Ovutukila Kingula Kufilanga mu Longoka Nkand’a Nzambi yo Wantu
1. Ovutukila kingula wantu nkia kuma dinina diamfunu?
1 Yesu wakanikina alongoki andi vo ke basamuni kaka e nsangu zambote ko, kansi bakitula mpe wantu ‘s’alongoki . . . yo kubalonga.’ (Mat. 28:19, 20) O nteleki osamunanga e nsangu, kansi o nlongi mayingi kevanganga. Olonganga, sasila yo songa ziku kia diambu. E mpila mosi ya longela akaka i vutukila kingula ana besonganga luzolo lwambote mu yantika longoka yau o Nkand’a Nzambi.
2. Aki nani tufwete vutukila kingula?
2 Aki nani tufwete vutukila kingula? Sia sungididi kia vutukilang’o kingula ana batambula nkanda yovo ana basonga luzolo kana nkutu lwakete muna nsangu zambote. Avo wene muntu osongele luzolo lwambote ekolo sianga umbangi va fulu kia ndonga, ofwete vava zaya e fulu kezingilanga ye ntalu ya telefone kimana walenda kunkingula. Kala ye vuvu kia yantika longoka Nkand’a Nzambi yo wantu. Vavanga wantu balenda tambulwila longoka Nkand’a Nzambi, ke lukatikisu ko okubasolola.—Mat. 10:11.
3, 4. Adieyi divavwanga muna vanga nkingula zafwana?
3 Vwanga Akaka Mfunu: E nkubika ya nkingula yambote yiyantikanga muna nkingula antete. Ateleki azikuka besonekanga diambu diyangidikidi mwisi nzo yo sadila dio se ntu a diambu wa mbokena muna nkingula zilanda. Akaka beyuvulanga kiuvu kuna mfoko a mbokena mu sikamesa luzolo lwa mwisi nzo mu nkingula ilanda. O luzolo lwafwana tusonganga kwa wantu lukutufilanga mu kubayindula kana nkutu vava tuvaikanga mu nzo zau ye dikutukasakesanga mu vutuka kubakingula lembi zingila. Avo dilendakana vava vutuka kingula muntu ekolo mambu kalongokele mena muna ngindu zandi—nanga olenda viokesa lumbu kimosi yovo yole.
4 Vava ovutuka kingula muntu, badika mana lwamokena kala. Kala y’ekani dia tanga kana Sono kimosi kia Nkand’a Nzambi kia lukasakeso konso ntangwa yo songa luzolo lwa wunikina muntu. Sianga sungididi kiatoma zaya mwisi nzo. I bosi, muna nkingula zilanda kaulwila e ludi kia Diambu dia Nzambi muna konso diambu dikuntokanesanga.
5. Nkia mpila ya sazu ilenda sadilwa mu yantika longoka Nkand’a Nzambi yo muntu?
5 Sia Sungididi kia Yantika Elongi dia Nkand’a Nzambi: Vava ovutuka kingula wantu sia sungididi kia yantika longoka yau Nkand’a Nzambi. Aweyi lenda dio vangila? Yika vo diambu diamfunu ozolele kunzayisa, i bosi ziula tini kimosi muna nkanda Zayi yovo finkanda Adieyi Kevavanga kina omwene vo kilenda kunyangidika. Tanga tini, yuvula e kiuvu yo tanga sono kimosi yovo yole yayikwa. Ediadi dilenda vangwa kana nkutu watelama vana mwelo a nzo a muntu muna miniti tanu yovo kumi. Muna fokola yuvula e kiuvu kilende yo yika vo ovutuka lumbu kiakaka mu mokena e mvutu za diambu diodio.
6. Aweyi tulenda songela vo tubakulanga o mfunu wa vutukila kingula ana basongele luzolo lwambote?
6 Vwanga mfunu awonso besonganga luzolo lwambote i diambu diamfunu dia uselo weto. Ikuma vo, vaulanga ntangwa mu vutukila kingula ana basongele luzolo lwambote muna programa aku ya konso lumingu. Ovanga ediadi disadisa mu tomesa salu kiaku kia umbangi yo kutwasila kiese.