Levitiku

15 Yave okwamanene vovesa Mose yo Arone vo: 2 “Nuvovesa Aneyisaele vo: ‘Avo mwan’ayakala osonswanga ma muna kiyakala kiandi,* e ma kiokio kikunkitula se wafunzuka.+ 3 Oyandi wafunzuka mu kuma kia ma kesonswanga, kiakala vo kikwamanene sonsa muna kiyakala kiandi yovo kikakamene, una kaka wafunzuka.

4 “‘Konso mfulu ilavalala mwan’ayakala osonswanga e ma, e mfulu ikala yafunzuka, konso lekwa kevuanda kikala kiafunzuka. 5 Konso muntu osimba e mfulu andi, kafwete sukula e mvuatu miandi yo yowela muna maza, okala wafunzuka yamuna nkokela.+ 6 Konso muntu ovuanda vana lekwa kivuende muntu osonswanga ma muna kiyakala kiandi, kafwete sukula e mvuatu miandi yo yowela muna maza, okala wafunzuka yamuna nkokela. 7 Konso muntu osimba e nitu a ndiona osonswanga ma muna kiyakala kiandi, kafwete sukula e mvuatu miandi yo yowela muna maza, okala wafunzuka yamuna nkokela. 8 Avo muntu osonswanga ma muna kiyakala kiandi otaulwidi muntu avelela o mete, o muntu ndioyo kafwete sukula e mvuatu miandi yo yowela muna maza, okala wafunzuka yamuna nkokela. 9 Konso vuandu kavuandidi vana ntandu a bulu, kikala kiafunzuka. 10 Konso muntu osimba konso lekwa kavuandidi, okala wafunzuka yamuna nkokela, konso muntu onata e lekwa yoyo kafwete sukula e mvuatu miandi yo yowela muna maza, okala wafunzuka yamuna nkokela. 11 Avo o muntu osonswanga+ ma muna kiyakala kiandi oviakane muntu lembi teka sukula moko mandi muna maza, ndiona kaviakane kafwete sukula e mvuatu miandi yo yowela muna maza, okala wafunzuka yamuna nkokela. 12 Konso kinzu kia tûma kisimbilu kwa muntu osonswanga ma muna kiyakala kiandi, kifwete wulwa, kansi avo salanganu kia mabaya kifwete sukulwa muna maza.+

13 “‘E ma kisonsanga avo kikakamene, o muntu osasukidi, otanga lumbu nsambwadi muna luveleleso lwandi, kafwete sukula e mvuatu miandi yo yowela muna maza mabongelo vana maza mekukulanga, okala wavelela.+ 14 Muna lumbu kianana, kafwete bonga mbwela zole yovo nsweswe+ miole mia mayembe, okwiza vana ndose a Yave vana mwelo a saba kia wananina, ovana mio kwa nganga. 15 O nganga okubatambika, umosi se lukau lwa sumu, o wankaka se lukau lwa ngioka; o nganga okumvelelesa* muna mfunzuk’andi vana ndose a Yave.

16 “‘Avo mwan’ayakala ovaikidi malume, kafwete yowela yandi awonso muna maza, okala wafunzuka yamuna nkokela.+ 17 Kafwete sukula muna maza konso mvuatu ye konso nkand’a bulu una ye malume, ukala wafunzuka yamuna nkokela.

18 “‘Avo yakala ovukane yo nkento yo vaikisa malume, bafwete yowela muna maza, bekala bafunzuka yamuna nkokela.+

19 “‘Avo nkento ovaikwanga menga wau vo ku ngonde kena, okala wafunzuka mu lumbu nsambwadi.+ Konso muntu okumviakana okala wafunzuka yamuna nkokela.+ 20 Konso lekwa kelavalala ekolo kena wafunzuka mu kuma kia ngonde, kikala kiafunzuka, konso lekwa kevuanda kikala kiafunzuka.+ 21 Konso muntu osimba e mfulu andi kafwete sukula e mvuatu miandi yo yowela muna maza, okala wafunzuka yamuna nkokela. 22 Konso muntu osimba e lekwa kavuende, kafwete sukula e mvuatu miandi yo yowela muna maza, okala wafunzuka yamuna nkokela. 23 Avo va mfulu kavuende yovo va lekwa kiankaka, ndiona osimba kio okala wafunzuka yamuna nkokela.+ 24 Avo yakala ovukane yandi, o menga ma ngonde ma nkento matela muna yakala,+ o yakala okala wafunzuka mu lumbu nsambwadi, konso mfulu kelavalala o yakala diodio ikituka yafunzuka.

25 “‘Avo nkento ovaikwanga menga mu lumbu yayingi,+ kansi ke mun’owu wa lumbu yandi ya ngonde ko yovo avo e mpaikw’andi a menga iviokele e lumbu yandi ya ngonde,+ okala wafunzuka muna lumbu yoyo yawonso ya mpaikw’andi a menga nze una kekadilanga wafunzuka muna lumbu kekalanga ku ngonde. 26 Konso mfulu keleka muna lumbu ina kevaikwanga o menga, ikala yafunzuka nze una ukalanga e mfulu andi vava kekalanga ku ngonde,+ konso lekwa kevuanda kikituka kiafunzuka nze una uvangamanga vava kekalanga ku ngonde. 27 Konso muntu osimba e lekwa yoyo okala wafunzuka, kafwete sukula e mvuatu miandi yo yowela muna maza, okala wafunzuka yamuna nkokela.+

28 “‘Kansi, avo e mpaikw’andi a menga ikakamene, kafwete tanga lumbu nsambwadi tuka muna lumbu kina ikakamene, i bosi kekala wavelela.+ 29 Muna lumbu kianana, kafwete bonga mbwela zole yovo nsweswe miole mia mayembe,+ okubanata kwa nganga vana mwelo a saba kia wananina.+ 30 O nganga otambika nuni mosi se lukau lwa sumu, e yankaka se lukau lwa ngioka, o nganga okumvelelesa* muna mfunzuk’andi vana ndose a Yave.+

31 “‘Nufwete sadisa Aneyisaele bakala bavelela, kimana balembi fwa mu kuma kia safula e saba kiame kina ova kati kwau muna mfunzuk’au.+

32 “‘Owau i nsiku mu kuma kia mwan’ayakala osonswanga e ma muna kiyakala kiandi, mwan’ayakala una wafunzuka wau kavaikidi malume,+ 33 nkento una wafunzuka wau kena ku ngonde,+ konso mwan’ayakala yovo nkento osonswanga e ma muna nitu+ ye mu kuma kia yakala ovukane yo nkento afunzuka.’”