Anga wau vo vilwa kavanga? Nkand’a Nzambi uvovanga vo: “O mbasi a Yave owananini yandi.” Wavovesa Anga vo: “Yave owidi mpasi zaku.” Anga wavova kwa Yave vo: “Onge u Nzambi amoni.”—Etuku 16:4-13.
“Nzambi amoni,” mona mpe kekumonanga. Muna bonga e nona, ngudi anzolwa otoma sianga sungididi kwa mwan’andi musungula avo wakete, kadi eyayi i ntangwa ketoma vwanga mase mandi o mfunu. Diau adimosi mpe, Nzambi okutulunga-lunganga musungula vava tukalanga twayoya yo kendalala. Yave wavova vo: ‘Ikalanga muna fulu kiazanguka ye kiavauka, yo nkwa mwand’akosomoka, anlembami, yavutula mwand’a nlembami, yavutula ntima mi’awana bakosomoka.’—Yesaya 57:15.
Kansi, olenda kiyuvula: ‘Aweyi Nzambi kekumbwenanga? Nga okumfundisanga mun’owu wa mpw’ame yovo osianga sungididi muna kiwuntu kiame yo vava kumbakula?’