Tu Mbangi Ntangwa Zawonso
1. Adieyi tulenda longoka muna nona kia Yesu kia sila umbangi kwa nkento vana sima kia maza?
1 Yesu wakangalanga ntangwa zawonso. Wayoyanga yo mon’evwina. Vava alongoki andi bayenda sumba madia, wafonga vana sima kia maza kuna mbanzi a mbanz’a Samaria muna vunda. Yesu kayenda sila umbangi kuna Samaria ko, kansi vioka kaviokanga mu kwenda sila umbangi kuna Ngalili. Kana una vo i wau, wasadila elau dia sila umbangi kwa nkento wayenda teka maza. (Yoa. 4:5-14) Ekuma? Yesu kasidi yambula kala “mbangi akwikizi ye ludi” ko. (Lus. 3:14) Tutangininanga Yesu muna kala Mbangi za Yave ntangwa zawonso.—1 Pet. 2:21.
2. Aweyi tulenda kubamena mu sila umbangi kuna kinsalukisa?
2 Kala wa Kubama: Tulenda kala twakubama mu sila umbangi kuna kinsalukisa, muna natanga e nkanda mieto vava tuvaikanga. Ateleki ayingi benatanga e yinkanda-nkanda vana moko yo kaya yo kw’awana betekanga muna nzo za tekela yima, nzo zatekela piti ye muna fulu yakaka yina tuwanananga yo wantu lumbu ke lumbu. (Kim. 11:6) Mpangi mosi a nkento wakangalanga nkumbu miayingi wasianga e sungididi kia nata Nkand’andi a Nzambi wakete yo nkanda Kelonganga o Nkand’a Nzambi yo yantika e moko ye awana befonganga vana ndambu andi.
3. Aweyi tulenda yantikila e moko?
3 Yantika e Moko: Vava tusilanga umbangi kuna kinsalukisa, ke dina mfunu ko dia yantika moko muna yika oma ma Nkand’a Nzambi. O Yesu kayantika moko ko yo nkento vana sima kia maza muna yika vo yandi i Masia. Maza kaka kanlomba, ediadi diasikamesa luzolo lwa nkento ndioyo mu vav’ozaya mambu makaka. (Yoa. 4:7-9) Mpangi mosi ankento wasadila e ndekwa zazi mu yantikila e moko vava kayuvulwa kana vo kinzi wa luwutuku lwa Yesu kekembelelanga. Vana fulu kia vova vo yandi Mbangi a Yave i kuma kekembelelanga nkinzi wau ko, mpangi wavutula vo: “Mono kibeni yabaka e nzengo zalembi kembelela nkinzi wau.” E mvutu zandi zafila ndiona wanyuvula mu vav’o zaya ekuma kabakila e nzengo zazi, ediadi diaziula e nzila mu kunsila umbangi.
4. E sono kia Matai 28:18-20 ekuma kikukasakeselanga?
4 Kana una vo Yesu wafokola e salu kiandi kia umbangi ova ntoto, wakala ye luzolo vo e salu kiaki kiakwamanana salwa nze una kasadila kio. (Mat. 28:18-20) Muna kuma kiaki, nze Yesu wa Mbandu eto, oyeto tu Mbangi twakubama muna sila umbangi wa lukwikilu lweto kw’akaka ntangwa zawonso.—Ayib. 10:23.