Levitiku

23 Yave okwamanene vovesa Mose vo: 2 “Vovesa Aneyisaele vo: ‘E nkinzi + mia Yave muna nsungi yasikidiswa mina nufwete bokela nkoki+ i tukutakanu twavauka. Emiami i nkinzi miame muna nsungi yasikidiswa:

3 “‘Lumbu sambanu nusala konso salu, kansi e lumbu kiansambwadi i lumbu kia vunda emvimba,+ i lukutakanu lwavauka. Ke nufwete sala konso salu ko. Kikala se lumbu kia vundu kuna kwa Yave muna konso fulu nuzingila.+

4 “‘Emiami i nkinzi mia Yave muna nsungi yasikidiswa, i tukutakanu twavauka tuna nubokela nkoki muna ntangwa yasikidiswa mu kuma kia nkinzi miami: 5 Muna ngonde antete, muna lumbu kia 14 kia ngonde,+ muna nkokela, vitila tombe kiabukama,* i Nduta+ kuna kwa Yave.

6 “‘Muna lumbu kia 15 kia ngonde yoyo i Nkinzi a Mbolo Zakondwa Mfuna kuna kwa Yave.+ Lumbu nsambwadi nufwete dia mbolo zakondwa mfuna.+ 7 Muna lumbu kiantete, nuvanga lukutakanu lwavauka.+ Ke nufwete sala konso salu kiangolo ko. 8 Kansi, nufwete sunzula lukau kwa Yave lwayoka vana tiya mu lumbu nsambwadi. Muna lumbu kiansambwadi, vekala yo lukutakanu lwavauka. Ke nufwete sala konso salu kiangolo ko.’”

9 Yave okwamanene vovesa Mose vo: 10 “Vovesa Aneyisaele vo: ‘Vava nukota muna nsi ikunuvana yo kutika e mbongo a ntoto a nsi, nufwete twasa nkut’a mbongo antete+ a nkutik’eno kwa nganga.+ 11 O nganga ozunganisa o nkuta kuna ntwala y’oku nima vana ntadisi a Yave kimana nuavua e dienga dia Nzambi. O nganga ozunganisa wo muna lumbu kilandila e Lumbu kia Vundu. 12 Muna lumbu kizunganiswa e nkuta mieno, nufwete tambika mwan’ameme a koko walunga wa mvu mosi se lukau lwa ngioka kwa Yave. 13 O lukau lwa mbwaza lutambikwa kumosi ye lukau lwa ngioka lukala lwa tini yole muna tini kumi ya efa* ya mfumfu yambote yasangwa o mazi, se lukau lwayoka vana tiya kuna kwa Yave, lekwa kia nsunga.* O lukau lwandi lwa ndua lukala tini kiaya kia yini* ya vinyu. 14 Yamuna lumbu kiaki, ke nufwete dia mbwaza zantete ko, mbwaza zakangwa yovo dia konso mbolo yavangilwa muna mbwaza zantete, yavana nutwasa lukau lwa Nzambi eno. Owau nkanikinu wa mvu ke mvu muna mbandu zeno zawonso muna konso fulu nuzingila.

15 “‘Nufwete tanga tumingu nsambwadi* tuka muna lumbu kilandila e Lumbu kia Vundu, tuka muna lumbu nutwasa nkut’a lukau lwa zunganisa.+ Tufwete kala tumingu nsambwadi twamvimba. 16 Nutanga lumbu 50+ yamuna lumbu kilandila e Lumbu kia Vundu kiansambwadi, i bosi nusunzula lukau lwa mbwaza zampa kwa Yave.+ 17 Nufwete twasa tuka muna nzo zeno, mbolo zole se lukau lwa zunganisa. E mbolo zifwete vangilwa mu tini yole muna tini kumi ya efa* ya mfumfu yambote. Zifwete siwa e mfuna yo yokwa+ se mbongo antete kwa Yave.+ 18 E mbolo, nufwete zo sunzula kumosi yo wana mameme nsambwadi a makoko alunga, konso meme dia mvu mosi, mwan’a ngombe mosi a koko ye mameme mole makoko.+ Metambikwa se lukau lwa ngioka kwa Yave kumosi yo lukau lwandi lwa mbwaza yo tukau twa ndua, se lukau lwayoka vana tiya, lekwa kia nsunga* kuna kwa Yave. 19 Nufwete tambika mwan’a nkombo mosi se lukau lwa sumu+ ye wana mameme wole amakoko se kimenga kia ungudi, konso bulu kifwete kala mvu mosi.+ 20 O nganga ozunganisa yo kuna ntwala y’oku nima kumosi ye mbolo za mbongo antete se lukau lwa zunganisa vana ndose a Yave, kumosi yo wana mameme wole amakoko. Mekala se lekwa kiavauka kwa Yave mu kuma kia nganga.+ 21 Muna lumbu kiakina, nuboka nkoki+ wa lukutakanu lwavauka mu kuma kieno. Ke nufwete sala konso salu kiangolo ko. Owau nkanikinu a mvu ya mvu muna fulu yawonso nuzingila ye muna mbandu zeno zawonso.

