Muna Zaya Mbote ye Mbi: Bibila i Mfidi Ambote

LULUDIKU LUNA TUVUIDI O MFUNU

Muna Bibila, Yavea wa Nzambi osasilanga vo wantu luludiku lwandi bavuidi o mfunu ye ke balendi kuyifila yau kibeni ko. (Yeremiya 10:23) Muna kuma kiaki, Yave watuvana tuludiku mu kuma kia fu ya nkal’ambote muna Bibila. Nzambi otoma zolanga o wantu ye kazolele ko vo twabaka nzengo zambi ezi zikututwasila e mpasi ye mfwilu muna zingu kieto. (Nsiku 5:29; 1 Yoane 4:8) Edi disundidi o mfunu, o Mvangi eto ovuidi ngangu ye zayi wayingi muna kutuvana konso luludiku lwa fu ya nkal’ambote. (Nkunga 100:3; 104:24) Kansi, Nzambi ke komekenanga wantu ko mu lemvokela nkanikinu miandi.

Yave wavana kwa yakala yo nkento antete, Adami yo Eva mawonso bavuanga o mfunu kimana bakala ye kiese kiakieleka. (Tuku 1:28, 29; 2:8, 15) Wabavana mpe nkanikinu miakiá mina kavingilanga vo balemvokela. Kansi wayambula vo yau kibeni basola kana vo belemvokela nkanikinu miami yovo lembi mio lemvokela. (Tuku 2:9, 16, 17) Diankenda vo, Adami yo Eva basola lemvokela nkanikinu mia yau kibeni, vana fulu kia lemvokela nkanikinu mia Nzambi. (Tuku 3:6) Nkia mfwilu ditwasanga? Nga wantu zingu kiakiese bekalanga kiau vava bevanganga konso diambu beyindulanga vo diansongi muna mbweno zau? O lusansu lusonganga vo olembi lemvokela nkanikinu mia Nzambi ke ditwasanga luvuvamu ye kiese kiakwele mvu ko.—Kimpovi 8:9.

Bibila kikutuvananga malongi mana tuvuanga o mfunu muna baka nzengo zambote, kiakala nkia fulu twawutukila. (2 Timoteo 3:16, 17; tala e babu “Nkanda wa Wantu Awonso.”) Tala una e Bibila kivangilanga wo.

Tala e kuma Bibila kilenda yikilwa vo “diambu dia Nzambi.”—1 Tesalonika 2:13. Tala e video Nani i Nsonekesi a Bibila? muna jw.org.

BIBILA KIKUTUVOVESANGA MANA NZAMBI KAZOLELE VO TWAVANGA

E Bibila kikutuvovesanga una Nzambi kekadilanga yo wantu tuka kuna lubantiku. Kikutusadisanga mu zaya mana Nzambi kebadikilanga vo mambote ye mambi, mambu malenda twasa nluta ye mfwilu. (Nkunga 19:7, 11) Mana tulongokanga muna Bibila, ntangwa zawonso maludi kaka mekalanga ye mekutusadisanga mu landa fu ya nkal’ambote muna mambu ma zingu kieto kia lumbu ke lumbu.

Kasikil’owu, tala lulukisu lwa Ngana 13:20: “Ndiona okangalanga ye nkwa ngangu okala ye ngangu, kansi o nkundi a mazowa mpasi kemona.” O nkanikinu wau wamfunu kikilu o unu nze una wakadila o mfunu kuna nz’ankulu. E Bibila kiazala ye nkanikinu miami miamfunu ye miambote.—Tala e babu “Malongi ma Bibila Makinu o Mfunu.”

Kansi, nanga olenda yuvula: ‘Aweyi ndenda kadila ye ziku vo malongi ma Bibila mu kuma kia fu ya nkal’ambote malenda kunsadisa o unu?’ E longi dilende divovela nona ya wantu bavua e nluta muna lemvokela nkanikinu mia Bibila.