Nga Oyambulanga dio Vanga?
Adieyi oyambulanga vanga? Soneka e kalati kiaku kia (Instruções e Procuração para Tratamento de Saúde) kiavaikiswa mu kuma kia Mbangi za Yave. Wau vo “kuzeye ko owu ukala e zingu kiaku e mbazi,” diamfunu wateka kibakila e ngangu yo songa muna papela e mpila ya nguka ye mpila za nlongo ozolele baka kele vo vabwidi diambu dia kinsalukisa. (Yak. 4:14; Mav. 15:28, 29) Muna kusadisa mu baka e nzengo zambote e vidio Tratamentos Alternativos à Transfusão: Atendendo às Necessidades e aos Direitos do Paciente yavaikiswa mu kuma kiaki. Tala yo i bosi samba yo fimpulula dina olongokele muna lusadisu lwa yuvu ina vayanda.—Tala: Wau vo e vidio isonganga maka mambu ma lupasu, amase bafwete zaya kana vo balenda tala e vidio yo wan’au yovo ve.
(1) Ekuma akaka muna buka kia awuki (madotolo) befimpulwilang’e diambu dia sadila menga? (2) Yika nona tatu ya lupasu lwampipita lulenda vangwa kondwa menga. (3) Madotolo makwa besonganga luzolo lwa wuka mbevo lembi sadila menga? Ekuma bevangilanga wo? (4) O lufimpu lwavangama muna tupitalu adieyi lusonganga mu kuma kia sadila menga? (5) Nkia vonza kina muna sadilanga menga? (6) Nkia diambu bavova madotolo mamona e nluta walembi sadila e menga? (7) Nki kitwasanga kimbevo kia kondwa menga (Anemia)? Nkia tezo kia kimbevo kia kondwa menga balenda kala kiau? Adieyi dilenda vangama muna sasula kimbevo kia kondwa menga? (8) Adieyi dilenda sadisa e nitu a mbevo mu vutulwisa e menga? (9) Nkia ndekwa zisadilwanga muna lupasu lembi vidisa menga mayingi? (10) Nga mpila zakaka za wuka kondwa menga zilenda sadisa mu wuka yingyana-ngyana yovo nguka zakaka zanzaki zivavanga menga? (11) Nkia nkanikinu wamfunu usonganga e mpila yambote yawuka? (12) Ekuma dinina o mfunu vo Akristu bateka kuyisolelanga e mpila ya nguka yakondwa menga bazolele sadila? Aweyi balenda wo vangila?
O tonda yovo lembi tonda e mpila za nguka zisongelo mu vidio i nzengo za muntu yandi kibeni una ye ntona zalongwa kwa Nkand’a Nzambi. Nga yindwidi kala e mpila za nguka zakondwa menga ozolele sadila kumosi yo wan’aku? Muna zaya makaka mu kuma kia diambu diadi, tala o ntu a diambu, “Yuvu Y’atangi” una mun’Eyingidilu dia kia 15 kia ngonde Yuni 2004 y’Eyingidilu dia kia 15 dia ngonde ya Oktoba ya 2000, ye nkundikilu ya Salu Kieto kia Kintinu kia ngonde ya Novemba ya mvu a 2006, ina yo ntu a diambu vo “Aweyi Mfwete Badikila Ngengele za Menga ye fu kia Sadila Menga Mame mu Wukisa Kimbevo?” Ndiona una vo Mbangi a Yave kafwete zayisa e nzengo kabakidi kwa yitu yandi bena vo ke Mbangi za Yave ko mu zitisa e nzengo zandi y’ekuma kabakidi zo.