Kwamanan’o Samuna Mavangu Mesivi ma Yave
1. Nki’evangu diesivi dia Yave otoma yangalelanga?
1 Ke vena muntu ko olenda tezaniswa yo Yave wa Nzambi eto anene! O Davidi wasoneka vo: ‘Owokese mo, ongeye Yave wa Nzambi ame, O mavangu maku mesivi ye ngindu zaku oku twina, O tetomona zo oko wina, ke kulendakana ko.’ (Nku. 40:5) Omaka muna mavangu mesivi ma Yave i mama: wasem’ezulu ye nza. Wasikidisa Kintinu kia Masia. Osonganga walakazi kwa nkangu andi ye salu kia samuna nsangu zambote muna nza yawonso. (Nku. 17:7, 8; 139:14; Dan. 2:44; Mat. 24:14) O zola kwa Yave ye kiese muna mawonso kevanganga mekutufilanga mu samuna oma ma yandi kw’akaka. (Nku. 145:5-7) Muna ngonde ya Malusu, Abidi ye Mayu tukala y’elau dia vanga wo una ufwene.
2. Nkia nluta tulenda baka muna sala se aviti a nzila a nsadisi?
2 Sala Nze Mviti a Nzila a Nsadisi: Nga olenda kubama kimana wasala ola 50 mu salu kia umbangi mu ngonde zozo? Nkonso nkubika ovanga muna kuma kiaki yitoma yangalelwa. (Ef. 5:16) Ndonga bemonanga vo e salu kia kimviti a nzila kitomesanga mpil’au ya sila umbangi. Bekalanga yo unkabu wa kwenda nzo ke nzo yo toma sadila Nkand’a Nzambi. O sala kwayingi e salu kia umbangi kutwasanga elau dia kingula ana basongele luzolo lwambote. Ana bakondele alongoki a Nkand’a Nzambi belendanga dio yantika ekolo besalanga salu kia mviti a nzila. Wau vo e salu kia kimvivi a nzila kia sala ntangwa yayingi mu sadisa akaka, kifwete kala kia kiese kikilu.—Mav. 20:35.
3. Akaka aweyi belendelanga sala salu kia mviti a nzila a nsadisi kana una vo bena ye nkakalakani zayingi?
3 Kubadiki ko vo kwafwana ko mu sala e salu kiaki. Nkuluntu mosi wa se dia wana wole ye nsadi muna kompani wasala salu kia mviti a nzila a nsadisi mu mvu wavioka. Mpangi ndioyo aweyi kalendel’o sala e salu kiaki? Muna kuma kia salu kiandi, ku nsuk’a lumingu kaka kabakang’e ntangwa ya sala salu kia umbangi. Kina kia Sabala wayantikanga e salu kia umbangi muna mene-mene. Nkumbu miayingi, mpangi zakaka mpe basalanga e salu kia mviti a nzila a nsadisi. Basalaziananga yo kasakesa muntu yo nkw’andi. Kuna nkutakani yakaka mpangi mosi wankento wa kimbuta kia mvu 99, wasala salu kia mviti a nzila mu ngonde ya Mayu vava kakasakeswa kwa mwan’andi ankento mu sal’entwadi. Akaka kuna nkutakani besadisanga mpangi ndioyo wanunu mu sindikila ekalu diandi dia mvanguki vava besianga umbangi wa nzo ke nzo yo filanga elongi dia Nkand’a Nzambi. Wasilanga mpe umbangi mu telefone, muna mpambu za nzila ye sonekena akaka. Ozeye wo vo ke mu ngolo zandi ko kavangila mawonso mama, muna lusadisu lwa Nzambi kaka.—Yes. 40:29-31.
4. Aweyi tufwete vanga mu sala e salu kia mviti a nzila a nsadisi?
4 Vanga nkubika olenda lungisa. E nkubama za vevoka mu kuma kiaki zilenda sadisa. Nga u nsadi a lumbu kiamvimba kuna kompani yovo u mwan’a sikola? Nanga o sala kuna nsuka lumingu dilenda kusadisa. Kele vo kuna ye vimpi wafwana ko yo lembi sala ola zayingi muna salu kia umbangi nanga olenda salanga e salu kia umbangi lumbu yawonso kansi ola zakete kaka. Mokena y’akaka mu kuma kia luzolo lwaku lwa sala se mviti a nzila a nsadisi. Oyau mpe nanga balenda tanginina luzolo lwalu.
