Fil’elongi dia Nkand’a Nzambi Dinungunukanga
Kunku kia 2: Kubamanga Muna Fila Elongi
1 Mayingi mevavwanga muna fil’elongi dia Nkand’a Nzambi, ke tanga kaka ko mambu ye sono ya Nkand’a Nzambi yiyikilu. Tufwete sasila elongi mu mpila dilenda kotela mu ntim’a nlongoki. Muna vanga wo tufwete toma kubamanga.—Nga. 15:28.
2 Mpila Yakubamena: Teka samba kwa Yave mu kuma kia nlongoki ye nsatu zandi. Lomba kwa Yave kasadisa muna kotesa mambu mu ntim’a nlongoki. (Kol. 1:9, 10) Muna toma bakula e mbuta diambu dina muna elongi fimpa o ntu a diambu, fintu a diambu ye makaka mpe. Ukiyuvula, ‘Nkia mfunu w’elongi diadi?’ Ediadi dikusadisa mu toma sasila e mbuta diambu ekolo ofilanga elongi.
3 Toma fimpa konso tini ki’elongi. Solola e mvutu za yuvu ina mun’elongi, sia kaka mbuta diambu e sinsu. Badika mpila inina ngwizani e sono ya Nkand’a Nzambi iyikilu ye mbuta diambu dina mun’elongi. Sola e sono ya Nkand’a Nzambi isinga tangwa vava ofil’elongi. Osonekanga mambu makete muna nkanda dikusadisa kikilu. O nlongoki kafwete bakula vo mana kelongokanga mu Nkand’a Nzambi metukanga.—1 Tes. 2:13.
4 Fil’elongi Mun’owu wa Nsatu za Nlongoki: Lungisa nsatu za nlongoki ekolo ofilanga elongi. Vava zaya nkia yuvu keyuvula ye nkia mambu malenda kala mpasi muna bakula yovo tonda. Ukiyuvula: ‘Adieyi kafwete vanga muna nungunuka mu kimwanda? Aweyi ndenda kotesela mambu mu ntim’andi?’ I bosi fil’elongi una ufwene. Ezak’e ntangwa, olenda kubika e nona yovo yuvu muna sadisa nlongoki mu bakula e nsas’a diambu yovo sono. (Nek. 8:8) Venga kudikilanga mambu makaka ke mena mun’elongi ko. Lufimpulwilu lwankufi kuna mfoko elongi lukunsadisa mu sungamena mambu mamfunu kalongokele.
5 Ekwe kiese tukalanga kiau vava wantu ampa beyimanga mbongo a unsongi muna kembelela Yave! (Fili. 1:11) Muna kubasadisa balungisa ekani diadi, teka kubamanga konso ntangwa okwenda fila elongi dia Nkand’a Nzambi.