Zayi Ufilanga ku Moyo
1 Ekwe kiese kikalanga mu mona wantu betemokanga meso ekolo bezayanga e ludi kia Nkand’a Nzambi! O samuna o zayi wa Nzambi y’ekani diandi mu kuma kia wantu kiese kiayingi ditwasanga. O zayi wau ulenda fila muntu ku moyo a mvu ya mvu.—Yoa. 17:3.
2 Zayi Owu Usundidi: O unu o zayi wa nza mu mpila zayingi uvavilwanga. (Kim. 12:12) Kansi o zayi wau, ke ulendi tezaniswa ko ye “mavangu manene ma Nzambi.” (Mav. 2:11) Nga zayi ulongwanga mu nza ulendanga fila wantu mu finama Mvangi au yo zaya makani mandi? Nga usadisanga wantu mu zaya dina dikutubwilanga vava tufwanga? Nga usadisanga mu zaya ekuma tumwenanga e mpasi? Nga uvananga e vuvu kiakieleka kwa wantu? Nga usadisanga mu tomesa e zingu kia nzo? Ve. Mu zayi wa Nzambi kaka tulenda bakila e mvutu za yuvu yayi yamfunu.
3 O zayi wa Nzambi usadisanga wantu mu kala ye fu yambote ina yilembi monekanga mu nza yayi. Nkand’a Nzambi ukatulanga e fu kia mpambula za makanda, ye se ya nitu yo luzolo lwa nsi muna ntima mi’awana betambulwilanga yo sadila malongi mandi. (Ayib. 4:12) Ufilanga wantu mu yambula mavangu mawonso ma umpumbulu yo “vwata uwuntu wampa.” (Kol. 3:9-11; Mika 4:1-3) Vana ntandu, o zayi wa Nzambi uvananga nkuma kwa wantu ayingi mu venga fu ikendelekanga Nzambi.—1 Kor. 6:9-11.
4 Ekuma Tufwete Vwila o Zayi Wau mu Nzaki: O Nlongi eto Anene okutulukisanga twazaya ekolo eki se tuna. Wazayisa vo e nsangu za mfundis’andi zifwete samunwa mu nza yawonso. (Lus. 14:6, 7) Kristu oyalanga kun’ezulu, Kintinu kia Nzambi kifwasa kintwadi kia nsambila zawonso za luvunu ye tuyalu twawonso twa nza. (Dan. 2:44; Lus. 11:15; 17:16) Muna kuma kiaki, o wantu bafwete zaya o Ntinu a Nzambi, on’oyalanga wau, bafwete vayika muna Babele Anene yo vovelela nkumbu a Yave ye lukwikilu. (Nku. 2:11, 12; Roma 10:13; Lus. 18:4) Yambula twayivana mvimba mu salu kia samuna o zayi ufilanga ku moyo a mvu ya mvu kw’akaka.