“Nuzodi Yave, Yeno Awonso a Minkwikizi”
Lufwa lwa Yesu Luyindulwa Kina kia 4 kia Abidi
1 Muna mvu miavioka, luyalu lwa Ucrânia lwa yingilanga ampangi, musungula vava nsungi a Luyindulu yafinamanga. Basianga sungididi kia solola e fulu bevangila lukutakanu. Wau vo ayadi bazayanga e nsungi a Luyindulu, ediadi mpasi diakalanga ntangwa zawonso. Ampangi adieyi badi vanga? Mpangi mosi wa nkento wakala ye nzo yazala yo maza. Wau vo ayadi ke bayindula dio ko vo e nzo yayina yilenda vangilwa lukutakanu, ampangi bavanga kunda ya nti vana ntandu a maza. Kana una vo fulu kiampasi kiakala,kevakala muntu ko wabatokanesa vava bayindulanga lufwa lwa Yesu ye kiese kiawonso.
2 Ekani dia ampangi zeto esi Ucrânia dia lemvokela nkanikinu wa yindula lufwa lwa Yesu, diasonganga o zola kwau kuna kwa Nzambi. (Luka 22:19; 1 Yoa. 5:3) Avo nkakalakani tuna zau mu zingu kieto, e mbandu yayi yilenda kutukasakesa mu lungana kuna Nlekelo a Mfumu kina kia 4 kia Abidi. Muna vanga ediadi, tusonga vo tuna yo nyindu mosi ye ntozi a nkunga ona wavova vo: “Se nuzodi Yave, yeno awonso a minkwikizi miandi.”—Nku. 31:23.
3 Sadisa Akaka Bawokesa Zola Kwau kwa Nzambi: O zola kweto kwa Nzambi kukutufila mpe mu bokela akaka balungana yo yeto muna Luyindulu. Nkundikilwa wa Salu Kieto kia Kintinu kia Fevelelo kiazayisa vo konso muntu mu yeto kasoneka nkumbu z’awana kazolele bokela beza ku Luyindulu. Nga osianga e sungididi kia bokela konso muntu wasoneka e nkumbu? Vaula e ntangwa mu kubasonga e nsasa ya lumbu kiaki. Avo dilendakana, ubasusumuna basungamen’e lumbu ye ola ya Luyindulu. Nanga kwenda kubabonga kuna nzo zau dilenda kubakasakesa.
4 Muna lukutakanu sia sungididi kia kayisa ana batambulwidi e mbok’eto, ubavana ngiz’ambote. Aweyi olenda kubasadisila bawokesa zola kwau kwa Yave? Muna vananga mvutu za yuvu yau. Avo dilendakana uyivana mu yantika longoka yau Nkand’a Nzambi. Ubalomba beza lungananga muna tukutakanu tweto konso lumingu. Akuluntu bafwete sia sungididi kia sadisa Ateleki ana bayambula samuna nsangu zambote beza mu lukutakanu. Bafwete kubakingula yo kubakasakesa bavutukila e salu kiau muna nkutakani. Nanga nulenda mokena mambu m’elongi dia Luyindulu.—Roma 5:6-8.
5 Tuwokesa Zola Kweto Muna Yave: Oyindula lukau lwa lukulu dilenda kolesa o zola kweto muna Yave yo Mwan’andi. (2 Kor. 5:14, 15) Mpangi mosi wankento olungananga mu Luyindulu se mvu miayingi wavova vo: “Tuvingilanga e lumbu kia Luyindulu ye kiese kiawonso. I diambu diamfunu muna konso mvu. Se vioka mvu 20 nsungamenanga kina yakala muna nzo amafwa yatalanga e vimbu dia s’ame anzolwa kiyabakula o mfunu a lukulu. Entete diakalanga se diambu diakete kwandi. Kana una vo yazayanga esono yawonso yiyikanga oma ma luyindulu ye toma yo sasila. Kansi, vava kafwa o s’ame yayantik’o mona mfunu wa lungana kuna luyindulu. Tuka kiakina o ntim’ame wazala yo kiese kadi nzeye mana luvanga kwa yeto o lukulu.”—Yoa. 5:28, 29.
6 Ekolo kifinamanga Luyindulu lwa mvu wau sia lo etima. (2 Tus. 19:3) Tanga yo badika e sono ya Nkand’a Nzambi ya Luyindulu ina muna Examine as Escrituras ye muna Calendário ya 2004. Akaka beyangalelanga tanga kapu kia 112-116 kia nkanda Maior Homem mun’elongi diau dia esi nzo. Akaka befimpanga nkanda miakaka mikubikanga buka kia ntaudi akwikizi yo lulungalalu. (Mat. 24:45-47) Ozevo, yeto awonso tulenda vutula matondo mu kuma kia nkubika ya lukulu. (Nku. 50:14, 23) Elo, mu nsungi yayi ya Luyindulu mbula twakwamanana yindula o zola kwa Yave kwa yeto yo vava mpila tufwete songela zola kweto kwa yandi.—Maku 12:30; 1 Yoa. 4:10.