Sadila Tratado Muna Samuna Nsangu Zambote
1. E tratado aweyi zisadilwanga kwa nkangu a Nzambi?
1 E tratado se kolo zayantikwa sadilwa kwa Mbangi za Yave mu samuna e nsangu zambote. Muna mvu a 1880, mpangi C. T. Russell ye akundi andi, bayantika vaikisa tratado za Bibles Students’ Tracts (Alongoki a Nkand’a Nzambi), i bosi bavananga zo kw’awana batanganga Eyingidilu muna kayanesa zo kwa nkangu. Muna mvu a 1884 e tratado zabadikilwanga vo zamfunu kikilu vava mpangi C. T. Russell kasikidisa e salu kia mvevo y’ekani dia nungununa e nsangu za Kintinu. O mvovo “tratado” wasiwa muna nkumbu a Sociedade de Tratados da Torre de Vigia de Sião iyikilwanga owau vo Sociedade Torre de Vigia de Bíblias e Tratados de Pensilvânia. Muna mvu a 1918, vioka 300 za mafuku (300 milhões) ma tratado zakaywa kwa alongoki a Nkand’a Nzambi. Yamuwau e tratado zina se sadilwa kiamfunu muna sila umbangi una ufwene.
2. Ekuma tratado zinina se sadilwa kiamfunu?
2 Ekuma Zinina se Sadilwa Kiamfunu: E tratado zituntanga e sungididi kia wantu. E nsangu zina muna tratado zazi zisimbanga e ntima mia wantu. Ziyangidikanga awana ke bezolanga tanga Eyingidilu ye Despertai! ko yovo nkanda miakaka. E tratado ke zikalanga mpasi ko mu kaya zo kana nkutu ateleki ampa ye yingyana-ngyana balenda zo kaya. Vana ntandu, ke zina mpasi ko mu nata yo lunda zo.
3. Yika e nona kisonganga o mfunu wa tratado?
3 Ndonga, balongoka e ludi muna lusadisu lwa tratado. Muna bong’enona, nkento mosi kuna Haiti wanona tratado muna nzila. Vava katanga yo wavova vo: “Ekiaki i ludi kikilu!” I bosi, wayenda kun’Eseka dia Kintinu yo yantika longoka o Nkand’a Nzambi yo vubwa. O lunungunuku lwa nkento ndioyo lusonganga o nkuma wa Nkand’a Nzambi muna lusadisu lwa tratado.
4. Adieyi i kani dieto vava tukaya e tratado muna konso ngonde?
4 Muna Nzo ye Nzo: Wau vo e tratado sadilwa kiamfunu muna sila umbangi, zikala kaywa konso ngonde tuka kuna lubantiku lwa ngonde a Novemba. Ekani dieto ke kaya kaka tratado ko kansi tusadila zo muna yantika moko yo wantu. Avo muntu osongele luzolo lwambote muna nkingula yantete yovo vava tuvutukila ku nkingula, tulenda kunsonga una tulongokelanga o Nkand’a Nzambi yo wantu muna sadila o nkanda, Kelonganga Nkand’a Nzambi yovo kanda wakaka. Aweyi tulenda kayila tratado muna salu kia nzo ye nzo? Konso tratado yivwidi mambu maswaswana, muna kuma kiaki tufwete toma zaya mana mena muna tratado tukaya.
5. Aweyi tulenda kayila tratado muna salu kia nzo ye nzo?
5 Tufwete sadilanga e nsunzula zina e betela ye nsatu za wantu tumokenanga yau muna zunga kumosi ye tratado tukaya. Tulenda yantika e moko muna vana tratado kwa muntu tumokenanga yandi. O ntu a diambu wa tratado ulenda tunta e sungididi kia muntu. Muna kuma kiaki, tulenda songa tratado zayingi kwa muntu kimana kayisolela ina inyangidikidi. Vava tusadilanga mu zunga kina o wantu ke bezolanga ko vo twakota muna nzo zau, tulenda simba tratado yo kubasonga o ntu a diambu yovo tulenda kubalomba o nswa wa sisa yo kuna nsi a kielo kiau. I bosi tulenda kubalomba batusonga e ngindu zau mu kuma kia diambu divovelo muna tratado yoyo. Avo ntu a diambu mu mpila kiuvu una, tulenda kunlomba kasonga e ngindu zandi mu kuma kia kiuvu kiokio. Tulenda mpe vanga kiuvu kiakaka muna tunta e sungididi kiandi yo yantika e moko. I bosi, tulenda tanga tratado yo muntu yo vunda vana fulu kina e kiuvu yo kunlomba kasonga e ngindu zandi. E sono ya sina ya Nkand’a Nzambi ilenda tangwa. Vava tufokola e moko, diambote twavanga nkubika muna vutukila kunkingula. Avo e nkutakani isisanga e nkanda muna nzo ke yiwanukanga muntu ko, tulenda sisa tratado vana fulu kitoma monekanga avo muntu kena ku nzo ko.
6. Aweyi tulenda sadila e tratado vava tusilanga umbangi muna nzila?
6 Sila Umbangi Muna Nzila: Nga o sadilanga tratado vava o silanga umbangi muna nzila? Awana beviokanga, mu nswalu bekalanga ye ke bezolanga ningama ko mu mokena yeto. Muna kuma kiaki, dilenda kala diampasi mu zaya awana bena ye luzolo lwambote. Vana fulu kia kubavana Eyingidilu ye Despertai! tulenda kubavana tratado wau vo ke tuna ye ziku ko kana vo tanga betanga yo. Wau vo e tratado zivwidi mambu mamfunu maleboka, zilenda tunta e sungididi kia muntu yo kumfila mu tanga zo kana nkutu vo kena ye ntangwa yayingi ko. Kansi, avo muntu kena mu nswalu ko tulenda mokena yandi mambu mena muna tratado.
7. Yika e nona yisonganga una tulenda sadila tratado vava tusilanga umbangi kuna kinsalukisa.
7 Sila Umbangi Kuna Kinsalukisa: Ke diampasi ko mu sadila tratado mu sila umbangi kuna kinsalukisa. Mpangi mosi, onatanga tratado zakete muna posi kiandi vava kevaikanga. Vava kewanananga yo muntu muna nzo za tekela, okumvananga e tratado. Vava mpangi mosi yo nkaz’andi bayenda mu nkangalu kuna Mbanza Nova York, basungamena vo bewanana yo wantu ayingi batuka muna nsi zakaka. Muna kuma kiaki, banata e finkanda, Todas as Nações ye tratado zayingi muna ndinga zaswaswana. Konso muntu bawanga wavovanga e ndinga kinzenza, diakala muna nzila yovo mu nzo zatekela madia, bamvananga e tratado muna nding’andi.
8. Mu nkia mpila e tratado zinina nze mbongo?
8 Kuna e Mbongo: E tratado zina nze mbongo. O mvati a nsengo okunanga mbongo yayingi kadi kezayanga ko ina yimena yo vangama. Muna Kimpovi 11:6 tutanganga vo: “E menemene kuna mbongo, o masika kuvweni ko: kadi kuzeye wo ko eyi ivangama, yovo yayi yovo yayina, yovo yau ayole yavangama kumosi.” Muna kuma kiaki, tufwete ‘mwanganesanga o zayi’ muna sadilanga e sadilwa kiaki kiamfunu mu sila o umbangi.—Nga. 15:7.
[Mvovo mia Sina muna lukaya lwa 3]
Wau vo e tratado sadilwa kiamfunu muna sila umbangi, zikala kaywa konso ngonde tuka kuna lubantiku lwa ngonde a Novemba