Levitiku

22 Yave ovovese diaka Mose vo: 2 “Vovesa Arone yo wan’andi vo bafwete keba muna mpila besadila e* lekwa yavauka ya Aneyisaele ye ke bafwete safula nkumbu ame avauka ko+ muna lekwa bevaulanga kwa mono.+ Mono i Yave. 3 Ubavovesa vo: ‘Muna mbandu zeno zawonso, konso muntu muna mbongo eno ofinama e lekwa yavauka ina Aneyisaele bevaulanga kwa Yave, ekolo kena wafunzuka, o muntu ndioyo kafwete vondwa vana ndose ame.+ Mono i Yave. 4 Ke muntu mosi ko muna mbongo ya Arone ona wina yo wazi+ yovo ona osonswanga ma muna kiyakala kiandi+ ofwete dia e lekwa yavauka yavana kekituka wavelela,+ kiakala ona oviakane muntu ofunzukidi mu kuma kia muntu afwa,+ yovo muntu ovaikilu malume,+ 5 yovo muntu oviakane kimosi muna vangwa yakete yafunzuka ikiyilanga mu buka+ yovo ona oviakane muntu ofunzukidi mu kuma kia konso diambu.+ 6 O muntu osimba kimosi muna konso lekwa yayi, okala wafunzuka yamuna nkokela, kafwete dia kana lekwa kimosi ko muna lekwa yavauka, kansi kafwete yowela muna maza.+ 7 Vava e ntangwa idimuka, okala wavelela, i bosi olenda kwandi dia e lekwa yavauka, kadi omomo i madia mandi.+ 8 Kafwete mpe dia konso bulu ko kiwanukini kiafwa yovo kivondelo kwa bulu ya mfuta, kalembi funzukila muna bulu kiokio.+ Mono i Yave.

9 “‘Bafwete lemvokela e nkanikinu miame kimana balembi vola e sumu muna kolamena mio yo fwa wau bafunzwidi e lekwa yavauka. Mono i Yave, ona okubavaulanga.

10 “‘O muntu kavewa nswa ko* kalendi dia lekwa kiavauka ko.+ O nzenza olwakidi kwa nganga yovo nsadi ona ofutwanga kafwete dia lekwa kiavauka ko. 11 Kansi, avo nganga osumbidi muntu muna nzimbu zandi, o muntu ndioyo olenda dia kwandi e lekwa kiavauka. E ntaudi zawutukila muna nzo andi balenda mpe dia madia mandi.+ 12 Avo mwan’ankento a nganga osompelo kwa muntu una vo ke nganga ko,* o mwana ndioyo kafwete dia lukau lwa lekwa yavauka ko. 13 Kansi, avo mwan’ankento a nganga ofwidilu yakala yovo ovondele longo lembi wuta wana yo vutuka kuna nzo a se diandi nze muna kileke kiandi, o mwana ndioyo olenda dia madia ma se diandi;+ kansi o muntu kavewa nswa ko* kafwete mo dia ko.

14 “‘Avo muntu odidi lekwa kiavauka lembi wo zaya, kafwete futa e lekwa kiokio kwa nganga yo kudikila tini kiatanu kia ntalu a lekwa kiokio.+ 15 Ozevo, anganga ke bafwete safula lekwa yavauka ko ina Aneyisaele bevananga kwa Yave+ 16 muna yambula vo Aneyisaele badia e lekwa yavauka yo kubatwasila tumbu mu kuma kia vilwa wau; kadi mono i Yave, ona okubavaulanga.’”

17 Yave okwamanene vovesa Mose vo: 18 “Vovesa Arone yo wan’andi yo Aneyisaele awonso vo: ‘Avo musi Isaele yovo nzenza ozingilanga muna Isaele osunzwidi lukau lwa ngioka+ kwa Yave muna lungisa e nsilu miandi yovo muna vana lukau lwa mvevo,+ 19 kafwete sunzula ngombe a koko walunga,+ mwan’a meme akoko yovo nkombo, kimana kavua e dienga. 20 Ke nufwete sunzula konso lekwa ko kina ye fu muna nitu,+ kadi ke kikunutwasila dienga ko.

21 “‘Avo muntu osunzula kimenga kia ungudi+ kwa Yave muna lunganisa nsilu yovo se lukau lwa mvevo, kafwete vana bulu kialunga, ngombe yovo nkombo yovo meme, kimana kavua e dienga. Ke kifwete kala ye fu ko muna nitu. 22 Ke nufwete sunzula bulu kiafwa meso ko, kiatoloka, kina ye mputa, kina ye vimbu yovo basa-basa;* ke nufwete sunzula kana kimosi muna bulu yayi ko kwa Yave ngatu tambika yo kwa Yave vana ziku. 23 Olenda sunzula ngombe a koko yovo meme dina yo kulu yovo koko kwalambuka yovo kwankufi se lukau lwa mvevo, kansi ke kitondwa ko se lukau lwa nsilu. 24 Ke nufwete sunzula bulu ko kwa Yave kina ye nkandi zabeba yovo zabosoka yovo zazengwa, ke nufwete tambika bulu kia mpila yayi ko muna nsi eno. 25 Ke nufwete sunzula kana kimosi ko muna bulu yayi kitukidi vana koko kwa nzenza se mbolo a Nzambi eno, kadi yambi, yavanguka. Ke nuvuila yo dienga ko.’”

26 Yave ovovese diaka Mose vo: 27 “Avo ngombe a koko yovo meme dia koko yovo nkombo iwutukidi, okala yo ngudi andi lumbu nsambwadi,+ kansi tuka muna lumbu kianana, olenda tondwa se lukau, lukau kwa Yave lwayoka vana tiya. 28 Kana ngombe yovo meme, ke nufwete kumvonda lumbu kimosi ko yo mwan’andi.+

29 “Avo kimenga kia matondo nutambika kwa Yave,+ nutambika kio mu vua e dienga. 30 Kifwete diwa muna lumbu kiakina. Ke nusisa kana lekwa kiandi kimosi ko yamuna mene.+ Mono i Yave.

31 “Nufwete lunda e nkanikinu miame yo lemvokela mio.+ Mono i Yave. 32 Ke nusafula nkumbu ame avauka ko,+ omono mfwete vaulwa vana kati kwa Aneyisaele.+ Mono i Yave, ona okunuvaulanga,+ 33 ona wanuvaikisa muna nsi ya Engipito mu kunusonga vo mono i Nzambi.+ Mono i Yave.”