Nga Olenda Sala se Mviti a Nzila a Nsadisi?
1. Ekuma nsungi a Luyindulu inina se nsungi ambote mu wokesa e salu kieto kia umbangi?
1 Nsungi a Luyindulu i nsungi ambote muna wokesa e salu kieto kia umbangi. I ntangwa tuyindulanga o zola kwampwena katusonga o Yave muna vana Mwan’andi se lukûlu. (Yoa. 3:16) Ediadi diwokesanga luyangalalu lweto muna dina Yave kavanga mu kuma kieto, diwokesanga mpe etima dieto dia zaisa oma ma Yave kwa akaka ye mana kevanganga mu kuma kia wantu. (Yes. 12:4, 5; Luka 6:45) Muna nsungi yayi mpe tuvaikanga mu buka mu bokela wantu mu zunga kieto beza lungana yeto muna Luyindulu. Muna kuma kiaki, tufwete vanga ngolo mu wokesa etima dia awana besonganga luzolo lwambote. Nga olenda wokesa salu kiaku kia umbangi muna sala se mviti a nzila a nsadisi mu ngonde a Malusu, Abidi, ye Mayu?
2. Ekuma ngonde a Malusu ikadila se ngonde a mfunu mu sala salu kia kimviti a nzila a nsadisi?
2 Kitula Ngonde a Malusu se Ngonde a Mfunu: E ngonde a Malusu ikala se ngonde a mfunu mu sala salu kia kimviti a nzila a nsadisi. Awana besala e salu kiaki balenda sola sala ola 30 yovo 50. Avo nkingula ya nkengi a zunga nukala yau muna ngonde a Malusu, aviti a nzila a nsadisi balenda kala muna lukutakanu lwa nkengi a zunga ye aviti a nzila a ngonde ke ngonde ye a espesiale. E salu kia mpaika mu buka muna kaya e mboka za Luyindulu lukala kina Kiazole, 26 kia Ngonde a Malusu a mvu 2013, kiyantika kina kia 1 kia Malusu. Ediadi disongele vo tukala ye ntangwa yayingi mu sala e salu kiaki ke mu mvu miavioka ko. Vana ntandu, e ngonde a Malusu tumingu tanu ina. Ekuma olembi vangila e nkubika mu kitula e ngonde a Malusu se ngonde a mfunu mu mvu?
3. Aweyi tulenda vangila nkumbika mu wokesa salu kieto kia umbangi?
3 Vanga Nkubika Owau: Eyayi i ntangwa ofwete kubama mu vanga konso dina olenda muna sala e salu kia kimviti a nzila a nsadisi. Ovanga nkubika kumosi ye esi nzo mfunu kikilu dina, muna kuma kiaki, vava nukala yo fuku wa Nsambila ya Esi Nzo nuvaula ntangwa mu mokena dina luna yindula mu sala e salu kiaki yo vanga e nkubika. (Nga. 15:22) Avo kulenda sala salu kia kimviti a nzila a nsadisi ko, ku kendalala ko. Nga olenda vanga e nkubika una nsungi yayi ke yafwene ko mu sala e salu kiaki? Nga olenda kudikila e lumbu osalanga e salu kia umbangi?
4. Nkia nluta tuvwa avo tuwokesa salu kieto kia umbangi muna ngonde a Malusu, Abidi ye Mayu?
4 Avo tuwokesa salu kieto kia umbangi muna ngonde a Malusu, Abidi ye Mayu, tuwokesa mpe kiese kieto yo luyangalalu muna sadila Yave yo vana mpe akaka. (Yoa. 4:34; Mav. 20:35) E diambu disundidi o mfunu, i zaya vo e ngolo tuvanga mu sala e salu kiaki Yave ziyangidika.—Nga. 27:11.