5. Adieyi balenda vanga aleke muna ngonde ya Malusu, Abidi ye Mayu?
5 Mpila Ina Aleke Balenda Kotela mu Salu: O Yave oyangalalanga vava aleke besamunanga mavangu mandi mesivi. (Nku. 71:17; Mat. 21:16) Kele vo u nleke wavubwa nanga olenda kota mu salu kia mviti a nzila a nsadisi muna ngonde za vundu. Kele vo kulendi kio sala ko, nga olenda wokesa yo tomesa e salu kiaku kia umbangi muna ngonde zozo? Kele vo ntwadi osalanga y’amase maku muna salu kia umbangi kansi yamu wau kunteleki ko, e yayi i ntangwa ambote muna kuyifwanisa. Kubanzi ko vo kuna yo zayi wafwana ko muna vutulanga e yuvu ya Nkand’a Nzambi, yovo ofwete teka zaya mayingi nze ampangi z’ambuta bavubwa kala. Nga ozeye malongi masina ma Nkand’a Nzambi? Nga olemvokelanga nsiku mia nkal’ambote mia Nkand’a Nzambi? Nga ozolele zayakana nze Mbangi a Yave? Ozevo, zayisa e diambu diadi kwa mase maku. Oyau balenda mokena y’akuluntu muna kufimpa kana vo olungisa mana melombwanga.—Tala Nkanda Organizado, lukaya lwa 98-99.
6. Aweyi tulenda sadisila nlongoki a Nkand’a Nzambi mu kituka se nteleki a nsangu zambote?
6 Sadisa Akaka Bateleka Nsangu Zambote: Alongoki a Nkand’a Nzambi ana banungunukini muna mwanda balenda kituka se ateleki muna ngonde zozo. Kele vo ovwidi nlongoki a Nkand’a Nzambi wanungunuka muna mwanda, zayisa kwa nkengi wa buka kiaku ki’elongi dia nkanda yovo mpangi okumvanang’e moko. Mosi muna yau olenda kuyikama mu mokena yo nlongoki aku mu zaya e tezo kia lunungunuku luandi. Kele vo o nlongoki wafwana ye una ye luzolo lwa kituka se nteleki, o nkengi a mfidi olenda sikidisa vo akuluntu wole bamokena yandi yo ngeye kumosi. (Tala Sentinela ya kia 15 kia Novemba, 1988 lukaya lwa 17.) O nlongoki kele vo wafwana mu kituka se nteleki, yantika kunlonga una wa sila umbangi.
7. Aweyi balenda sadisilwa Ateleki kebesalanga diaka kwayingi ko mu salu kia umbangi y’ana bayambula samuna nsangu zambote?
7 Akengi alongi dia nkanda muna buka yau bafwete lunga-lunganga ateleki ana bayambula samuna nsangu zambote yovo ana ke besalanga diaka kwayingi ko mu salu kia umbangi. Ubalomba basala yaku entwadi mu salu kia umbangi. Kele vo se kolo bayambula teleka nsangu zambote diamfunu vo akuluntu wole bateka mokena yau mu zaya kana vo bafwana mu vanga wo. (Tala e Mvutu za Yuvu muna Salu Kieto kia Kintinu kia Novemba 2000.) O vema wa nkutakani muna ngonde zozo ukubakasakesa mu vutukila e salu kiau kia umbangi.
8, 9. Akuluntu adieyi bafwete vanga muna kasakesa e salu kia kimviti a nzila?
8 Kubama Owau Mu Wokesa e Salu Kiaku: Akuluntu bafwete yantika kasakesa e nkutakani mu salu kia mviti a nzila a nsadisi. Olenda vanga mayingi muna mvovo miaku mia lukasakeso ye mbandu aku ambote. (1 Pet. 5:3) Mpangi kwa basala salu kiaki muna mvu wavioka? Nga nulenda vioka o lutangu lualu? Akengi a buka ki’elongi dia nkanda y’ana bekubavananga moko bafwete vava mpila ya kasakesela awonso muna buka mu wokesa e sau kiau. Akengi a salu nanga bafwete sikidisa vo vakomwa lukutakanu lwa mpaika mu salu kia umbangi. Zayisa kwa nkutakani e nkubika yayi. Vafwete solwa ateleki bazikuka mu fila tukutakanu toto. Tufwete yantikanga yo fokoka muna ola yasikidiswa. (Tala e Mvutu za Yuvu muna Salu Kieto kia Kintinu kia Setemba 2001.) O nkengi a salu kafwete kubika mpe e nkanda ye zunga yafwana muna sila umbangi.
