Levitiku

11 I bosi, Yave ovovese Mose yo Arone vo: 2 “Nuvovesa Aneyisaele vo: ‘Muna bulu ina ova ntoto, eyayi i bulu nulenda dia:+ 3 Konso bulu kina ye kole kiavambana mu ndambu zole, kivutukilanga tafuna madia kaminini kala, nulenda kweno dia.

4 “‘Kansi, muna bulu ivutukilanga tafuna madia kaminini kala yovo bulu ina ye kole kiavambana mu ndambu zole, ke nudie bulu eyi ko: samo, kadi ovutukilanga tafuna madia kaminini kala, kansi kena ye kole kiavambana mu ndambu zole ko. Wafunzuka kwa yeno.+ 5 O nkandi* mpe,+ kadi ovutukilanga tafuna madia kaminini kala, kansi kena ye kole kiavambana mu ndambu zole ko. Wafunzuka kwa yeno. 6 O nlumba mpe, kadi ovutukilanga tafuna madia kaminini kala, kansi kena ye kole kiavambana mu ndambu zole ko. Wafunzuka kwa yeno. 7 O ngulu mpe,+ kadi una ye kole kiavambana mu ndambu zole, kansi ke vutukilanga tafuna madia kaminini kala ko. Wafunzuka kwa yeno. 8 Ke nudie konso mbizi a bulu yayi ko ngatu simba mavimbu mau. Yafunzuka kwa yeno.+

9 “‘I yau yiyi nulenda dia muna yawonso ina muna maza: Konso mbizi a maza ina ye maveve ye mavavala, kiakala muna kalunga yovo muna nkoko, nulenda dia kweno.+ 10 Kansi, konso mbizi a maza yakondwa maveve ye mavavala ina muna kalunga ye muna nkoko, kiakala vangwa yawonso yakete ikiyilanga mu buka muna maza yovo vangwa yankaka yamoyo ina muna maza, yangemi kwa yeno. 11 Elo, ifwete kala yangemi kwa yeno, ke nufwete dia konso nsuni au ko.+ Nufwete mwena mavimbu mau e ngemi. 12 Yawonso ina muna maza yakondwa maveve ye mavavala, yangemi kwa yeno.

13 “‘Eyayi i vangwa itilumukanga ina nufwete badikila vo yangemi; ke ifwete diwa ko, kadi yangemi: ngo-ezulu,+ vulu ye vungu diandombe,+ 14 kimbi kia mbwaki ye yimbi ya mpila zawonso ya ndombe, 15 e ngono-ngono za mpila zawonso, 16 seteleke, lubutia-butia, nkuku-ampela ye nkosi zamokena za mpila zawonso, 17 kutukudia, mfimfi-a-maza, fungu, 18 dibata dia maza, lembe, vungu, 19 nuni a yanga, kundangongo za mpila zawonso, nsiakoka yo lumpukunia. 20 E vangwa yawonso yakete ikiyilanga mu buka ina ye nsala, eyi ina yo malu maya, yangemi kwa yeno.

21 “‘Muna vangwa yawonso yakete ikiyilanga mu buka ina ye nsala, eyi ina yo malu maya, nudia kaka eyi ina yo malu mole mandá ma dumukina ova ntoto. 22 Muna vangwa yoyo, eyi nulenda dia: makonko meyalukanga ma mpila zawonso, makonko mediwanga,+ nzenze ye makonko mankaka. 23 E vangwa yankaka yakete ikiyilanga mu buka ina ye nsala, eyi ina yo malu maya, yangemi kwa yeno. 24 Avo nudidi e vangwa yayi nukuyifunzula. Konso muntu osimba mavimbu ma vangwa yayi okala wafunzuka yamuna nkokela.+ 25 Konso muntu onata e vimbu dia konso vangwa yayi, kafwete sukula e mvuatu miandi;+ okala wafunzuka yamuna nkokela.

26 “‘Konso bulu kina ye kole ke diavambana mu ndambu zole ko ye ke vutukilanga tafuna madia kaminini kala ko, kiafunzuka kwa yeno. Konso muntu osimba yo okala wafunzuka.+ 27 Konso vangwa kina yo malu maya kidiatilanga muna kandazi yandi, kiafunzuka kwa yeno. Konso muntu osimba mavimbu mau okala wafunzuka yamuna nkokela. 28 Konso muntu onata mavimbu mau kafwete sukula e mvuatu miandi,+ okala wafunzuka yamuna nkokela.+ E vangwa yayi yafunzuka kwa yeno.

