Yinkanda-nkanda Yasobelo e Mpwa
1. Nkia sadilwa yamfunu ya salu kieto kia umbangi yisobelo e mpwa?
1 Tratado tanu zampa zasunzulwa muna Lukutakanu lwa Mvivu lwa Mvu a 2013 lwakala yo ntu a diambu vo: “Diambu dia Nzambi i Ludi!” Vana ntandu, twatambula mpe Nsangu za Kintinu No. 38 zina yo ntu a diambu vo: “Amafwa nga Balenda Zinga Diaka?” fiakudikilu mpe muna tratado zazi. Zau sambanu, zasobelo e mpwa. Ekuma? Aweyi tulenda lungisila ekani zasobelwa vava tukaya zo muna salu kia nzo ye nzo?
2. Adieyi i kani diakubikilu yinkanda-nkanda yampa?
2 Ekuma Yisobelo e Mpwa?: Nkumbu miayingi muna sadila nsunzula zambote muna salu kia nzo ye nzo, divavanga vo twalungisa mambu yá malende: (1) Muna yantika e moko, yuvula dina muntu keyindulanga. (2) Songa dina sono ya Nkand’a Nzambi ivovanga. (3) Vana finkanda-nkanda kwa muntu katanga. (4) Yuvula e kiuvu ovanina e mvutu muna nkingula ilanda, i bosi nuwizana e lumbu ovutuka kunkingula. E yinkanda-nkanda yampa yakubikilu mu mpila ilenda kutusadisila mu lungisa mambu mama mawonso.
3. Aweyi tulenda kayila fimosi muna yinkanda-nkanda yayi muna salu kia umbangi?
3 Una Tulenda yo Sadila: (1) Vava okayisa muntu, unsonga kiuvu kina vana ntwala finkanda-nkanda, i bosi unlomba kasonga e ngindu zandi. (2) Ziula finkanda-nkanda i bosi nubadika dina ‘Nkand’a Nzambi Uvovanga.’ Avo ntangwa ina, tanga sono muna Nkand’a Nzambi. Avo muntu una ye ntangwa yafwana, nubadika e ‘Nluta Dilenda Kuntwasila.’ (3) Umvana e finkanda yo kunkasakesa katanga fio vava kekala ye ntangwa. (4) Una kwansisidi ko, unsonga kiuvu kina vana yanda fintu fia diambu, “Kiuvu Olenda Badika,” i bosi nuwizana e lumbu nubadika e mvutu za Nkand’a Nzambi muna nkingula ilanda.
4. Aweyi tulenda sadila tratado zampa vava tuvutukanga kingula wantu?
4 Ke diampasi ko mu yantika moko vava ovutuka kingula muntu. Sadila e sono ina vana lukaya lwansuka lwa finkanda-nkanda muna vana e mvutu za kiuvu wasisa muna nkingula yansuka. Una kwansisidi ko, unsonga fwaniswa kia finkanda Nsangu Zambote kina mu finkanda-nkanda, i bosi unsonga e finkanda fiafi y’elongi dina e betela ye diambu numokene yo kumvana e finkanda. Avo otambulwidi, vanga e nkubika kimana nwamokena muna finkanda fiafi muna nkingula ilanda. Avo ovangidi wo, disonga vo oyantikidi elongi dia Nkand’a Nzambi. Yovo vana fulu kia kumvana e finkanda, olenda kumvana tratado yankaka yo vanga e nkubika mu badika yo muna nkingula ilanda.
5. Nkia mfunu zina e tratado muna salu kieto kia umbangi?
5 Mvu 130 miviokele kala tuka twayantikila sadila e tratado muna salu kieto kia umbangi. Kana una vo e mpwa tratado zazi isobwanga, zina se sadilwa kiamfunu muna sila umbangi una ufwene. Yambula twatoma sadilanga yinkanda-nkanda yayi yampa muna mwanganesa o zayi wa Nkand’a Nzambi mu nza yawonso.—Nga. 15:7a.