9 O mvu wavioka nkuluntu wa nkutakani mosi wakasakesa salu kia kimviti a nzila. Mpangi zayingi basala e salu kiaki. Bakubika ola zayingi muna vanganga lukutakanu lwa mpaika mu salu kia umbangi. Bakutakananga muna ola 5 ye miniti 30 mu mene-mene mu sila umbangi muna nzila. Bakutakananga muna ola 15 ya masika mu kuma ki’aleke batukanga ku sikola ye muna ola 18 ya masika mu kuma ki’awana batukanga mu salu. Bakubika mpe lukutakanu lwalu nkumbu ntatu kina kia Sabala. Tezo kia 66 z’ampangi basala e salu kia kimviti a nzila muna ngonde ya Abidi ya mvu wauna!
10. Esi nzo aweyi balenda wokesela e salu kiau?
10 Mun’elongi dieno dia esi nzo nanga nulenda vaula e ntangwa mu mokena e mpila ya wokesela e salu yeno muna ngonde zozo. Kele vo nukubamene kiambote yo salaziana nanga akaka yovo nzo yawonso balenda kwau sala salu kia kimviti a nzila a nsadisi. Kele vo ke belenda wo ko, balenda vava mpila ya wokesela e salu kiau. Nulomba lusadisu lwa Yave muna sambu. Nubund’e vuvu vo o Yave osambula e ngolo nuvanga.—1 Yoa. 3:22.
11. (a) E kimenga kia lukulu lwa Kristu nkia diambu diamfunu kivanganga? (b) Nkia lumbu kikala o Luyindulu lwa lufwa lwa Kristu?
11 Evangu Diesivi dia Nzambi edi Disundidi: E mpila yisundidi kasongel’o zola o Yave i van’o Mwan’andi se lukulu muna wete dieto. (1 Yoa. 4:9, 10) E kimenga kia lukulu kiaziula nzila muna kula wantu mun’esumu ye lufwa. (Roma 3:23, 24) Vakangwa ekangu diampa mu kuma kia menga mabunguka ma Yesu. Diavana wantu asumuki elau dia kituka se wan’a Nzambi ye vuvu kia yala muna Kintinu ki’ezulu kia Nzambi. (Yer. 31:31-34; Maku 14:24) Edi disundidi o mfunu, o lemvoka kwa Yesu kwavelelesa nkumbu a Yave. (Nsi. 32:4; Nga. 27:11) Kina kia Lumingu kia 4 kia ngonde a Abidi, Kiyindulwa Lufwa lwa Kristu muna nza yawonso vava ntangwa kedimuka.
12. O lungana kuna Nlekelo a Mfumu nkia ndandu dilenda twasa kwa akwa luzolo lwambote?
12 Luyindulu lwa Nlekelo a Mfumu mavangu mesivi ma Yave kikembelelanga. Elongi dia luyindulu dikutufila mu songa luyangalalu lweto kwa Yave mu nkubika kavanga ya lukulu. Akwa luzolo lwambote belungana ko bemona omaka mavangu mesivi ma Nzambi. Bemona kintwadi ye nzola kelongang’o Yave kwa nkangu andi. (Ef. 4:16, 22-24; Yak. 3:17, 18) Olungana muna lukutakanu lwalu lwamfunu kulenda fila muntu mu soba e ngindu zandi mu oma ma Nzambi. Ikuma, tufwete sia ngolo za lungana e lumbu kiakina.—2 Kor. 5:14, 15.
13, 14. Aki nani bafwete bokelwa mu kwiza lungana kuna Luyindulu ye nkia mpila ovangila wo?
13 Bokela Akaka Balungana: Yantik’o soneka owau e nkumbu za wantu obokela mu kwiza lungana. Balenda kala yitu yaku ya mindembi kwikila, mfinangani zaku, akundi a sikola ye a salu, alongoki a Nkand’a Nzambi ankulu y’ana olongokanga yau o unu, ye awonso wavutukil’o kingula. Akengi befilanga elongi dia nkanda bafwete vwa e nkumbu za ateleki awonso bayambula samuna nsangu zambote.
