Sikola ya Nkubama ya Uselo—Mwelo Ampwena wa Salu Uziukidi
1 Muna Yeremiya wa ngunza Yave wavova vo: “Ikubabundumwina avungudi ana bekubadikila: Ke bemona diaka wonga ko, ovo vumiswa; ke vakondwa mosi ko.” (Yer. 23:4) E salu kiaki kia vungula kisalwanga o unu vana vena wantu a zula yawonso. Kisalwangwa kwa nkama za mazunda ma akuluntu a nkutakani. Vana ntandu, ulolo wa matoko bekuyivananga kuna mvevo muna salu kia Yave. (Nku. 110:3) Nkia nsambu bena ampangi awaya asakalala muna nkutakani a nkangu a Nzambi! Ekolo salu kia nkutika ya kimwanda kikwamanananga, ampangi azikuka bavwil’o mfunu muna kuyivana kuna mvevo mu sadila ampangi zau.
2 E Sikola ya Nkubama ya Uselo i nkubika ambote ivangamanga muna kubika akuluntu ye selo a salu bena vo ampumpa muna tambula mbebe zakaka za salu. Tuka kiayantikila sikola yayi muna mvu wa 1987, 999 za kalasi zivangilu kala muna nsi 140. Muna sikola zazi vioka 22.000 z’ampangi bakubikilu kala. E sikola yayi yaziula mwelo ampwena wa salu kw’ampangi awaya.—1 Kor. 16:9.
3 Mfunu a Sikola Yayi: E Sikola yayi ikubikanga ampangi azikuka muna tambula mbebe mu kwenda sadila konso fulu kina bavwilu o mfunu. E sikola yiwokesanga zayi wau mu kala se ntu mu salu kia samuna nsangu zambote, vungula ekambi yo longa muna nkutakani. Akaka besolwanga se aviti a nzila a espesiale yovo akengi a zunga yo filwa mu zunga yakaka muna nsi zau yovo muna nsi za kinzenza. Akaka bevutukanga muna nkutakani zau yovo kwenda sadila muna zunga ivavanga asadi ayingi.
4 Mu tumingu nana, alongoki betoma fimpululanga Nkand’a Nzambi. Betoma longokanga mambu mayingi ma Nkand’a Nzambi nze salu kia kimvungudi ye mpila ya singikila mambu muna nkutakani. Belongokanga mpe mpila ya kubikila salu, fundisa ye makaka mpe. Belongwanga mpila ambote ya fidila malongi ye kubasadisa muna nungununa kimwanda kiau.
5 Oma Mevavwanga: Kieleka vo, mayingi mevavwanga muna kota mu Sikola yayi. Ana bevavang’o kota sikola yayi bafwete kala ampangi bateka sala e salu kia kikuluntu yovo kiselo mu tezo kia mvu miole. Bafwete kala ampumpa bena ye kimbuta kia mvu 23 yaku 50. Bafwete zaya tanga yo soneka kimputu. Bafwete kala mpe ye vimpi wambote yo lembi solanga madia. Elau diadi divanwanga ntete kw’awana besalanga e salu kia mviti a nzila a ngonde ke ngonde.
6 Awana bekukivananga kuna mvevo bafwete kala bafwana mu sadila konso kuna bavwilu o mfunu. Ediadi divavanga vo bakala nze Yesaya wa ngunza ona wavova vava kakivana kuna mvevo: “Mono oyu; untuma.” (Yes. 6:8) Wasonga mpe lembami muna zingu kiandi. Awana bekotanga mu Sikola ya Nkubama ya Uselo bevanganga wo mu kuma kia zola ampangi zau y’etima dia kubasadila, ke mu kukitundidika ko. Kuna mfoko a nkubama yayi divavwanga vo basadila mawonso balongokanga muna sadisa akaka.—Luka 12:48.
7 Nluta Mia Sikola: Muna tumingu nana, alongoki ‘belongokanga mambu ma lukwikilu y’oma m’elongi diambote.’ (1 Tim. 4:6) Ediadi dikubakubika mu sadisa yo siamisa akaka muna zunga kia nkutakani zau. Muna nkutakani zifilwanga ampangi bakota e Sikola ya Nkubama ya Uselo, e salu kia samuna e nsangu zambote kiwokelanga. Bekasakesanga ampangi bakota mu salu kia kimviti a nzila musungula aleke. Besianga e sungididi muna sadisa wantu ampa ana belungananga ye nkangu a Nzambi.
8 Nga u nkuluntu yovo selo kia salu wampumpa una ye kimbuta kia mvu 23 yaku 50? Ekuma olembi kotela mu Sikola ya Nkubama ya Uselo? Ngeye nleke, nga una y’etima dia sala e salu kia Yave kuna sentu? Ekuma olembi kubamena mu kota mu ‘mwelo wau wampwena wa salu uziukidi’? Dikuvana kiese kiayingi. Vana ntandu, e Sikola ya Nkubama ya Uselo ke yivananga kaka e nsambu kw’awana bekotanga yo ko kansi kwa nkutakani zawonso za nkangu a Nzambi mu nz’amvimba.
[Babu kina muna lukaya lwa 3]
Nkia Nluta Batambula
“E nkubika yayi yawokesa kikilu e salu kiame kia umbangi ye yansadisa mu toma sadilanga Nkand’a Nzambi muna salu kia vungula ekambi.”
“E sikola yampana vuvu kiayingi muna toma lunga-lunganga mbebe zame muna nkutakani.”
“E sikola yasoba zingu kiame kiawonso ye mpila yabadikilanga nkubik’a Nzambi.”
“E sikola yansadisa mu kuyivana mu kwenda sadila konso kuna kuvwil’o mfunu asadi ayingi.”