Ntalu
2 I bosi, Yave ovovese Mose yo Arone vo: 2 “Aneyisaele bafwete sia e ndo zau vana fulu kiasikidiswa mu kuma kia buka kiau kia makanda tatu,+ konso muntu vana sinsu kisunzulanga e nzo a se diandi. Bafwete sia e ndo mantalani ye saba kia wananina, muna kinzieta kiawonso kia saba.
3 “Awana besia e ndo kuna este, kuna kuvaikilanga e ntangwa, i buka kia makanda tatu kia ndo a Yuda, mun’owu wa buka yau;* o Nakesone+ wa mwan’a Aminadabi i mfumu a wan’a Yuda. 4 Awana basonekeno muna vu kiandi, 74.600.+ 5 E kanda dia Yisakare disia e ndo vana ndambu andi; o Netanele+ wa mwan’a Suare i mfumu a wan’a Yisakare. 6 Awana basonekeno muna vu kiandi, 54.400.+ 7 Edi dilanda i kanda dia Zebulune; o Eliabe+ wa mwan’a Kelone i mfumu a wan’a Zebulune. 8 Awana basonekeno muna vu kiandi, 57.400.+
9 “Awonso basonekeno muna vu ya ndo a Yuda, 186.400. Yau i wantu antete belondoka.+
10 “E buka kia makanda tatu kia ndo a Rubeni+ mun’owu wa buka yau,* kikala kuna sude; o Elisu+ wa mwan’a Sedeu i mfumu a wan’a Rubeni. 11 Awana basonekeno muna vu kiandi, 46.500.+ 12 E kanda dia Simeone disia e ndo vana ndambu andi; o Selumiele+ wa mwan’a Surisadai i mfumu a wan’a Simeone. 13 Awana basonekeno muna vu kiandi, 59.300.+ 14 Edi dilanda i kanda dia Ngadi; o Eleyasafe+ wa mwan’a Ruele i mfumu a wan’a Ngadi. 15 Awana basonekeno muna vu kiandi, 45.650.+
16 “Awonso basonekeno muna vu ya ndo a Rubeni, 151.450, yau i wantu anzole belondoka.+
17 “Vava e saba kia wananina kinatwa,+ e ndo a Anelevi ifwete kala vana kati kwa ndo zankaka.
“Bekangalela wauna walandanena e ndo zau,+ konso muntu vana fulu kiandi, mun’owu wa buka yau ya makanda tatu.
18 “E buka kia makanda tatu kia ndo a Eferaime mun’owu wa buka yau,* kikala kuna weste; o Elisama+ wa mwan’a Amiudi i mfumu a wan’a Eferaime. 19 Awana basonekeno muna vu kiandi, 40.500.+ 20 E kanda dia Manase+ disia e ndo vana ndambu andi; o Ngamaliele+ wa mwan’a Pedasu i mfumu a wan’a Manase. 21 Awana basonekeno muna vu kiandi, 32.200.+ 22 Edi dilanda i kanda dia Benyamini; o Abidani+ wa mwan’a Ngidoni i mfumu a wan’a Benyamini. 23 Awana basonekeno muna vu kiandi, 35.400.+
24 “Awonso basonekeno muna vu ya ndo a Eferaime, 108.100, oyau i wantu antatu belondoka.+
25 “E buka kia makanda tatu kia ndo a Dani mun’owu wa buka yau,* kikala kuna node; o Akieze+ wa mwan’a Amisadai i mfumu a wan’a Dani. 26 Awana basonekeno muna vu kiandi, 62.700.+ 27 E kanda dia Asere disia e ndo vana ndambu andi; o Pangiele+ wa mwan’a Okerane i mfumu a wan’a Asere. 28 Awana basonekeno muna vu kiandi, 41.500.+ 29 Edi dilanda i kanda dia Nafetali; o Akira+ wa mwan’a Enane i mfumu a wan’a Nafetali. 30 Awana basonekeno muna vu kiandi, 53.400.+
31 “Awonso basonekeno muna vu kia ndo a Dani, 157.600. Yau i wantu ansuka belondoka,+ mun’owu wa buka yau ya makanda tatu.”
32 Awaya i Aneyisaele ana basonekeno mun’owu wa nzo za mase mau. O lutangu lwa awonso basonekeno muna ndo zawonso mu sala se makesa muna vu, 603.550.+ 33 Kansi, Anelevi ke basonekeno+ kumosi ye Aneyisaele ankaka ko,+ wauna o Yave kakanikina Mose. 34 Aneyisaele bavangidi mawonso mana Yave kakanikina Mose. I mpila yayi basikidisila e ndo zau mun’owu wa buka yau ya makanda tatu,+ i mpila yayi mpe balondokelanga,+ konso muntu mun’owu wa vumu kiandi ye nzo za mase mau.