“I Wau Wuwu Nuvanga” O Luyindulu Kina kia 5 kia Ngonde Abidi Lukala
1. Ekuma e lumbu kia luyindulu kina se lumbu kisundidi o mfunu?
1 “I wau wuwu nuvanga muna luyindulu luame.” (Luka 22:19) Muna mvovo miami, Yesu wakanikina alandi andi bayindulanga lufwa lwandi. Muna kuma kia mambu mawonso melungisa o lukûlu, ke vena lumbu kisundidi o mfunu ko kuna kwa Akristu avo ke lumbu kia Luyindulu lwa lufwa lwa Yesu ko. Luyindulu luvangamanga nkumbu mosi muna mvu. Ekolo lumbu kiaki kifinamanga, aweyi tulenda songela luyangalalu lweto kwa Yave?—Kol. 3:15.
2. Aweyi tulenda songela luyangalalu lweto mu kuma kia Luyindulu?
2 Kubama: Tukubamanga mu kuma kia mambu mana tuzeye vo mamfunu kikilu. Tulenda kubika ntima mieto mu kuma kia Luyindulu muna longoka kumosi y’esi nzo eto mambu mabwa mu lumbu yansuka ya zingu kia Yesu ova ntoto yo badika mo. (Eze. 7:10) Eyaka sono yitangwa muna nsungi a luyindulu yina muna manaka ma mvu wa 2012 ye mu nkanda Fimpanga e Sono Lumbu Yawonso. Tusonekene mpe e sono yawonso yitangwa mun’Eyingidilu dia 1 dia Fevelelo 2011, lukaya lwa 23-24 mu kimputu, kumosi ye kapu ya nkanda, O Maior Homem.
3. Aweyi tulenda songela luyangalalu lweto mu kuma kia Luyindulu yo wokesa e salu kieto kia umbangi?
3 Sila Umbangi: Tulenda mpe songa luyangalalu lweto muna kuyivana emvimba mu salu kia umbangi. (Luka 6:45) Tuka kina kia Sabala kia 17 kia ngonde a Malusu, tuyantika vaika mu buka mu kaya e mboka za Luyindulu. Nga olenda kubama mu sala kwayingi mu salu kia umbangi yovo sala se mviti a nzila a nsadisi? Ekuma olembi mokena e diambu diadi y’esi nzo aku muna Fuku wa Nsambila ya Esi Nzo?
4. Nkia nluta tulenda baka muna kalanga muna Luyindulu?
4 Ekwe nluta tubakanga muna kalanga muna Luyindulu konso mvu! E kiese yo zola kweto muna Nzambi kuwokelanga ekolo tubadikanga e nzol’amvevo kasonga o Yave muna vana Mwan’andi amosi se lukûlu. (Yoa. 3:16; 1 Yoa. 4:9, 10) Ediadi dikutufilanga mu zinga ke mu kuma kieto kaka ko, kansi mu kuma kia Nzambi. (2 Kor. 5:14, 15) Dikutufilanga mpe mu kembelela Yave vana fulu kia ndonga. (Nku. 102:19-21) Kieleka, selo ya Yave belakukilanga o moyo e lumbu kia Luyindulu kina kia 5 kia ngonde Abidi, kadi bekala ye lau dia “teleka lufwa lua Mfumu.”—1 Kor. 11:26.