Kembela Yave Muna Mavangu Mambote
1 Vava olwakilwanga kwa tembwa kiampwena nkia mpila luvevoko lukalanga kele vo osolwele etininu! Kele vo mbangazi ina ko o suamina muna nzo ina vo ana bavwidi yo azodi a nzenza, ongeye oyangalela mo kala. E salu kia samuna e nsangu za Kintinu kikatulanga wantu muna mavangu ma Satana yo kubafila kuna etininu diadi. E nkal’eto ya lumbu ke lumbu nga yisadisanga wantu bamona e suaminu diadi dikubabokelanga? Elo, o Yesu wavova vo o wantu ‘bemona mavangu meto mambote, bekembela S’eto wina kun’ezulu.’—Mat. 5:16.
2 Aweyi tufwete kala kimana mavangu meto matunta akaka beza kwa Yave ye nkubik’andi? Muna yambula vo e mvovo mia Yesu miasonama muna Luka 6:31 ye 10:27 miasoba e nkal’eto ya lumbu ke lumbu. Ediadi dikutufila mu song’o zola kwa wantu akaka, yo kutuswaswanesa ye nza yayi yakondw’o zola.
3 Nsanga mosi muna nzaza wamona vo nkento mosi tontua ntima kamonanga kadi kalendanga nata mwan’andi akete ko. O nsanga wayivana mu kunatina mwana. Vava nkento ndiona kanyuvula kana nkia mpila kalenda vutulwila matondo mandi, o nsanga umvovese: ‘Vav’o kingulwa kwa Mbangi za Yave ubatamb’o matu.’ Oyandi wavanga wo, owau oyandi yo nkaz’andi se Mbangi za Yave mpe. Mavangu mambote malenda fil’o muntu mu tambula e nsangu za Kintinu.
4 Muna Zingu Kieto Kiawonso: E nkal’eto ye mfinangani zeto, diakala kuna salu yovo kuna sikola, yovo muna ntangwa za nsaka yifilanga akaka mu badika diambu mu kuma kieto ye nsambil’eto. Ozevo, diambote twakiyuvulanga: ‘Akaka aweyi bekumbadikilanga ye esi nzo ame? Mfinangani zeto nga bemonanga vo e nzo eto ye yanzala kieto yavelela ikalanga yo toma kubama? Akundi eto a salu ye a sikola nga bekutumonanga vo tuzitisanga e ola ye tu akwa sungididi muna salu? E mpw’eto nga imonekanga kwa wantu vo yalembama ye ya luzitu?’ Mavangu meto mambote malenda kitula e nsambil’a Yave se yavienga kuna kwa akaka.
5 O Petelo walukisa vo Akristu bevezwa. (1 Pet. 4:4) Tufwete kala ye ziku vo e nkal’eto ka yikadi se kuma kia kumbwa ko. (1 Pet. 2:12) Kele vo mavangu meto ma lumbu ke lumbu mekembelela Nzambi ndioyo tusambilanga ozevo tukala nze mini kiasiwa vana vazangama, kibokelanga akaka beza tinina mun’e suekameno kevananga Yave.—Mat. 5:14-16.