‘Tambula Wo’
1 O Yesu nkumbu mosi, vava kamokena ye alongoki andi mu kuma kia sompa, wayikila nkal’a umpumpa nze ‘lukau.’ I bosi, wavova vo: “On’olenda wo tambula, mbula katambula wo.” (Mat. 19:10-12) Mu mvu miavioka, Paulu wa ntumwa wasoneka mu kuma kia nluta mia nkal’a mpumpa ye kasakesa akaka balanda mbandu andi muna kala kaka ampumpa. (1 Kor. 7:7, 38) O unu ayingi ‘betambulwilanga’ nkal’a umpumpa betambulanga nluta miayingi. Nkia nluta betambulanga?
2 Sala yo Kondwa ‘Nkakalakani’: O Paulu wabakula wo vo nkal’a umpumpa yikumvana elau dia sadila Yave kondwa kwa ‘Nkakalakani.’ Diau adimosi mpe o unu, mpangi za mpumpa balenda kuyifwanisa mu kota mu Sikola ya Nkubama ya Uselo, ye mpumpa nkumbu miayingi okalanga wavevoka mu kota mu salu kia ntangwa ke ntangwa, longoka ndinga ya nzenza, kwenda sadila mu zunga yivwidi mfunu asadi ayingi, sadila kuna Betele yovo kuyifwanisa mu malau makaka ma salu. Kalenda kala mpe ye ntangwa yafwana muna vanganga elongi dia yandi kibeni yo badika ye mokena yo Yave muna sambu. O mpumpa nkumbu miayingi okalanga ye ntangwa yafwana muna sadisa akaka. E salu yayi yawonso i “wete dia [yandi, NW] kibeni.”—1 Kor. 7:32-35; Mav. 20:35.
3 E salu kiaki kia Nzambi kiakondwa nkakalakani nsambu zayingi kitwasanga. Vava kalungisa mvu 27 muna salu kiaki kuna Kenya, mpangi mosi wa nkento wa mpumpa wasoneka vo: “Yakala y’akundi ye salu kiayingi! Twasalanga entwadi [ye] kingula muntu yo nkw’andi. . . . Yasadilanga luvevoko lwa nkal’a umpumpa mu salu kia umbangi, ediadi dikumpananga kiese kiayingi.” Wavova diaka vo: “Mu mvu miami miawonso e ngwizani ame yo Yave yawokela.”
4 Sadila Elau Diadi: Yesu wavova vo e “diambu dia kintinu ki’ezulu” i kuma kifwete sadilwa lukau lwa mpumpa. (Mat. 19:12) Nze konso lukau, e nkal’a umpumpa ifwete sadilwa una ufwene muna twasa kiese ye nluta. Mu kuma kia nluta itwasanga e nkal’a umpumpa ye vuvu bebundanga kwa Yave muna tambula ngangu ye nkuma, mpumpa zayingi bezayanga o mfunu wa sadila lukau lwalu.