Sungamena Lukulu ye Kiese
1, 2. Ekuma tufwete sungamenanga o lukulu ye kiese?
1 Muna lemvokela nkanikinu a Yesu, Akristu mu nza yawonso bekutakana kina kia Sabala kia 22 kia Malusu ya mvu wa 2008, kuna nima ndimuk’a ntangwa, mu yindula lufwa lwa Yesu Kristu. (Luka 22:19; 1 Kor. 11:23-26) Tuvanganga wo ye kiese kiawonso mu kuma kia mawonso mavangama muna lumbu kiakina se vioka mvu 1.975. Muna zindalala ye kwikizi yamu lufwa vana nti a mpasi, Yesu wavelelesa e nkumbu a S’andi yo vana mvutu muna lusembo lwa Satana.—Yobi 1:11; Nga. 27:11.
2 E menga mabunguka ma Yesu masikidisa ekangu diampa yo fwanisa o wantu alembi lunga mu kala se wan’a Nzambi ye vuvu kia yala kumosi yo Kristu muna Kintinu kiandi ki’ezulu. (Yer. 31:31-34; Maku 14:24) Vana ntandu, e nzol’a Nzambi muna wantu yamoneka vava kavana Mwan’andi a nzolwa se kimenga, nze una kavova yandi kibeni Yesu kwa Nikodemo.—Yoa. 3:16.
3. Nkia nluta bebaka awana bekala muna luyindulu?
3 Bokela Akaka: E Salu Kieto kia Kintinu kia ngonde a Yanuali kisonganga vo tufwete sonekanga e nkumbu za wantu ana tulenda bokela. Nga yantikidi kala bokela awana wasoneka e nkumbu? Nga mu kubama una mu sala una ufwene mu mpaika mu buka yiyantika kina kia 1 kia Malusu mu bokela wantu beza ku luyindulu? Awana bekala muna luyindulu, besinga wa elongi dia Nkand’a Nzambi dilenda kumika lukwikilu lwau muna lukulu yo kubafila ku moyo a mvu ya mvu.—Roma 10:17.
4. Ekuma tufwete lwakila ntangw’ambote kuna luyindulu?
4 Ateleki awonso bafwete kubama yo lwaka ola ya mbote mu tambula yo kayisa awana batambulwidi e mboka. Wau vo ndonga yayingi ikalanga muna lumbu kia luyindulu, diamfunu twasianga e sungididi kwa wantu ampa ye akaka ana belungananga ntangwa ke ntangwa.
5. Aweyi olenda kubikila ntim’aku mu kuma kia luyindulu?
5 Kubika o Ntima: E finkanda, Fimpanga e Sono Lumbu Yawonso fia 2008 ye Manaka ma 2008 mena ye sono ya Nkand’a Nzambi ifwete tangwa muna lumingu lwa luyindulu iyantika kina kia 17 kia Malusu. O zaya mambu mana mabwila Yesu muna lumbu yansuka ya zingu kiandi ova ntoto, dilenda kusadisa mu kubika ntim’aku mu kuma kia luyindulu. (Eze. 7:10) O badika mambu mama ma Nkand’a Nzambi ye sambu, dikusadisa mu wokesa o zola kwaku muna Yave ye Mwan’andi ona wavana lukulu.—Nku. 143:5.
6. Nkia nluta tulenda baka muna siang’e ngolo za wokesa kiese kieto muna lukulu?
6 Wau vo lumbu kia luyindulu mu finama kina tufwete kubama yo kubik’akaka muna kolo kiaki kiamfunu. O sungamena luyindulu ye kiese, dilenda kumika e ngwizani eto yo Yave ye Mwan’andi. (2 Kor. 5:14, 15) Ediadi dilenda kutufila mpe mu kubatanginina mu songa nzol’amvevo kw’akaka.—1 Yoa. 4:11.