Salu Kiamfunu Tulenda Sala mu Mvu Ampa wa Salu
1. Nkia salu kia mwanda tulenda sala muna mvu ampa wa salu?
1 Avo tuzolele nungunuka muna mwanda tufwete sikidisa e salu ya mwanda tusala. Nkia salu ya mwanda zolele sala muna mvu ampa wa salu? Sala se mviti a nzila a nsadisi mu ngonde mosi yovo ngonde zayingi, i salu kiamfunu lenda sala. Wau vo e salu kiaki kivavanga vo watoma kubama, eyayi i ntangwa ambote ya kubama. Ekuma fwete kadila y’etima dia sala se mviti a nzila a nsadisi?
2. Ekuma tufwete kadila y’etima dia sala se aviti a nzila a nsadisi?
2 Kuma Tusadila Salu kia Mviti a Nzila a Nsadisi: E salu kia mviti a nzila a nsadisi kikutuvana elau dia yangidika S’eto ezulu ‘una ufwene’ wau vo ntangwa yayingi tusala e salu kia umbangi. (1 Tes. 4:1) Muna badikanga oma kevanganga Yave muna wete dieto, e ntima mieto mikutufilanga mu samuna oma ma yandi kw’akaka. (Nku. 34:1, 2) Yave ozeye yo yangalela e ngolo tuvanganga mu wokesa e salu kia umbangi. (Ayib. 6:10) Wau tuzeye vo Yave tuyangidikanga muna salu kieto, kiese dikutuvananga.—1 Tus. 29:9.
3, 4. Nkia nluta tulenda baka muna sala se aviti a nzila a nsadisi?
3 Vava salanga konso salu nkumbu miayingi, diasazu dikalanga mu sala kio yo twasa kiese kiayingi. O sala ola zayingi muna salu kia umbangi dilenda kusadisa mu kala wavuvama mu mokena yo wantu muna nzo zau. Dikusadisa mpe mu kala ye ndekwa za yantika e moko yo toma sadila Nkand’a Nzambi. Avo kwamanene songa lukwikilu lwaku kw’akaka, dikukumika mpe. Ndonga ke balendanga ko fila elongi dia Nkand’a Nzambi, kansi ekolo bakota mu salu kia mviti a nzila a nsadisi, bayantika fila elongi dia Nkand’a Nzambi.
4 E salu kia mviti a nzila a nsadisi kikumikanga wantu muna mwanda yo kubasadisa mu tambula kiyekwa kia salu yakaka muna nkutakani. Mpangi mosi wayambula e salu kia mviti a nzila a ngonde ke ngonde, vava kabakula vo salu kia nitu kasianga va fulu kiantete, wabaka nzengo za sala se mviti a nzila a nsadisi mu ngonde mosi. Wavova vo: “Yasivika kikilu kadi muna ngonde mosi yasala se mviti a nzila a nsadisi, kimwanda kiame kiakumama! Yabaka e nzengo za zindalala sala se mviti a nzila a nsadisi mu ngonde zayingi. Ediadi diansadisa mu vutukila e salu kia mviti a nzila a ngonde ke ngonde.”
5. Aweyi tulenda sundila ngindu za kuyibadikila vo ke tuafwana ko?
5 Sunda e Nkakalakani: Ateleki akaka bekatisanga mu sala se aviti a nzila a nsadisi. Bebanzanga vo ke bena ye ndekwa zafwana ko mu sala e salu kiaki. Avo i wau obanzanga, Yave olenda kusadisa nze una kasadisa Yeremiya. (Yer. 1:6-10) Kana una vo Mose “nkwa mpov’a wombota, yo lubini lua nkukumi” kakala, Yave wansadila mu lungisa luzolo Lwandi. (Luv. 4:10-12) Avo lukatikisu una lwau mu sala se mviti a nzila a nsadisi, lomba unkabu kwa Yave muna sambu.
6. Ambevo y’awana bena ye salu yayingi aweyi balenda sadila se aviti a nzila a nsadisi?
6 Nga okatisanga sala se mviti a nzila a nsadisi mu kuma kia kimbevo yovo salu yayingi? Kele vo umbevo, ozaya etezo kiaku dilenda kusadisa mu sala se mviti a nzila a nsadisi. Kele vo salu yayingi una yau, nanga lenda yambula salu yakaka ke ina mfunu ayingi ko wa sala yo kusentu. Muna sala se aviti a nzila a nsadisi, ateleki ana besalanga lumbu kia mvimba muna salu ya mfumu zau, besumbanga e ntangwa muna lomba lumbu kimosi yovo lumbu yole ya vundu.—Kol. 4:5.
