Mpova Zalembi Bala i Zambote
1 Nkia kuma o wantu betoma wunikinanga ateleki ayindende vava bekubazaisanga e nsangu za Kintinu? E kuma kadi mvovo miau ke mikalanga mia bala ko. Ateleki akaka bebanzanga vo muna sia umbangi mu mpila ifwene bafwete sadila e mvovo miabala. Kansi kadi, e nsangu zisonganga vo, e mvovo miasazu ye miatoma kiá i miambote.
2 O Yesu wasamuna e Kintinu kia Nzambi mu mvovo mia lembi bala ye kubika mpe alongoki andi mu vanga diau adimosi. (Mat. 4:17; 10:5-7; Luka 10: 1, 9) Wasadila mpova za móko, yuvu, ye ngana zalembi bala muna simba e ngindu z’awana kasamunwinang’e nsangu yo kotisa zo muna ntima miau. (Yoa. 4:7-14) Yeto mpe tufwete tanginina mbandu andi yo sadila e mpova zalembi bala.
3 E “nsangu zambote za kintinu” i nsamu tusamunanga. (Mat. 24:14) O sadila e Kintinu se ntu a diambu, kusadisa mu sadila e mpova zalembi bala. Yika o mambu metokanesanga awe aku. Akento beluta vwanga mambu ma nzo zau o mfunu ke mu mana ma politika ko. O se edi keluta vwanga o mfunu i salu kiandi ye luvuvamu lwa nzo andi. Aleke betokanenanga oma ma zingu kiau kia kusentu, anunu wete dia vimpi ye luvuvamu lwau betokanenanga. Wantu betokanenanga kwayingi mambu mevangamanga muna zunga kiau ke mu nsi zakaka ko. Kuna nima vova mambu betokanenanga wantu, fila ngindu zau muna nsambu zivwa alembami muna luyalu lwa Kintinu kia Nzambi. E mvovo miakete miatoma solwa kumosi ye sono ilenda kala mpila yambote ya wokesela luzolo lwa awe aku.
4 Olenda yantik’e móko muna vova:
◼ “Ka lukatikisu ko nanga okwikilanga dio vo o wantu benwananga yo ulolo wa yimbevo yakondwa nlongo. Nga ozeye dio vo o Nzambi wasil’o nsilu vo ke kolo ko ofokola mayela mawonso kumosi ye lufwa?” Yambula kavana e mvutu i bosi tanga Lusengomono 21:3-4.
5 Muna mpova za kiá ye zalembi bala, olenda simba e ngindu ye ntima mia ulolo wa wantu muna zunga kiaku yo kubasadisa balongoka oma ma Yave ye vwa e vuvu kia moyo a mvu ya mvu.—Yoa. 17:3.