Ntalu
32 O wan’a Rubeni+ yo wan’a Ngadi+ twelezi yayingi kikilu bakala yau. Bamwene vo e nsi ya Yaze+ ye nsi ya Ngiladi zunga yambote mu twelela e twelezi. 2 Muna kuma kiaki, o wan’a Ngadi yo wan’a Rubeni bafinamene Mose, Elaza wa nganga ye mfumu za nkangu, bavovele vo: 3 “Atarote, Dibone, Yaze, Nimera, Kesebone,+ Elale, Sebame, Nebo+ ye Bone,+ 4 e nsi ina Yave kafwasa vana meso ma nkangu a Isaele,+ nsi yambote yatwelela e twelezi, e selo yaku twelezi yayingi bena yau.”+ 5 Bakwamanene vova vo: “Avo tumweneno e dienga ova meso maku, yambula e nsi yayi yakala se vua dia selo yaku. Kutusaula kuna simu dia Yodani ko.”
6 Mose ovovese wan’a Ngadi yo wan’a Rubeni vo: “Nga mpangi zeno zenda nuana e vita, oyeno nuasala ovav’e? 7 Ekuma nuzolele yoyesela nkangu a Isaele balembi sauka kuna nsi ina Yave kekubavana? 8 I diau mpe mase meno bavanga vava yabatuma tuka kuna Kadese-banea benda tala e nsi.+ 9 Vava balwaka kuna Ndimba a Esekole+ yo mona e nsi, bayoyesa nkangu a Isaele balembi kwenda kuna nsi ina Yave kadi kubavana.+ 10 O makasi ma Yave mafusuka muna lumbu kiakina, muna diadi wadia e ndofi vo:+ 11 ‘Akala ana batuka kuna Engipito, bakala ye kimbuta kia mvu 20 yovo vioka ke bemona nsi ko+ ina yadila ndofi kwa Abarayama, Isaki yo Yakobo,+ kadi ke bandanda yo ntima wawonso ko— 12 nanga vo Kalebe+ kaka wa mwan’a Yefune, wa Nkenazi yo Yosua+ wa mwan’a Nuni, kadi balende Yave yo ntima wawonso.’+ 13 Muna kuma kiaki, makasi ma Yave mafusuka muna Isaele, ubatungianese muna makanga mu mvu 40,+ yavana e mbandu yayina yawonso yavanganga e mbi vana meso ma Yave yafokoka.+ 14 Owau, oyeno mbongo a wantu asumuka, nuvingidi vana fulu kia mase meno, kimana nuawokesa makasi ma Yave mu kuma kia Isaele. 15 Kadi avo nuyambwidi kunlanda, kieleka oyandi oyambula diaka nkangu wau mu makanga, ozevo lufwasu nutwasa kwa nkangu wau wawonso.”
16 Kuna kwalanda, bamfinamene yo vova vo: “Yambula twatunga e mpaka za matadi ovava mu kuma kia twelezi yeto ye zimbanza mu kuma kia wan’eto. 17 Kansi, tukwamanana kala twakubama mu nuana e vita,+ tuvita Aneyisaele ankaka o ntu yavana tukubalwakisa vana fulu yau, ekolo wan’eto bekala mu mbanza zazungwa e yaka yo taninua muna awana bezingilanga mu nsi yayi. 18 Ke tuvutuka mu nzo zeto ko yavana Aneyisaele awonso betambula e nsi au se vua.+ 19 Kadi ke tutambula vua kumosi yo yau ko kuna simu dia Yodani ye kuna ntwala, wau vo tutambwidi e vua dieto oku ndambu a este ya Yodani.”+
20 Mose ubavutwidi vo: “Avo i diau nuvanga, avo nubongele nuaninua vana ndose a Yave mu nuana e vita;+ 21 avo konso muntu mu yeno obongele nuaninua yandi yo sauka e Yodani vana ndose a Yave ekolo keyinga e mbeni zandi vana ndose andi+ 22 yavana e nsi isiwa kuna nsi a wisa kia Yave,+ ozevo, nulenda kweno vutuka+ yo vevoka muna nkanu vana ndose a Yave ye Isaele. E nsi yayi ikituka se vua dieno vana ndose a Yave.+ 23 Kansi, avo ke nuvanga wo ko, Yave nusumukina. Nuzaya wo vo, tumbwa nutumbwa mu kuma kia sumu dieno. 24 Ozevo, nutunga zimbanza mu kuma kia wan’eno ye mpaka mu kuma kia makambi meno,+ kansi nufwete vanga mana nusidi o nsilu.”
