Luzindalalu Nsambu lutwasanga
1 “Muna luzindalalu lueno i nubakila mioyo mieno.” (Luka 21:19) E mvovo miami mia Yesu mu kuma kia “mbaninu a nza,” misonganga vo muna zindalala tufwete nwana ye ntonta zayingi. Muna ngolo za Nzambi, konso muntu mu yeto olenda ‘zindalala yakuna mbaninu’ yo ‘vuluzwa.’—Mat. 24:3, 13; Fili. 4:13.
2 Lubangamu, mayela, kondwa kwa nzimbu ye lukendalalu lwa ntima lulenda kitula konso lumbu se kiampasi. Ka tuvilakani ko vo Satana ovavanga fwasa luzindalalu lweto muna Yave. Konso lumbu tukwikamanga muna Nzambi, tusonganga vo Satana mvuni. Ekwe kiese kikalanga mu zaya vo “mansanga” meto mu kuma kia ntonta ke mevilakanwa ko! Wau vo luzindalalu lweto ntim’a Yave luyangidikanga, e mansanga meto mamfunu kikilu kwa yandi.—Nku. 56:8; Nga. 27:11.
3 Ntonta Lukwikilu Zisiamisanga: E mpasi zilenda sengomona fu kia muntu, nze lulendo yovo kondwa kwa luzindalalu. Vana fulu kia vava fokola ntonta muna kulula nsiku mia Nzambi, tufwete lemvokelanga luludiku lwa Nkand’a Nzambi kimana ‘o luzindalalu lwa lungisa e salu kiandi.’ Ekuma? Kadi ozindalala muna ntonta dikutusadisa ‘twazikuka, yo fwana.’ (Yak. 1:2-4) O luzindalalu lulenda kutusadisa mu yima fu yambote nze lembama, ngemba ye nkenda.—Roma 12:15.
4 Lukwikilu lwa Tontwa: Vava tuzindalalanga muna ntonta, o lukwikilu lweto luzikukanga yo kituka se lwantalu vana ndose a Nzambi. (1 Pet. 1:6, 7) O lukwikilu lwalu lukutusadisa mu kala nangwí muna ntonta za kusentu. Vana ntandu, tuvwa edienga dia Nzambi ye kumika vuvu kieto.—Roma 5:3-5.
5 Muna Yakobo 1:12 tutanganga mu kuma kia luzindalalalu vo: “Nkwa nsambu o muntu ozizidilanga umpukumini: kadi vo ofwaneso, tambula ketambul’e kolow’a moyo.” Muna kuma kiaki, mbula twakala yo lukwikilu lwasikila muna Yave ye vuvu kia sia vo osenda ‘awana banzolele.’