29 “‘Eyayi i vangwa yakete ikiyilanga mu buka ina vo yafunzuka kwa yeno: o mpate,* mpuku,+ mbambi za mpila zawonso, 30 kolombo, kolombo anene, ndiasila, vala yo lungwenia. 31 E vangwa yayi izanzalanga ova ntoto yafunzuka kwa yeno.+ Konso muntu osimba mavimbu mau okala wafunzuka yamuna nkokela.+

32 “‘Avo mavimbu mau masotokele muna konso lekwa, e lekwa kiokio kikituka se kiafunzuka, kiakala sadilwa kia mabaya, mvuatu, nkand’a bulu yovo tini kia nlele a nsaku. Konso sadilwa, kiakala vo nkia salu kisadilwanga kifwete siwa muna maza, kikala kiafunzuka yamuna nkokela; i bosi kikala kiavelela. 33 Avo mavimbu mau masotokele mu kinzu kia tuma, nufwete kio wula, konso lekwa kikedi mo kikala kiafunzuka.+ 34 O maza ma kinzu kiokio avo matelele konso madia, o madia mekituka mafunzuka, konso ma kia nua kina mu kinzu kiokio kikituka kiafunzuka. 35 Avo mavimbu mau masotokele muna konso lekwa, e lekwa kiokio kikituka kiafunzuka. Kiakala fûlu yovo ziku dia lambila, difwete wulwa ndambu-ndambu. Yafunzuka, ikwamanana kala yafunzuka kwa yeno. 36 Kansi, avo mavimbu masotokele va nto a maza yovo mu wulu dia lundila maza, o maza mekwamanana kala mavelela, kansi konso muntu osimba mavimbu mau, okituka se wafunzuka. 37 Avo mavimbu mau masotokele va mbongo ikunua, e mbongo ikala yavelela. 38 Kansi, avo e mbongo iyitidilu o maza, e ndambu a vimbu yasotoka vana mbongo, e mbongo yoyo ikala se yafunzuka kwa yeno.

39 “‘Avo bulu kia dia kiyifwididi, konso muntu osimba e vimbu diandi okituka wafunzuka yamuna nkokela.+ 40 Konso muntu odia konso nsuni a bulu kiokio kiafwa, kafwete sukula e mvuatu miandi, okala wafunzuka yamuna nkokela.+ Konso muntu onata e vimbu diandi, kafwete sukula e mvuatu miandi, okala wafunzuka yamuna nkokela. 41 Konso vangwa yakete ikiyilanga mu buka ova ntoto, yangemi.+ Ka ifwete diwa ko. 42 Ke nufwete dia konso vangwa ko kikwendelanga muna vumu yovo vangwa kina yo malu maya, yovo konso vangwa kizanzalanga ova ntoto kina yo malu mayingi, kadi lekwa yangemi.+ 43 Ke nuyikitula angemi* ko muna konso vangwa kizanzalanga ova ntoto, ke nuyisafula ko yo kituka se nuafunzuka mu kuma kiau.+ 44 Kadi mono i Yave wa Nzambi eno;+ nufwete kala nuavelela, nuavauka,+ kadi omono yavauka.+ Muna kuma kiaki, ke nufwete kuyifunzula* ko muna konso vangwa kizanzalanga yo kangala ova ntoto. 45 Kadi mono i Yave, ona wanuvaikisa muna nsi ya Engipito kimana yakala se Nzambi eno;+ nufwete kala nuavauka,+ kadi omono yavauka.+

46 “‘Owau i nsiku mu kuma kia bulu, vangwa itilumukanga, vangwa yawonso yamoyo ikiyanga muna maza ye mu kuma kia vangwa yawonso izanzalanga ova ntoto, 47 kimana vakala nswaswani vana vena eki kiafunzuka y’eki kiavelela, vana vena vangwa yamoyo ifwete diwa y’eyi ke ifwete diwa ko.’”+