Luvaiku
27 “Vanga ziku dia mabaya ma akasia;+ difwete kala ye yinkoso* tanu muna lambuka, yinkoso tanu muna yalumuka. E ndambu zau yá za ziku zifwete kala zafwanana, difwete kala ye yinkoso tatu muna zanguka.+ 2 Vanga mpoka+ yá muna konko yá ya ziku; zifwete kala zalamama vana ziku, e ziku lenga dio e nsongo.+ 3 Vanga yinzu ya katulwila ntoto ampolo* a ziku, vanga mpe pawu, pidi yanene, nsoma ye lekwa ya natina tiya; e salanganu yawonso ya ziku vangila yo mu nsongo.+ 4 Vanga yangilwa kia nsongo mu kuma kia ziku, sia nlunga nyá mia nsongo muna yangilwa, muna konko yandi yau yá. 5 Tula e yangilwa muna kati, kuna nsi a mvinda wazieta e ziku. E yangilwa kifwete lwaka yavana katikati kwa ziku. 6 Vanga mbindi zole muna mabaya ma akasia mu kuma kia ziku, lenga mio e nsongo. 7 E mbindi zazi zifwete koteswa muna nlunga, kimana vava e ziku dinatwa, e mbindi zakala muna ndambu zole za ziku.+ 8 Ovangila e ziku nga nkela yakondwa fukwa ye sina, vangila yo muna mabaya. Vangila e ziku muna mpila ina isongele kuna mongo.+
9 “Vanga yanzala kia saba.+ Kuna ndambu a sude, e yanzala kikala ye rido ya nsinga miasietwa mia lino yambote, e ndambu yoyo ikala ye yinkoso 100.+ 10 Ikala yo malunzi 20 ye telamesenua 20 ya nsongo. E vakikilwa muna malunzi ye yikakeselwa* yau ifwete kala ya palata. 11 Kuna ndambu a node kukala mpe ye rido ya yinkoso 100 muna lambuka, kumosi ye malunzi mandi 20 ye telamesenua yandi 20 ya nsongo, e vakikilwa ye yikakeselwa* ya malunzi ifwete kala ya palata. 12 Kuna ndambu a weste kukala ye rido mu kuma kia yinkoso 50 ma yalumuka kwa yanzala, kukala ye malunzi kumi ye telamesenua kumi. 13 O yalumuka kwa yanzala kuna ndambu a este, kuna kuvaikilanga e ntangwa, yinkoso 50. 14 Kuna koko kwalunene kwa mwelo a yanzala, kukala ye rido ya yinkoso 15, malunzi tatu ye telamesenua tatu.+ 15 Kuna koko kwalumonso kwa mwelo a yanzala, kukala ye rido ya yinkoso 15, malunzi tatu ye telamesenua tatu.
16 “O mwelo a yanzala ufwete kala ye rido ya yinkoso 20 muna lambuka, yavangilwa muna nsinga mia bule, nsinga mia mika mia se kia nduwa, nsinga mia mbwaki akongola* ye nsinga miasietwa mia lino yambote,+ ufwete kala ye malunzi yá ye telamesenua yá.+ 17 Malunzi mawonso mezunga e yanzala mekala ye yikakeselwa ya palata ye vakikilwa ya palata, kansi e telamesenua ifwete kala ya nsongo.+ 18 O lambuka kwa yanzala kufwete kala kwa yinkoso 100,+ yinkoso 50 muna yalumuka, yinkoso tanu muna lá. Vangila e rido a yanzala muna nsinga miasietwa mia lino yambote, e telamesenua yandi ifwete kala ya nsongo. 19 E salanganu yawonso isadilwa muna salu ya saba, kumosi ye mpalu za saba ye mpalu zawonso za yanzala, zifwete kala za nsongo.+
20 “Kanikina Aneyisaele batwasila mazi mavelela ma olive yatutwa mu kuma kia minda, kimana malemesanga e minda ntangwa zawonso.+ 21 Muna saba kia wananina, kuna mbazi a rido ina lukufi ye Nkel’a Kimbangi,+ o Arone yo wan’andi amakala bevanga nkubika kimana e minda miakala miakwama tuka fuku yamuna mene vana ndose a Yave.+ Owau nkanikinu wa mvu ke mvu ufwete lemvokelwa kwa Aneyisaele muna mbandu zau zawonso.+