MVUTU ZA YUVU YA NKAND’A NZAMBI
Nga tulenda zaya e ludi mu kuma kia Nzambi?
Ekuma Nzambi kazolele vo twazaya e ludi? Tanga Yoane 17:3
Nzambi omokenanga yo wantu. Wasadila mwand’avelela yovo nkuma andi muna kotesa e ngindu zandi muna ntu mia awana basoneka Nkand’a Nzambi. (2 Petelo 1:20, 21) Tulenda zaya e ludi mu kuma kia Nzambi muna tanganga Nkand’a Nzambi.—Tanga Yoane 17:17; 2 Timoteo 3:16.
Nzambi osengomonanga mayingi mu kuma kiandi muna Nkand’a Nzambi. Okutuzayisanga e kuma katuvangila, mana kevanga mu kuma kieto ye una tufwete zingila. (Mavangu 17:24-27) Yave wa Nzambi ozolele vo twazaya e ludi mu kuma kiandi.—Tanga 1 Timoteo 2:3, 4.
Ekuma Nzambi keyangalelanga ana bezolanga e ludi?
Yave i Nzambi aludi ona watuma Mwan’andi Yesu kalonga e ludi kwa wantu. Muna kuma kiaki, awana bezolanga e ludi, betuntwanga kwa Yesu. (Yoane 18:37) Nzambi ozolele vo bakituka asambidi andi.—Tanga Yoane 4:23, 24.
Satana wa Nkadi ampemba ovukumunanga wantu ayingi balembi zaya Nzambi. Ovanganga wo muna mwanganesa malongi maluvunu mu kuma kia Nzambi. (2 Korinto 4:3, 4) Awana ke bezolanga mambu ma unsongi ko bevukumunwanga muna malongi mama maluvunu. (Roma 1:25) Kansi, mafunda ye mafunda ma akwa luzolo lwambote besololanga e ludi mu kuma kia Nzambi vava belongokanga Nkand’a Nzambi.—Tanga Mavangu 17:11.