25 O wan’a Ngadi yo wan’a Rubeni bavovese Mose vo: “E selo yaku bevanga wauna o mfumu eto kakanikini. 26 O wan’eto, akento eto, twelezi yeto ye bulu yeto yawonso ya vata isala mu mbanza za Ngiladi,+ 27 kansi e selo yaku isauka kuna simu dia Yodani, akala awonso bakubama mu yikama e vita vana ndose a Yave,+ wauna o mfumu eto kavovele.”
28 Muna kuma kiaki, Mose ovene nkanikinu mu kuma kiau kwa Elaza wa nganga, kwa Yosua wa mwan’a Nuni ye kwa ntu mia nzo za mase ma makanda ma Isaele. 29 Mose ubavovese vo: “Avo wan’a Ngadi yo wan’a Rubeni basaukidi Yodani kumosi yo yeno, akala awonso bavuete nuaninua mu nuana e vita vana ndose a Yave, e nsi yakala kuna nsi a wisa kieno, ozevo nukubavana e nsi ya Ngiladi se vua.+ 30 Kansi, avo ke babongele nuaninua ko yo sauka yeno, oyau bekala vana kati kweno kuna nsi ya Kenani.”
31 Muna kuma kiaki, o wan’a Ngadi yo wan’a Rubeni bavutwidi vo: “Mana o Yave kavovele kwa selo yaku i mau tuvanga. 32 Tubonga e nuaninua yo sauka Yodani vana ndose a Yave kuna nsi ya Kenani,+ kansi ku simu diadi dia Yodani tuvuila e vua.” 33 Muna kuma kiaki, Mose ovene kwa wan’a Ngadi ye kwa wan’a Rubeni+ ye kwa bula-kati kwa kanda dia Manase+ wa mwan’a Yosefe e kintinu kia Sikone+ wa ntinu a Aneyamore ye kintinu kia Onge+ wa ntinu a Basani, i sia vo, ntoto a mbanza za nsi muna zunga yoyo ye mbanza za zunga ina muna kinzieta.
34 O wan’a Ngadi batungidi* Dibone,+ Atarote,+ Arowa,+ 35 Aterote-sofane, Yaze,+ Yongeba,+ 36 Bete-nimera+ ye Bete-arane,+ mbanza zazungwa e yaka; batungidi mpaka za matadi mu kuma kia makambi. 37 O wan’a Rubeni batungidi Kesebone,+ Elale,+ Kireyataime,+ 38 Nebo,+ Bale-mone+ (basobele zo e nkumbu) ye Sibema; e mbanza zina batungulwidi basobele zo e nkumbu.
39 O wan’a Makire+ wa mwan’a Manase bele nuanisa Ngiladi yo kutumuna yo, bayingidi Aneyamore ana bakala mo. 40 Muna mpila yayi, Mose ovene Ngiladi kwa Makire wa mwan’a Manase, oyandi oyantikidi zingila mûna.+ 41 O Yaire wa mwan’a Manase wele nuanisa mavata ma Ngiladi yo kutumuna mo, oyantikidi mo yikila vo Kavote-yaire.*+ 42 O Noba wele nuanisa Kenate ye mavata mandi* yo kutumuna mo, oyantikidi mo yikila vo Noba, mun’owu wa nkumbu andi.