Mpila Tatu za Sunzulwila o Nkanda, Kieleka Kelonganga Nkand’a Nzambi

Tala mpila tatu zaleboka za sunzulwila o nkanda, O Nkand’a Nzambi Adieyi Kieleka Kelonganga? (1) yuvula kiuvu mu zaya dina keyindulanga o muntu, (2) tanga sono kia Nkand’a Nzambi kina betela ye ngindu zandi ye (3) songa kapu kiyikanga diambu numokene muna nkanda yo tanga yuvu yina vana lubantiku lwa kapu. Avo muntu osongele luzolo lwambote, olenda kunsonga mpila ya longokela Nkand’a Nzambi muna mokena yandi e tini kiantete. E nsunzula zazi zilenda sadilwa muna nkingula antete yovo muna nkingula yazole.

◼ “Nga wantu balenda zaya Mpungu-ngolo wa Mvangi eto nze una uyikwanga mu Nkand’a Nzambi?” Tanga Mavangu 17:26, 27 yo vingila e mvutu. I bosi songa kapu kia 1. 

◼ “Muna kuma kia zingu kiampasi tuzingang’o unu, nga dilendakana dia solola lufiaulwisu ye vuvu kiyikwanga ovava?” Tanga Roma 15:4 yo vingila e mvutu. I bosi songa kapu kia 2.

◼ “Kele vo una ye wisa kia vanga mambu meyikwanga vava, nga wadi mo vanga?” Tanga Lusengomono 21:4 yo vingila e mvutu. I bosi songa kapu kia 3.

◼ “Nga vekala ye lumbu kin’o wan’eto bevwa e zingu kiyikwanga mu nkunga wau wankulu?” Tanga Nkunga 37:10, 11 yo vingila e mvutu. I bosi songa kapu kia 3.

◼ “Nga obenze vo vekala ye lumbu kilungana mvovo miami?” Tanga Yesaya 33:24 yo vingila e mvutu. I bosi songa kapu kia 3. 

◼ “Nga wakiyuvula kala kana vo afwa bazeye mana bevanganga awana bena moyo?” Vingila e mvutu. I bosi tanga Kimpovi 9:5, yo songa kapu kia 6. 

◼ “Nga vekala ye lumbu tumona diaka azolwa eto afwa, nze una kavova Yesu mu sono kiaki?” Tanga Yoane 5:28, 29 yo vingila e mvutu. I bosi songa kapu kia 7. 

◼ “O luzolo lwa Nzambi nga luvangama ova ntoto nze kun’ezulu nze una tutanganga mu sambu kiaki?” Tanga Matai 6:9, 10 yo vingila e mvutu. I bosi songa kapu kia 8. 

◼ “Nga mu ntangwa yiyikwanga mu ungunza wau tuzingilanga?” Tanga 2 Timoteo 3:1-4 yo vingila e mvutu. I bosi songa kapu kia 9. 

◼ “Ndonga beyuvulanga ekuma e mpasi ziwokelelanga. Nga wayindula kala kana vo edi diyikwanga mu sono kiaki i kuma?” Tanga Lusengomono 12:9 yo vingila e mvutu. I bosi songa kapu kia 10.

◼ “Nga zolele zaya mvutu za kiuvu kiaki?” Tanga Yobi 21:7 yo vingila e mvutu. I bosi songa kapu kia 11.

◼ “Osadila elongi diadi dia Nkand’a Nzambi nga dilenda sadisa wantu mu vwa zingu kia nzo kiakiese?” Tanga Efeso 5:33 yo vingila e mvutu. I bosi songa kapu kia 14.

Avo olongokele Nkand’a Nzambi yo muntu nkumbu miole yo mona vo una ye luzolo lwa longokanga, elongi dilenda kwandi samunwa muna nsangu za salu kia nku-takani.