Fil’elongi Dia Nkand’a Nzambi Dinungunukanga
Kunku kia 5: Zayanga Tezo kia Malongi Melongokwa
1 Yesu vava kalonganga alongoki andi wazayanga tezo kiau, wabavovesanga kaka ‘mana balenda bakula.’ (Maku 4:33; Yoa. 16:12) Diau adimosi mpe omu lumbu yeto, alongi a Diambu dia Nzambi bafwete zayanga e tezo kia mambu melongokwa mun’elongi dia Nkand’a Nzambi. E tezo kia mambu kilenda zayakana muna tezo kia umbakuzi ye ntangwa ya nlongi kumosi ye nlongoki.
2 Kumika Lukwikilu lwa Alongoki: Akaka alongoki muna bakula elongi nanga divavanga vo balongoka dio nkumbu miole yovo mitatu, kansi akaka balenda bakula elongi muna nkumbu mosi. Disundidi o wete twasadisanga nlongoki mu toma bakula malongi ke mu longoka malongi mayingi ko mu kolo kiakete. Konso nlongoki umbakuzi kavwidi mfunu muna kumika lukwikilu lwandi lwampa muna Diambu dia Nzambi.—Nga. 4:7; Roma 12:2.
3 Ekolo ofilanga elongi konso lumingu, sadilang’e ntangwa yafwana mu sadisa nlongoki mu bakula yo yangalela mana kelongokanga muna Nkand’a Nzambi. Venga e fu kia filanga elongi mu nzaki, mpasi vo nlongoki kabak’e nluta mia dina kelongokanga. Kalanga ye ntangwa yafwana mu sasila mambu ma sina yo badika e sono yibongelo malongi.—2 Tim. 3:16, 17.
4 Venga fu kia Vilakesa Elongi: Avo tuvenga e fu kia filang’elongi mu nzaki, tuvenga mpe o vengomoka mun’elongi. Kele vo nlongoki ovovele diambu dia yandi kibeni, tufwete dio mokena kuna mfoko elongi.—Kim. 3:1.
5 Kuna diak’e sambu, e kiese kieto muna ludi kilenda kutufila mu vova kwayingi ekolo tufilanga elongi. (Nku. 145:6, 7) Ezak’e ntangwa ovovang’e nona kulenda twasa nluta kwa nlongoki, kansi e diadi ka difwete vangamanga ntangwa zawonso ko kadi dilenda vengomona nlongoki mu bak’o zayi wakieleka wa Nkand’a Nzambi kelongokanga.
6 Muna filang’e longi muna tezo kia konso nlongoki, tusadisa alongoki a Nkand’a Nzambi mu ‘diatila muna ntemo a Yave.—Yes. 2:5.