Umpana mvu mosi kaka wa luvuvamu ye kiese

ZINGU KIAME:

Ku vata dia Tellancourt twazingilanga, kuna node ya França. O se diame musi França, kansi o ngudi ame nkwa Itália. Vava yakala ye mvu 8, twayaluka yo kwenda zingila ku vata dimosi diakete dia Itália. Kuna vata diadina, e zingu kiampasi kiakala. Mase mame bazonzanga mu kuma kia nzimbu.

Vava yakala ye mvu 15, ngudi ame wampovesa vo yavaikanga muna vanga yikundi. Muna kuma kiaki, ntangwa ayingi yaviokesanga ye akundi. Ke kolo ko yavanga yikundi yambi. Lumbu kimosi, muntu mosi ona yabanzanga vo nkundi ambote wampana e fomo angolo, yanua yo kadi yazola badikilwa vo i mbuta. Vana vau yayantika nua fomo zangolo yo tá e zumba. Nkumbu miayingi yavangwa mambu mansoni. E zingu ke kiakala diaka mfunu ko kwa mono, fwa yovo lembi fwa kiatokanenanga dio diaka ko. Kinsona yamonanga. Vava yakala ye mvu 16, yavava kuyivonda. Yanua nlangi amvimba wa wiski yo kuyituba muna yanga. Lumbu tatu yavanga kuna lupitalu, kiavovanga diaka ko ngatu nikuka.

Yayantika zitisa o moyo, kansi yakituka mpe nkwa nsoki ye mvuni. Vava yatanga e zumba yo muntu kuna nzo andi, yankolesanga i bosi yayiyanga konso lekwa kiantalu kakala kiau. E buka ya yimpumbulu mono batumanga mu vanga kinkita kia fomo za ngolo muna Itália. Nkumbu miayingi yakangwanga kwa mapolisia. Kana una vo yakwikilanga vo vena ye kuma yavangilwa kwa Nzambi, yamonanga vo e zingu kiame ke kiakala mfunu ko. Muna kuma kiaki, yasamba kwa Nzambi vo kampana mvu mosi kaka wa luvuvamu ye kiese.

UNA NKAND’A NZAMBI WASOBELA ZINGU KIAME:

Vava yalungisa mvu 24, yabaka nzengo za kwenda zingila kuna Inglaterra. Zingu kiame mu vonza kiakala mu kuma kia sala kumosi ye minkiti mia fomo zangolo. Vitila ngienda ku Inglaterra yayenda kanina ngudi ame, yasivika vava yamona muntu mosi wayikilwanga vo Annunziato Lugarà kamokenanga yo ngudi ame oma ma Nkand’a Nzambi.a Wau vo Lugarà kimpumbulu kakala, yamona wonga yo kunyuvula e kuma kamokenanga yo ngudi ame. Wanzayisa e nsobani kavanga muna kituka Mbangi a Yave, i bosi wampovesa yavava Mbangi za Yave kuna Inglaterra. Yatambulwila, kansi vava yalwaka kuna Inglaterra yavutukila e zingu kiame kiambi.

Lumbu kimosi, yawana Mbangi a Yave wakayanga Eyingidilu ye Despertai! muna mbanz’a Londres. Yasungamena nsilu yasia kwa Annunziato, muna kuma kiaki yanlomba kandonga Nkand’a Nzambi.

Mana yalongoka mu Nkand’a Nzambi mansivikisa kibeni. Muna bonga e nona, e sono kia 1 Yoane 1:9 kiatoma kungiangidika, kivovanga vo: “Avo tufunguna masumu meto, o Nzambi nkwa kwikizi ye nsongi, ololoka masumu meto yo kutuvelelesa.” E sono kiaki kiasoba ngindu zame, kadi yakimuenanga vo yafunzuka mu kuma kia mavangu mame mambi. Vana vau, yayantika kwenda muna tukutakanu twa Mbangi za Yave muna Seka dia Kintinu. Mbangi za Yave bantambula kuna ngemba zawonso. Vava yamona e ngwizani vana vena Mbangi za Yave, yazola kala vana kati kwau, kadi kikundi kia mpila yayi yavavanga se tuka kolo.

Kana una vo ke diakala diampasi ko mu yambula nua fomo zangolo yo tá zumba, kansi diampasi diakala mu soba kiwuntu kiame. Yabakula vo mfwete zitisanga wantu yo kubavua o mfunu. Kieleka, yakinu nwana muna soba e fu yayi yambi. Kansi, Yave okunsadisanga muna nungunuka. Vava yayantika longoka Nkand’a Nzambi, ngonde sambanu kaka zavioka, yavubwa yo kituka se mbangi a Yave muna mvu wa 1997.

MPILA YABAKILA E NLUTA:

Kuna nima luvubu, yakazala yo Barbara, ona mpe wavubwa yo kituka se Mbangi a Yave. Vava mosi muna akundi ame kamona e mpila yasobela zingu kiame, yandi mpe wayantika longoka Nkand’a Nzambi. Kuna kwalanda, wakituka Mbangi a Yave kumosi yo mpangi andi ankento. I bosi, o nkak’ame wakala ye mvu 80 wayantika longoka Nkand’a Nzambi, wavubwa vitila kafwa.

Owau i nkuluntu muna nkutakani, mono yo nkaz’ame tusalanga salu kia ntangwa ke ntangwa kia longa Nkand’a Nzambi mu sadisa wantu bevovanga Italiano. Ezak’e ntangwa, ikendalalanga mu kuma kia mpila zingu yakala kiau, kansi Barbara okunsadisanga. Owau, ngina ye zingu kia nzo kiakiese kina yalakukilanga moyo, ngina mpe ye kikundi yo Yave wa Se dia nzolwa. Mvu mosi kaka wa luvuvamu ye kiese yalomba kwa Nzambi, kansi wampana ina nkutu kialomba ko.