7. Ekuma dinin’o mfunu dia yikanga etima dia sala se mviti a nzila a nsadisi muna sambu?
7 Aweyi Lenda kio Sadila: Yikanga ekani diaku dia sala se mviti a nzila a nsadisi muna sambu. Lomba kwa Yave kasambula ngolo ovanga mu wokesa uselo waku. (Roma 12:11, 12) Olenda kusadisa mu baka nzengo zambote mu toma kubika e salu yaku. (Yak. 1:5) Kele vo kuna y’etima dia salu kiaki ko, lomba kwa Yave kasadisa kimana wakala yo vema muna salu kia umbangi.—Luka 10:1, 17.
8. O sadila elongi dia Ngana 15:22 aweyi dilenda kusadisila mu sala se mviti a nzila a nsadisi?
8 Esi nzo bafwete mokenanga una balenda sadila se aviti a nzila a nsadisi. (Nga. 15:22) Nanga mosi muna nzo olenda sala se mviti a nzila a nsadisi muna lusadisu lwa esi nzo awonso. Zayisa etima diaku dia sala se mviti a nzila a nsadisi kwa mpangi zakaka muna nkutakani, musungula awana bena vo mambu ma zingu kiau betela mena yo maku. Ediadi nanga dilenda wokesa etima diaku yo sala se mviti a nzila a nsadisi.
9. Nkia ngonde lenda sola mu sala se mviti a nzila a nsadisi?
9 Vava okubika e manaka maku ma salu kia umbangi kia mvu ampa, nga lenda badika mpe e salu kia mviti a nzila a nsadisi? Kele vo lumbu kiamvimba salanga muna salu kia mfumu aku yovo u mwana sikola, lenda badika ngonde zina ye lumbu ya vundu yovo ezi zina ye tumingu tanu. Kasikil’owu, e ngonde Setemba, Desemba, Malusu ye Agosito zivwidi tumingu tanu twamvimba. E ngonde Mayu ma Sabala matanu yina, e ngonde Yuni lumbu tanu ya lumingu yina. Avo umbevo, yindula ngonde zikalanga ye nsungi ambote. Nanga lenda sala se mviti a nzila a nsadisi mu ngonde ina nkengi a zunga kekingula e nkutakani eno. Wau vo muna mvu ukwiza o Luyindulu kia 22 kia ngonde Malusu lukala, e ngonde Malusu, Abidi ye Mayu i ntangwa yambote mu sala se mviti a nzila a nsadisi. Avo solele ngonde ina o sala se mviti a nzila a nsadisi, soneka yo muna manaka ma nkubika zaku za salu. Ediadi dikusadisa mu lungisa ola zilombwanga mu salu kia mviti a nzila a nsadisi.
10. Adieyi lenda vanga kele vo ke dilendakana ko mu sala se mviti a nzila a nsadisi?
10 Kele vo kulenda sala se mviti a nzila a nsadisi ko muna mvu ampa wa salu, lenda sala yo vema kwawonso muna salu kia umbangi. Kwamanana vanga mawonso olenda muna salu kia umbangi, kala ye vuvu vo Yave oyangalela e salu kiaku ekolo okunsadilanga ye nsi a ntima yawonso. (Ngal. 6:4) Yikama yo kasakesa awana besala se aviti a nzila a nsadisi. Nanga lenda singika salu yaku kimana wasalanga yau muna salu kia umbangi mu lumbu yakaka ya lumingu.
11. Ekuma tufwete kadila y’etima dia sala e salu kia umbangi mu nzaki?
11 Nkangu a Yave bazeye wo vo mu lumbu yayi, e nsangu zambote zifwete samunwa mu nzaki. Mioyo mia wantu mu vonza mina, kolo kiakete kaka kisidi. (1 Kor. 7:29-31) O zola muna Yave ye akw’eto kukutufila mu vanga wawonso tulenda muna salu kia umbangi. Muna toma kubama yo vanga e ngolo, tulenda sala se aviti a nzila a nsadisi—kina vo i salu kiamfunu kisalwa mu mvu ampa wa salu!