Longa Ndinga Avelela Kw’akaka
1 Kanele vo Mbangi za Yave mu ‘zula, makanda, nsi ye ndinga zayingi,’ betukanga bavwidi kintwadi kia wan’angudi mu nza yawonso. (Lus. 7:9) Ediadi di’esivi kibeni mu nza yayi yavambana. Aweyi dilendakananga ediadi? Ekuma kadi tuvewanga “befo yavelela.”—Sef. 3:9.
2 Mambu M’esivi: Nki i befo yavelela? I umbakuzi wakieleka wa ludi kia Diambu dia Nzambi mu kuma kia Yave ye makani mandi, musungula ludi kia Kintinu kia Nzambi. Nze una kavova Yesu, e ludi kiaki kisamunwanga kwa “ntaudi akwikizi yo lulungalalu,” mu kuma kiaki o wantu a “ndinga zawonso za zula” betambulwilanga nsambila aludi.—Mat. 24:45; Zak. 8:23.
3 Ekolo wantu belongokanga yo vewa befo yavelela, besianga e zingu kiau ngwizani ye nsiku mia Yave. Belongokang’o kala “kumosi muna ntima mosi yo lukanu lumosi.” (1 Kor. 1:10) O malongi ma Nzambi mekubafilanga mpe mu yima e fu yambote, mvovo mia kieleka musungula muna samuna e nsangu zambote kw’akaka. (Tito 2:7, 8; Ayib. 13:15) E nsobani yayi y’esivi yivananga nkembo kwa Yave.
4 Nze nona, yakala dimosi vava kakingulwa kwa nteleki mosi, wayuvula yuvu yayingi ye yawonso yavaninwa mvutu muna Nkand’a Nzambi. Wau vo wayangalela kikilu mambu kawa, wayantika longoka nkumbu miole konso lumingu ye lungana kuna tukutakanu. Watoma sivika e mpila katambulwila kun’Eseka dia Kintinu, kadi mwakala wantu a makanda ma mpila mu mpila. Mu kolo kiakete, oyandi yo nkaz’andi basoba mpila zingu kiau ye vubwa. Tuka ekolo kiakina, wasadisa tezo kia 40 ma wantu muna sadila Yave, kumosi ye esi nzo andi. Ke kolo ko wayantik’o sala se mviti a nzila kana una vo mvanguki.
5 Longanga Akaka: O mambu mebwanga mu nza mefilanga wantu ansongi mu fimpa e nyindu ye zingu kiau. Nze Yesu, tufwete zola kubasadisa. Nkingula zambote y’elongi dia Nkand’a Nzambi i nsabi muna sadisa wantu a ntima miansongi balongoka yo vewa befo yavelela.
6 Ofila elongi diankufi dia Nkand’a Nzambi vana mielo mia nzo za wantu besalanga e salu i mpila ambote muna mokena yau. (km 5/02 lukaya lwa 1) Nga wateza yo kala? Vava okubamanga mu vutukila kingula muntu, sola e nsunzula ifwene muna nkudikilwa ya Salu Kieto kia Kintinu kia Yanuali, 2002. Nsunzula zayingi za nkudikilwa yayi zavewa muna fila e mbokena muna finkanda Adieyi Kevavanga ye nkanda Zayi. Toma kubika e nsunzula kimana walenda fila mbokena una ufwene mu tini kimosi. Tanga yo badika sono kimosi yovo yole muna tini, kubika e kiuvu muna fokola. Ediadi dikusadisa mu yantikila elongi muna tini okubikidi muna nkingula ilanda.
7 O nkangu a Yave bevwanga nsambu zayingi muna longokang’o vwa befo yavelela. Mbula twasia sungididi kia sadisa akaka kimana bakala yeto kumosi muna ‘vovela nkumbu a Yave’ yo ‘kunsadila kumosi.’—Sef. 3:9.