Vava kakituka se mbuta, Yosiya wa Ntinu wayantika vangulula e tempelo. Muna kolo kiakina, “nkand’a Nsiku a Yave una kavana kwa Mose” wasoloka. Vava nkanda wau watangwa, o Ntinu wabaka e nzengo za lemvokela mana kawá. (2 Tus. 34:14, 19-21) Nga ozolele tanga e Bibila lumbu yawonso? Avo ovanganga wo kala, nga obakanga e nluta? Nga osianga sinsu muna sono ilenda kusadisa? Vava kakala ye kimbuta kia mvu 39, Yosiya wa Ntinu wavanga vilwa owu wantwasila lufwa. Wakibunda e vuvu vana fulu kia vava luludiku lwa Yave. (2 Tus. 35:20-25) Adieyi tulenda longoka muna nona kiandi? Kiakala vo tu aleke yovo tu ambuta, yovo se kolo tulongokanga Bibila, tufwete kwamanana vava luludiku lwa Yave. Tufwete sambanga ntangwa zawonso, longokanga Diambu dia Nzambi yo vavanga lusadisu lwa Akristu azikuka. Muna mpila yayi, diampasi dikala mu vanga vilwa wampwena ye tukala ye zingu kiakiese.—Yak. 1:25. w23.09 12 ¶15-16

Bibila kivovelanga akento ayingi ana bazolanga Yave yo kunsadila. Akento awaya basonga vo “akwa volo muna fu yau” ye “akwa kwikizi muna mambu mawonso.” (1 Tim. 3:11) Vana ntandu, mpangi bena vo ndumba balenda solola mpangi zamakento azikuka muna nkutakani ana balenda tanginina. Yeno ampangi nuna vo ndumba, nuyindula mpangi zamakento ana besonganga mbandu ambote ye nutanginina e mbandu au. Nusia e sungididi muna fu yau yambote, i bosi nuvava zaya una nulenda yo songela muna zingu kieno kia lumbu ke lumbu. E fu kiamfunu kafwete songa o Nkristu azikuka i lulembamu. Avo nkento nlembami, okala ye ngwizani ambote yo Yave ye ampangi muna nkutakani. Muna bonga e nona, o nkento ona ozolanga Yave, kuna lulembamu lwawonso olemvokelanga nkanikinu a kintu una Se diandi dia zulu kasikidisa (1 Kor. 11:3) E sono kiaki kisasilanga kana aki nani Yave kavana e kiyekwa kia twadisa e nkutakani ye nzo. w23.12 18-19 ¶3-5

Yave ovingilanga vo yakala ona wasompa kazolanga o nkaz’andi, katoma kunlunga-lunganga tuka muna kinitu yamuna kimwanda. O yima e fu nze, zitisa o nkento aku yo kumbunda e vuvu, dikusadisa mu kala se yakala diambote vava okazala. Avo osompele, nanga okituka se. Nkia mambu olenda longoka muna Yave mana mekusadisa mu kala se diambote? (Efe. 6:4) Yave wavovesa Yesu wa Mwan’andi vana meso ma ndonga vo otoma kunzolanga ye kunyangalela. (Mat. 3:17) Avo okitukidi se, kukadi ye nsoni ko mu vovesa wan’aku vo otoma kubazolanga. Ubasanisinanga muna mambu mambote bevanganga. Mase ana betangininanga mbandu a Yave, besadisanga wan’au mu kituka se Akristu azikuka. Olenda kubama tuka owau muna lungisa kiyekwa kiaki kuna sentu. Olenda wo vanga muna zolanga e yitu yaku yo toma lunga-lunga ampangi muna nkutakani. Kukadinge ye nsoni ko muna kubavovesa vo otoma kubazolanga yo kubavua o mfunu.—Yoa. 15:9. w23.12 28-29 ¶17-18