14 Sadila e mboka ya Luyindulu lwa Lufwa lwa Kristu ina yanietekwa. Soneka e ola ye fulu kivangamena Luyindulu. Nanga ozola sadila e mboka ina kuna lukaya lwansuka lwa Sentinela ya kia 15 kia Malusu, 2004 yovo Despertai! ya kia 22 kia Mulusu 2004. Vava kifinama e lumbu kia 4 kia Abidi, susumuna awonso obokela.
15. Aweyi olenda songela e ngemba muna fuku wa Luyindulu?
15 Muna Luyindulu: Vava waluaka kuna lukutakanu una ke lwayantikidi ko. Song’e ngemba muna kayisa wantu ampa bezidi lungana. (Roma 12:13) Ongeye i nkwa mbebe kwa nzenza zawonso obokele. Ubasadisa balembi mona e nzungu. Ubasunzula kwa mpangi zakaka muna nkutakani. Nuvwanda vamosi. Ovo mosi muna yau kena ye Nkand’a Nzambi ko yovo nkand’a nkunga (cançioneiro) tanga yo yimbila kumosi yo yandi. Kunima lukutakanu vutula konso kiuvu bevanga. Kele vo vena y’awana bezidi lungana mu nkumbu antete ubayuvula kana vo bazolele zaya diaka mayingi ma Diambu dia Nzambi ye makani mandi. Uyivana mu longoka yau Nkand’a Nzambi muna nzo zau.
16. Adieyi dilenda vangwa muna sadisa awana belungananga kuna lukutakanu mu nungunuka muna mwanda?
16 Kwamanan’o Sadisa Awana Balunganene: Muna tumingu tulandila Luyindulu awana balungana nanga lusadisu bavwidi o mfunu. Muna yau valenda kala y’awana balungananga kuna lukutakanu mu lumbu yavioka, kansi owau ke belungananga diaka ko. Akuluntu bafwete kala ye lusikidisu vo wantu awaya ke bavilakeno ko. Bafwete vav’o zaya ekuma wantu awaya bayambulwila nungunuka muna mwanda yo kubasadisa bamona vo e mbaninu ifinamene. (1 Pet. 4:7) Sadisa awonso bamona mfunu wa lemvokela nsiku wa Nkand’a Nzambi wa kwenda lungananga ntangwa zawonso ye nkangu a Nzambi.—Ayib. 10:24, 25.
17. Ekuma tufwete kwamanen’o samuna mavangu mesivi ma Yave?
17 O mavangu ma Yave masivi kikilu oku kwa yeto. Katulendi mo bakula una ufwene ko kana nkutu muna zingu kiakwele mvu. (Yobi 42:2, 3; Kim. 3:11) Ozevo, katufwete bembola ko mambu malenda kunyangidika. Tulenda songa luyangalalu lweto muna mavangu ma Yave mesivi mu nsungi yayi ya Luyindulu muna wokesa salu kieto kia umbangi.
[Ndandani za Mambu zina muna lukaya lwa 5]
Nga olenda Sala se Mviti a Nzila a Nsadisi muna Sadila Programa mosi muna Zazi?
Malusu Kia lumingu Kia Ntete*Kia Zole* Kia Tatu*Kia Yá Kia Tanu Kia Sabala Ngonde Ntalu Awonso
Konso Lumbu 2 1 1 1 1 1 5 51
Lumbu Yole 0 5 0 5 0 0 0 50
Nsuka Lumingu Kaka 5 0 0 0 0 0 8 52
Nsuka Lumingu ye Lumbu Yole muna Lumingu 2 0 0 2 0 2 6 50
Abidi
Kia lumingu Kia Ntete* Kia Zole* Kia Tatu*Kia Yá Kia Tanu Kia Sabala Ngonde Ntalu Awonso
Konso Lumbu 2 1 1 1 1 1 5 50
Lumbu Yole 0 0 0 0 5 5 0 50
Nsuka Lumingu Kaka 5 0 0 0 0 0 8 52
Nsuka Lumingu ye Lumbu Yole muna Lumingu 2 0 0 2 0 2 6 50
Mayu
Kia lumingu Kia Ntete* Kia Zole* Kia Tatu*Kia Yá Kia Tanu Kia Sabala Ngonde Ntalu Awonso
Konso Lumbu 2 1 1 1 1 1 4 51
Lumbu Yole 0 5 0 0 0 0 5 50
Nsuka Lumingu Kaka 3 0 0 0 0 0 7 50
Nsuka Lumingu ye Lumbu Yole muna Lumingu 2 0 0 2 0 2 5 *Tanu muna ngonde
51