22 “‘Vava nukutika e mbongo a ntoto eno, kufwete kutika mbongo awonso ko ina muna nsuk’a mpatu aku ngatu bonga ina yasala muna ntangw’a nkutika.+ Ofwete yo sisa mu kuma kia nsukami*+ yo nzenza ozinganga yeno.+ Mono i Yave wa Nzambi eno.’”

23 Yave ovovese Mose vo: 24 “Vovesa Aneyisaele vo: ‘Muna ngonde yansambwadi, muna lumbu kiantete kia ngonde, nufwete vunda emvimba, lumbu kia luyindwilu kizayisilwa muna zú dia mpungi,+ i lukutakanu lwavauka. 25 Ke nufwete vanga konso salu kiangolo ko, nusunzula lukau kwa Yave lwayoka vana tiya.’”

26 Yave ovovese diaka Mose vo: 27 “Kansi, e lumbu kiakumi kia ngonde yansambwadi, i Lumbu kia Luyambulwilu lwa Masumu.+ Nufwete vanga lukutakanu lwavauka, nufwete kendalala*+ mu kuma kia masumu meno yo sunzula lukau kwa Yave vana tiya. 28 Ke nufwete sala konso salu ko muna lumbu kiokio, kadi i lumbu kia luyambulwilu muna lomba luyambulwilu lwa masumu+ meno vana ndose a Yave wa Nzambi eno. 29 Konso muntu olembi kendalala* mu kuma kia masumu mandi muna lumbu kiokio, ovondwa vana vena nkangu andi.+ 30 Konso muntu osala konso salu muna lumbu kiokio, ikumfwasa vana vena o nkangu andi. 31 Ke nufwete sala konso salu ko. Owau nkanikinu wa mvu ke mvu muna mbandu zeno zawonso muna konso fulu nuzingila. 32 Ekiaki lumbu kia vunda emvimba kwa yeno. Muna lumbu kiavua kia ngonde, muna nkokela, nukendalala*+ mu kuma kia masumu meno. Nufwete lunda e lumbu kia vundu tuka nkokela eyi yamu nkokela ilanda.”

33 Yave okwamanene vovesa Mose vo: 34 “Vovesa Aneyisaele vo: ‘Muna lumbu kia 15 kia ngonde yayi yansambwadi, nukembelela Yave o Nkinzi a Sudi* mu lumbu nsambwadi.+ 35 Muna lumbu kiantete mukala ye lukutakanu lwavauka, ke nufwete sala konso salu kiangolo ko. 36 Mu lumbu nsambwadi nusunzula lukau kwa Yave vana tiya. Muna lumbu kianana, nufwete vanga lukutakanu lwavauka,+ nufwete sunzula lukau kwa Yave vana tiya. Olwalu lukutakanu lwampwena. Ke nufwete sala konso salu kiangolo ko.

37 “‘Emiami i nkinzi mia Yave muna nsungi+ yasikidiswa mina nufwete bokelela e nkoki se tukutakanu twavauka+ mu sunzula lukau kwa Yave lwayoka vana tiya: lukau lwa ngioka,+ lukau lwa mbwaza lwa kimenga+ ye tukau twa ndua+ mun’owu wa nkubika ya konso lumbu. 38 Twatu i tukau tuvewa vana ntandu a tukau tuvewanga muna lumbu ya vundu ya Yave,+ tukau tweno,+ tukau twa nsilu,+ tukau tweno twa mvevo,+ tuna nufwete vana kwa Yave. 39 Kansi, muna lumbu kia 15 kia ngonde ya nsambwadi, vava nukutika e mbongo a ntoto, nufwete kembela o nkinzi a Yave mu lumbu nsambwadi.+ E lumbu kiantete kikala kia vundu emvimba, e lumbu kianana mpe kikala kia vundu emvimba.+ 40 Muna lumbu kiantete, nubonga bundu ya nti miantoko, ndala za maba,+ tayi ya nti uyandangananga ye tayi ya nti mia alava mia ndimba,* nuyangalala+ vana ndose a Yave wa Nzambi eno mu lumbu nsambwadi.+ 41 Lumbu nsambwadi nukembela o nkinzi a Yave muna mvu.+ Nufwete wo kembela muna ngonde yansambwadi, owau nkanikinu wa mvu ke mvu muna mbandu zeno zawonso. 42 Nufwete kala muna sudi mu lumbu nsambwadi.+ E mingutukila miawonso mia Aneyisaele bafwete kala muna sudi, 43 kimana e mbandu zikunulandila bazaya wo+ vo mu sudi yazingisila Aneyisaele vava yabavaikisa muna nsi ya Engipito.+ Mono i Yave wa Nzambi eno.’”

44 Omama i mambu kavovesa o Mose kwa Aneyisaele mu kuma kia nkinzi mia Yave muna nsungi yasikidiswa.