Levitiku

6 Yave ovovese Mose vo: 2 “Avo muntu osumukini yo kondwa e kwikizi muna Yave+ muna vuna o nkwandi mu kuma kia lekwa kalundiswa,+ yovo lekwa kavewa se nsimbi,* yovo oyiyidi, yovo ovunginikini nkwandi, 3 yovo osolwele lekwa kiavila yo vuna mu kuma kia lekwa kiokio, avo odidi e ndofi aluvunu mu kuma kia konso sumu kavolele muna masumu mama,+ i wau wuwu kafwete vanga: 4 Avo osumukini yo yeleswa, kafwete vutula ina kayiyidi, ina kakutumwini, ina kabongele muna vunginika, ina kalundiswa, yovo lekwa kiavila kina kasolwele, 5 yovo konso lekwa kadididi e ndofi aluvunu, kafwete kio futa emvimba+ yo kudikila tini kiatanu kia ntalu andi. Ovana kio kwa ndiona ovuidi kio muna lumbu kizayakana e kuzuka diandi. 6 Obonga muna kambi e meme dia koko dialunga yo twasa dio kwa nganga se lukau lwandi lwa kuzuka kwa Yave, mun’owu wa ntalu isikidiswa kwa nganga mu kuma kia lukau lwa kuzuka.+ 7 O nganga olomba luyambulwilu lwa sumu dia muntu vana ndose a Yave, o muntu ndioyo ololokwa muna konso diambu kavanga diantwasila e ngielele.”+

8 Yave okwamanene vovesa Mose vo: 9 “Kanikina Arone yo wan’andi vo: ‘Owau i nsiku mu kuma kia lukau lwa ngioka:+ O lukau lwa ngioka lukala kaka vana tiya tuna vana ziku muna fuku wawonso yamuna mene, o tiya tukwamanana lema vana ziku. 10 O nganga ovuata e mvuatu andi a lino wa kinganga,+ ovuata makupe*+ ma lino mu fukila kimpene kiandi. I bosi, okatula o ntoto ampolo*+ a lukau lwa ngioka lubomweno vana tiya vana ziku yo sia wo vana ndambu a ziku. 11 I bosi, okatula e mvuatu miandi yo vuata mvuatu miankaka+ yo nata o ntoto ampolo vana fulu kiavelela kuna mbazi a ndo.+ 12 O tiya tukwamanana lemeswa vana ziku. Ke tufwete zima ko. O nganga kafwete yoka e nkuni+ vana tiya konso mene yo kubika lukau lwa ngioka vana ntandu. Ofutumuna mazi ma yimenga ya ungudi vana tiya.+ 13 O tiya tukwamanana lemeswa vana ziku. Ke tufwete zima ko.

14 “‘Owau i nsiku mu kuma kia lukau lwa mbwaza:+ Yeno wan’a Arone nusunzula lo vana ndose a Yave, vana ntwal’a ziku. 15 Mosi muna yau obonga koko kumosi kwa mfumfu yambote muna lukau lwa mbwaza ye ndambu a mazi mandi ye ndumbu a nti a lebona yawonso ina vana ntandu a lukau lwa mbwaza. Ofutumuna yo vana ziku se sinsu kisunzulanga lukau lwawonso,* lekwa kia nsunga* kuna kwa Yave.+ 16 Arone yo wan’andi bedia kina kisuva muna lukau.+ Bevanga kio se mbolo zakondwa e mfuna yo dila zo vana fulu kiavauka. Bedila zo vana yanzala kia saba kia wananina.+ 17 O lukau lwa mbwaza ke lufwete siwa mfuna ko.+ Mpene lo se kunku kiau muna tukau twame twayoka vana tiya.+ Ekiaki lekwa kisundidi o vauka,+ nze lukau lwa sumu ye lukau lwa kuzuka. 18 O wan’amakala awonso a Arone bedia lo.+ Ekiaki kikala se kunku kiau kia mvu ke mvu muna mbandu zeno zawonso, eki kituka muna tukau twa Yave twayoka vana tiya.+ Konso lekwa kiviakana tukau twatu kikituka se kiavauka.’”

19 Yave ovovese diaka Mose vo: 20 “Olwalu i lukau luna Arone yo wan’andi besunzula kwa Yave muna lumbu kina konso muntu muna yau kekuswa o mazi:+ tini kiakumi kia efa*+ kia mfumfu yambote se lukau lwa mbwaza,+ kati-kati kwa tini kiakumi muna mene, kati-kati kwa tini kiakumi muna nkokela. 21 Lukangwa vana mênga kumosi yo mazi.+ Ongeye otwasa lo lwatoma sangwa o mazi, osunzula lo tini-tini se lukau lwa mbwaza lwakangwa se lekwa kia nsunga* kuna kwa Yave. 22 Konso mwan’a Arone okuswa o mazi se nganga mu vinga vana fulu kia Arone,+ ovana mpe lukau lwalu. Owau nkanikinu a mvu ke mvu: O lukau lwawonso lufutumunua kwa Yave. 23 O lukau lwa mbwaza luna o nganga ketwasa lufwete yokwa lwawonso. Ke lufwete diwa ko.”

24 Yave ovovese diaka Mose vo: 25 “Vovesa Arone yo wan’andi vo: ‘Owau i nsiku mu kuma kia lukau lwa sumu:+ Vana fulu kivondelwanga e bulu kia lukau lwa ngioka,+ i vau mpe vevondelwa e bulu kia lukau lwa sumu, vana ndose a Yave. Ekiaki lekwa kisundidi o vauka. 26 O nganga ona otambika e bulu kia lukau mu kuma kia sumu, odia kio.+ Kidilwa vana fulu kiavauka, vana yanzala kia saba kia wananina.+

27 “‘Konso lekwa kiviakana o nsuni a lukau, kikituka kiavauka. Avo fimenga fia bulu kia lukau fitimbukidi muna mvuatu a muntu, ongeye ofwete sukula o mvuatu utimbukidi o menga vana fulu kiavauka. 28 E kinzu kia tûma kilambilu o nsuni, kifwete wulwa. Kansi, avo mu kinzu kia nsongo ilambilu, e kinzu kifwete sekwa yo sukulwa muna maza.

29 “‘Konso mwan’a yakala una vo nganga, odia o nsuni a lukau.+ Ekiaki lekwa kisundidi o vauka.+ 30 Kansi, o lukau lwa sumu ke lufwete diwa ko avo e ndambu a menga mandi ineto muna saba kia wananina mu lomba luyambulwilu lwa masumu vana fulu kiavauka.+ O lukau lufwete yokwa vana tiya.