Aweyi Tulenda sundila O Lufwa?

KANA una vo ukolami wa mase meto mantete, Adami yo Eva, watwasa sumu yo lufwa kwa wantu awonso, e kani dia Nzambi mu kuma kia wantu ke diasoba ko.

• “Asongi bevwa nza, besikila vo yakwele mvu.”—Nkunga 37:29.

• ‘Ofokola lufwa yakwele mvu; o Mfumu Yave okunguna mansanga muna ndose zawonso.’—Yesaya 25:8.

• “O lufwa luna vo i mbeni a nsuka, lufukiswa e mvimba.”—1 Korinto 15:26.

• “Lufwa ke lukala diaka ko, ngatu kala diaka dilu, yovo kazu ngatu mpasi.”—Lusengomono 21:4.

Aweyi o Nzambi kefokolwela yovo kesukisila lufwa? Nkand’a Nzambi uvovanga vo ‘asongi . . . besikila (yovo bezinga) yakwele mvu.’ Kansi, uvovanga mpe vo “ova nza ke vena muntu ansongi ko, on’ovanga wete.” (Kimpovi 7:20) Nga disongele vo Nzambi ke vava diaka ko vo e nkanikinu miandi mialemvokelwa? Ediadi ke dilendi vangama ko! Nzambi kesinga wo vanga ko kadi “kalendi vuna ko.” (Tito 1:2) Ozevo, adieyi Nzambi kevanga muna lungisa e kani kavangila o wantu?

NZAMBI WAVANA LUKÛLU MUNA SUKISA LUFWA

Muna vevola o wantu muna lufwa, Yave wa Nzambi wavana lukûlu. Lukûlu i lekwa kin’e betela kifutwanga muna fuka e mfwilu yovo muna lungisa e nsiku. Wau vo wantu awonso basumuka yo vewa tumbu kia lufwa, Nkand’a Nzambi uvovanga vo: ‘Ke vena ona okûla mpangi andi ko, ngatu vana kwa Nzambi o lubakanisu luandi. (Kadi o lukûlu lua mioyo miau luantalu, luyambuka yakwele mvu).’—Nkunga 49:7, 8. 

Avo muntu alembi lunga ofwidi, tumbu kia masumu mandi kaka kefutanga; kalendi kuyikûla ko ngatu futa masumu ma muntu ankaka. (Roma 6:7) Muntu alunga twavuanga o mfunu ona walembi sumuka kimana kavana o moyo andi, ke mu kuma kia masumu ma yandi kibeni ko, kansi mu kuma kia masumu meto.—Ayibere 10:1-4.

I diau kikilu kavanga o Nzambi. Watuma o Mwan’andi Yesu kimana kasisa e zulu yo kwiza wutuka ova ntoto nze muntu alunga, wakondwa masumu. (1 Petelo 2:22) Yesu wavova vo wayiza ova ntoto mu “vana moyo andi se lukûlu lwa wantu ayingi.” (Maku 10:45) Yesu wafwa muna kutukûla muna sumu yo lufwa kimana twavua moyo a mvu ya mvu.—Yoane 3:16.

NKIA NTANGWA LUFWA LUFOKOKA?

O unu, o ungunza wa Nkand’a Nzambi mu lungana kaka wina kadi mu “nsungi zampasi” twina. Ediadi disonganga vo mu lumbu yambaninu ya nza yayi tuzingilanga. (2 Timoteo 3:1) E lumbu yambaninu ifokokela muna “lumbu kia lufundisu ye kia lufwasu lwa mindembi vumina Nzambi.” (2 Petelo 3:3, 7) Kansi, awana bezolanga Nzambi bevuluka muna lumbu kia lufwasu yo vua “moyo a mvu ya mvu.”—Matai 25:46.

Mazunda ye mazunda ma wantu bevewa e lau dia vua moyo a mvu ya mvu vava befuluka. Yesu wafula o muntu vava kayenda kuna mbanz’a Naini. Nkento mosi ansona wafwilwa mwan’andi mosi kaka. Yesu ‘wamfwila e nkenda’ yo fula mwan’andi. (Luka 7:11-15) Paulu wa ntumwa wasoneka vo: “Ngina ye vuvu muna Nzambi, . . . vekala yo lufuluku lwa ansongi ye awana balembi songa.” E vuvu kiaki i sinsu kia zola kwa Nzambi muna wantu.—Mavangu 24:15.

Mafunda ye mafunda ma wantu bena ye vuvu kia zinga yakwele mvu. Nkand’a Nzambi uvovanga vo: “Asongi bevwa nza, besikila vo yakwele mvu.” (Nkunga 37:29) Muna kolo kiakina, yau awonso beyangalala yo kasakeswa vava bemona e ndungan’a mvovo mina Paulu wa ntumwa kasoneka se vioka 2.000 ma mvu: “E lufwa, e nsund’aku ayeyi? E lufwa, o manga aku aweyi?” (1 Korinto 15:55) O lufwa luna vo i mbeni a wantu lusukiswa emvimba!