Nga Ozeye?
Nga dialudi vo kuna nza nkulu wantu bakunanga mbongo ambi muna mpatu a muntu ankaka?
E kopi diadi dia nkanda Digest wasonekwa kwa Justiniano umosi muna nkanda misonganga oma ma nsiku mia nz’ankulu
MUN’OWU wa sono kia Matai 13:24-26, Yesu wavova vo: “E Kintinu kia zulu kilenda tezaneswa yo muntu okunini mbongo ambote muna mpatu andi. Ekolo wantu balele, mbeni andi wizidi, okunini mbongo ambi vana vena masa, wele kwandi. Vava masa makudidi yo yima e mbongo, e mbongo ambi mpe imonekene.” Asoneki ankaka a lusansu bekatikisanga vo e kingana kiaki ke kialudi ko. Kansi, nze una usonganga nkanda wankulu wa nsiku mia Roma, e diambu nze diadi diavangamanga.
Disionario dimosi dia Nkand’a Nzambi divovanga vo muna nsiku a Roma, avo muntu okunini mbongo ambi muna mpatu a muntu mu vava kunlanda e kunda, wabadikilwanga vo kimpumbulu. Wau vo vakala yo nsiku wasimanga e vangu diadi, disongele vo vangama kikilu diavangamanga. Alastair Kerr wa nkwa ngangu wasasila vo muna mvu wa 533 vitila Kristu, o Justiniano wa Ntinu a Roma, wavaikisa nkanda mosi wayikilwanga vo Digest. O nkanda wau wasonganga mambu makala muna nsiku a Roma ye mwakala mpe ye mvovo mia awana balongokanga e nsiku tuka muna mvu wa 100 yakuna mvu wa 250 ku nima lufwa lwa Nkristu. Landila o nkanda wau, mosi muna wantu awaya, i Ulpian, ona wayika diambu dia mpila yayi diavangama muna tandu kiazole. Mbongo ambi yakunwanga mu mpatu a muntu ankaka ye kani dia fwasa e mbongo muna mpatu. O nkanda Digest uyikanga o nswa kakala wau o mvati a nsengo wa lomba e nzimbu kwa muntu ofwasidi e mbongo muna mpatu andi.
E mambu mama mavangamanga muna zunga yayalwanga kwa Roma kuna nz’ankulu. Ediadi disonganga vo dina Yesu kavova muna kingana kiandi diavangamanga kikilu.