Yuvu ya Atangi
Nga e mvovo “okubatanina” wasonama muna Nkunga 12:7 “minkondwa asadisi” uyikanga (tini kia 5) yovo “mvovo mia Yave” uyikanga (tini kia 6)?
E tini ivitidi isonganga vo e mvovo miami wantu miyikanga.
Muna Nkunga 12:1-4, tutanganga vo “Minkwikizi basukidi vana vena wantu.” I bosi, muna Nkunga 12:5-7 tutanganga vo:
“‘Muna kuma kia mpasi zimweswanga minkondwa asadisi,
Muna kuma kia bumu ki’asukami,
Se yatelama yo vanga diambu,’ u kavovele o Yave.
‘Ikubavuluza vana moko m’awana bekubasakanenanga.’
E mvovo mia Yave miavelela;
Mina nze palata yakenzelwa muna fûlu dia ntoto, yakenzwa nkumbu nsambwadi.
Okubatanina, e Yave;
Otanina konso muntu muna yau tuka muna mbandu yayi yamu mvu ya mvu.”
E tini kia 5 kivovanga dina Nzambi kevanga mu kuma kia “minkondwa asadisi.” Okubavuluza.
E tini kia 6 kikudikilanga vo “e mvovo mia Yave miavelela” ‘nze palata yakenzwa.’ E zazi i ngindu za Akristu ana bakiyekola emvimba.—Nku. 18:30; 119:140.
Owau tala e tini kilende, Nkunga 12:7: “Okubatanina, e Yave; otanina konso muntu muna yau tuka muna mbandu yayi yamu mvu ya mvu.” O mvovo “yau,” aki nani uvovelanga?
Wau vo e tiki kia 6 kivitidi e tiki kia 7 “mvovo mia Yave” kivovelanga, akaka balenda vova vo o mvovo “yau,” mvovo mia Nzambi uyikanga. Tuzeye wo vo Nzambi olundanga e Bibila ekolo atantu ayingi bevanganga e ngolo mu fwasa kio.—Yes. 40:8; 1 Pet. 1:25.
Kansi, dina divovanga e tini kia 5 dialudi mpe. Yave osadisanga yo kwamanana sadisa yo vuluza “minkondwa asadisi” ye awana “bebangikwanga.”—Yobi 36:15; Nku. 6:4; 31:1, 2; 54:7; 145:20.
Muna diadi, o mvovo “yau” muna tini kia 7, aki nani uyikanga?
O mambu mena mu nkunga wau mesonganga vo o mvovo “yau” wantu kikilu uyikanga.
Muna Nkunga 12:1 Davidi wavovela “minkwikizi” ana bayikama yimpumbulu. I bosi, tutanganga vo Yave otelama muna tumba awana besadilanga lubini lwau mu mpila yambi. O ntozi a nkunga okutusikidisanga vo tulenda kweto kala ye vuvu vo Nzambi ovanga diambu muna wete dia nkangu andi, kadi e mvovo miandi miavelela.
Muna diadi, e tini kia 7 kivovanga vo Yave okubalunda ye “okubatanina,” i sia vo, awana bemweswanga e mpasi kwa yimpumbulu.
O mvovo “okubatanina” mu sono ya Masoretico ya Kiyibere watuka. E sono ya Septuaginta ya Kingerekia nkumbu miole ya sadila o mvovo “yeto” muna tini kia 7. Ediadi disongele vo minkwikizi ana bemweswanga e mpasi yo sakanenua kivovelanga. I bosi, e tini kia 7 kivovanga diaka vo “konso muntu muna” minkwikizi betaninua “muna mbandu yayi” iwokesanga umpumbulu. (Nku. 12:7, 8) Muna sono ya Targuns ya Ki-ramati e tini kia 7 kivovanga vo: “E MFUMU, otanina ansongi, okubatanina muna mbandu yayi yambi yamu mvu ya mvu. E yimpumbulu bekwendanga muna fulu yawonso, nze muntudia ofibanga menga ma wan’a wantu.” Ediadi i ditoma songanga e ziku vo Nkunga 12:7 ke kivovelanga mvovo mia Nzambi ko.
Kieleka, e sono kiaki vuvu kivananga kwa “minkwikizi,” i sia vo, Nzambi diambu kevanga muna wete diau.