Kala Y’etima dia Longoka Nkand’a Nzambi yo Muntu
1 “Nusampul’o meso, nwatala yana, ifwene kal’o pemba kwa nsâlu.” (Yoane 4:35) E mvovo miami mia Yesu Kristu milungananga muna mana bewanananga mau Akristu muna salu kia umbangi o unu.
2 Akwa ntima miansongi ana bevavanga longwa e nzila za Yave mu sololwa bena. E ziku kia diambu diadi kimonekanga muna lutangu lw’alongoki ampa bevubwanga konso mvu. Avo zolele longoka Nkand’a Nzambi yo muntu, adieyi ofwete vanga?
3 Kala Y’ekani: Diantete, kala y’etima dia yantika yo longoka Nkand’a Nzambi yo muntu ntangwa zawonso. Sungamena ekani diaku ekolo okwendanga muna salu kia umbangi. Wau vo yeto Akristu twavewa e mbebe ya longa, yo samun’e nsangu zambote, tufwete vava wokesa e salu kieto kia longoka Nkand’a Nzambi yo wantu.—Mat. 24:14; 28:19, 20.
4 Mambu Makaka Tufwete Sungamena: O samba ye ziku kiawonso i diambu diamfunu kw’ateleki a Kintinu. Ntangwa zakaka tusololanga wantu besambanga mu lomba lusadisu lwa zaya e ludi kia Nkand’a Nzambi. Ekwe nsambu tuvwidi za sadilwa kwa Yave mu solola yo longa wantu awaya!—Kan. 2:7; Mav. 10:1, 2.
5 Mpangi mosi wa nkento wasamba mu bak’elau dia longoka Nkand’a Nzambi yo muntu, vana vau wayantika kaya finkanda-nkanda Gostaria de Aprender Mais a Respeito da Biblia? kuna kesadilanga. Vava nkento mosi katambula e finkanda-nkanda yo tanga fio, wayantika soneka vana fulu kilombwanga wantu bazolele elongi dia ngovo dia Nkand’a Nzambi. E mpangi wanzayisa vo ndenda longoka yaku o Nkand’a Nzambi.
6 Ateleki akaka ana bazikuka mu salu kiaki, balenda kusadisa mu lungisa ekani diaku dia longoka Nkand’a Nzambi yo wantu. Lomba kwa Nzambi kasambula e ngolo zaku za solola alongoki a Nkand’a Nzambi yo vwa e nluta mia lungisa ekani diadi. Nanga muna mpila yayi ovwa e kiese kia longa Nkand’a Nzambi kw’akaka.