Nga Nzambi Nkwa Nkenda?

ADIEYI TULENDA LONGOKA MUNA NSEMA?

O kala nkwa nkenda disongele vo “kuyisia vana fulu kia muntu una mu mpasi yovo wakendalala.” Dotolo dimosi una ye nkumbu Rick Hanson wavova vo e “nkenda mu visi yeto zina.”

YINDULA EDI: Ekuma tumwenanga e nkenda, fu kina vo yeto wantu kaka tuna kiau? Nkand’a Nzambi uvovanga vo Nzambi watuvangila muna fwaniswa kiandi. (Etuku 1: 26) O vangilwa muna fwaniswa kia Nzambi disongele vo tulenda tanginina kiwuntu ye fu yandi yambote. Muna kuma kiaki, e nkenda zifilanga wantu mu sadisa akaka yo tanginina Yave wa Mvangi au una vo Nzambi a nkenda.—Ngana 14:31.

ADIEYI TULENDA LONGOKA MUNA NKAND’A NZAMBI MU KUMA KIA NKENDA?

Wau vo Nzambi nkwa ngemba, ke yangalalanga ko vava tumonanga e mpasi. Muna kuma kia Aneyisaele kuna nz’ankulu, ana bakala muna ubundu kuna Engipito yo viokesa 40 ma mvu muna makanga, Nkand’a Nzambi uvovanga vo: “Muna mpasi zau zawonso i kamwene mpasi.” (Yesaya 63:9) E sono kisongele vo Nzambi kazaya kaka mpasi zau ko, kansi wamona mpe e mpasi. Wavova vo: “Nzeye mpasi zau.” (Luvaiku 3:7) Nzambi wavova mpe vo: ‘Ndiona okunuviakana, oviakana ngengele a disu diame.’ (Zakariya 2:8) Vava wantu bekutumwesanga e mpasi, oyandi mpe omonanga e mpasi vana fulu kieto.

Nkand’a Nzambi uvovanga vo kana nkutu tuyantikidi kuyitumba yo kuyimwena vo ke tufwanukini nkenda za Nzambi ko, “Nzambi osundidi ntima mieto, ozeye mambu mawonso.” (1 Yoane 3:19, 20) Nzambi otomene kutuzaya lutila nkutu yeto kibeni. Otomene zaya e mpasi, ngindu ye makani meto. Okuyisianga vana fulu kieto.

O Nkand’a Nzambi ukutuvovesanga vo:

• “Obokela, o Yave ovutula; okaza, oyandi vo, Mono oyu.”—YESAYA 58:9.

• ‘Nzeye ngindu zina ngindulang’omo yeno, i Yave wau, ngindu za luvuvamu, ke za bi ko, yanuvan’e vuvu muna mbaninu eno. Nukumbokela, nukwiza kwa mono yo kunsambila, ikunuwila.’—YEREMIYA 29:11, 12.

• “Sia mansanga mame muna mbwat’aku; Nga ke mena muna nkand’aku ko e?”—NKUNGA 56:8.

NZAMBI OKUTUMONANGA, OKUTUBAKULANGA YO KUYISIA VANA FULU KIETO

O zaya vo Nzambi okuyisianga vana fulu kieto, nga dilenda kutusadisa mu zizidila e mpasi? Badika e nona kia Maria:

“Vava mwan’ame wa mvu 18 kafwa una kayela kimbevo kia câncer mu mvu miole, yamona vo e zingu kiampasi kikilu ye ke kina mfunu ko. Yafungila Yave makasi wau kalembi tanina mwan’ame yo kunsasula.”

“Vava vavioka mvu sambanu, nkundi mosi muna nkutakani una vo nkwa zola ye ngemba wantamba o matu ekolo yanzayisanga una yamonanga. Yamvovesa vo Yave ke kunzolanga ko. Wansia e sungididi, lembi kunzenga e mvovo. I bosi, wayika sono kimosi kiansadisa kikilu. I sono kia 1 Yoane 3:19, 20. Kivovanga vo: ‘Nzambi osundidi ntima mieto, ozeye mambu mawonso.’ Wanzayisa vo Yave ozeye e mpasi zeto.”

“Kana una vo i wau, diampasi diakala kwa mono mu yambula fungila Nzambi o makasi. I bosi yatanga e sono kia Nkunga 94:19 kivovanga vo: ‘Muna ulolo wa ngindu zame za mbundu. O fiauzi waku uyangidika moyo ame.’ Yamona vo e sono kiaki mu kuma kiame kiasonekenua. Yafiaulwiswa kikilu wau yalenda zayisa e mpasi zame kwa Yave. Yakala ye ziku vo owá e sambu kiame.”

Diakiese kikilu mu zaya vo Nzambi obakulanga e mpasi zeto yo kuyisia vana fulu kieto. Kansi, ekuma e mpasi ziwokelelanga ova nza? Nga Nzambi okututumbanga mu kuma kia mambu mambi tuvanganga? Nga Nzambi osinga fokola e mpasi zazi? Tubaka e mvutu za yuvu yayi muna malongi melanda.