Longa Ateleki Ampa Muna Salu kia Umbangi
1. Aweyi wamona e lumbu kiantete wavaika mu samuna nsangu zambote muna nzo ye nzo?
1 Nga lenda sungamena e lumbu kiantete wavaika mu samuna nsangu zambote muna nzo ye nzo? Nanga wonga ye nsoni wakala zau. Avo nlongi aku a Nkand’a Nzambi wavaika yandi yovo nteleki akaka, ka lukatikisu ko, wakala ye kiese kia tambula lusadisu lwandi. Wau vo u selo kia zikuka, ngeye una ye kiyekwa kia longa ateleki ampa muna salu kia umbangi.
2. Adieyi bafwete zaya ateleki ampa?
2 Ateleki ampa bafwete zaya una balenda yantikila mokena yo wantu muna salu kia umbangi, sadila Nkand’a Nzambi, vutuka kingula akwa luzolo lwambote yo yantika longoka yau Nkand’a Nzambi. Bafwete zaya mpe mpila zakaka za sila umbangi nze muna mpambu za nzila ye muna mazandu. O luludiku ye mbandu aku ilenda kubasadisa mu sila umbangi mu fulu yayi.
3. Aweyi tulenda sadisila ateleki ampa muna mbandu eto?
3 Ubalonga Muna Mbandu Aku: Yesu wasonga kwa alongoki andi una bafwete samunwina e nsangu zambote. (Luka 8:1; 1 Pet. 2:21) Avo zolele vaika yo nteleki ampa muna salu kia umbangi, kubika nsunzula za leboka zina kalenda tanginina. Nanga lenda sadila nsunzula za leboka zina mu nkanda mieto. Ngeye ofwete vova muna nzo yantete yovo yazole kimana nteleki ampa kamona e mpila ovovela. Vava nuvaika muna nzo ina sididi umbangi, olenda yuvula nteleki kasonga diambu diambote kamwene muna nsunzula zaku. Ediadi, disadisa nteleki ampa kabakula o mfunu wa salanga y’akaka muna salu kia umbangi. Dilenda kunsadisa mpe mu tambulwila konso elongi o kumvana yo tanginina nsunzula zaku.
4. Aweyi tulenda sadisila nteleki ampa vava tumona mpila kasididi umbangi?
4 Vana Luludiku: Yesu wavana mpe luludiku kw’alongoki andi lwa mpila balenda samunwina e nsangu zambote. (Mat. 10:5-14) Ngeye mpe lenda sadisa nteleki ampa mu mpila yayi. Avo ntangw’andi a vova ifwene, toma sia e sungididi ekolo kevovanga. I bosi, vava nuvaika muna nzo kasididi umbangi, kana una vo omwene diambu kafwete singika, unsanisina ye ziku kiawonso. Vana fulu kia kunsingika vana vau, lenda kumvana diaka elau muna nzo ilanda. Ediadi dilenda kusadisa mu zaya kana vo tomese nsunzul’andi yovo ve. Dilenda kala vo wonga umvilakese muna nsunzul’antete. Sungamena mpe vo ateleki awonso ke bafwanana ko, e diambu diambote dilenda vovwa mu mpila zaswaswana.—1 Kor. 12:4-7.
5. Adieyi tulenda vova kele vo nteleki ka yuvwidi diambu ko mu kuma kia nsunzula zandi?
5 Ezak’e ntangwa, nteleki ampa lenda kuyuvula dina mwene muna nsunzula zandi. Kansi, avo kavangidi wo ko, olenda kunsadisa. Kala ye ndekwa muna kunsadisa. Ateleki akaka azikuka, beyuvulanga, “nga ndenda kusonga e diambu ofwete singika?” yovo “nga diambu o vilakene muna nsunzula zaku?” Tala e ndekwa zakaka olenda sadila: “Vava yakala nteleki ampa, diampasi diakala mu . . . , kansi yatambula lusadisu lwa. . . . ” Ezak’e ntangwa diambote nwafimpa o nkanda Raciocínios. Kansi, kumvani malongi mayingi ko mu kuma kia diambu dimosi kavilakene muna nsunzula andi.
6. E “sengwa kilengulanga sengwa,” aweyi tulenda sadila ngana yayi muna salu kia umbangi?
6 Sengwa Kilengulanga Sengwa: Timoteo kana una vo nteleki azikuka kakala, Paulu wanwondelela kayivana muna longa yo songa lunungunuku lwandi. (1 Tim. 4:13, 15) Kana una vo se kolo o samunanga e nsangu zambote, kwamanana tomesa mpil’aku ya longa. Tanginina ateleki ana ovaikanga yau, kana nkutu awana ke bena ye ndekwa zayingi ko muna salu kia umbangi, sia e sungididi kia sadisa akaka, musungula ateleki ampa kimana bazikuka nze selo ya nsangu zambote.—Nga. 27:17.