Ntalu

5 Yave ovovese diaka Mose vo: 2 “Kanikina Aneyisaele bavaikisa kuna mbazi a ndo konso muntu una yo wazi,+ konso muntu osonswanga ma muna nitu+ ye konso muntu ofunzukidi wau kasimbidi e vimbu dia muntu.*+ 3 Kiakala yakala yovo nkento, nufwete kubavaikisa. Nufwete kubavaikisa kuna mbazi a ndo, kimana balembi sambukisa+ e ndo za nkangu ame, kadi omono ikalanga va kati kwau.”+ 4 Muna kuma kiaki, Aneyisaele bavangidi wo, babavaikisi kuna mbazi a ndo. Wauna Yave kavovesa Mose i una mpe Aneyisaele bavanga.

5 Yave okwamanene vovesa Mose vo: 6 “Vovesa Aneyisaele vo: ‘Avo yakala yovo nkento ovolele dimosi muna masumu bevolanga o wantu yo kondwa kwikizi muna Yave, o muntu* ndioyo okuzukidi.+ 7 Kafwete* funguna+ e sumu dina kavolele* yo vutula e ntalu yawonso mu kuma kia kuzuka diandi, okudikila mpe tini kiatanu kia ntalu andi;+ ovana zo kwa muntu kavangidi e mbi. 8 Kansi, avo muntu ndioyo ofwidi ye kena ye yitu kiamenga ko ona olenda tambula kina kifutilu, kina kifutilu kifwete vutulwa kwa Yave, kikala se kia nganga, vana ntandu a meme dia koko dia luyambulwilu lwa masumu dina kelombela luyambulwilu lwa masumu ma ndiona ovangidi e mbi.+

9 “‘Konso lukau lwavauka+ luna Aneyisaele besunzula kwa nganga, lufwete kituka se lwandi.+ 10 E lekwa yavauka ina konso muntu kesunzula kwa nganga, ikala se yandi. Konso lekwa kesunzula o muntu kwa nganga, e lekwa kiokio kikala se kia nganga.’”

11 Yave ovovese diaka Mose vo: 12 “Vovesa Aneyisaele vo: ‘I wau wuwu ufwete vangwa avo nkento asompwa obendomokene yo kondwa e kwikizi muna yakala diandi, 13 o yakala diankaka kavukana yandi,+ kansi e diambu diadi ke dizayakene ko kwa yakala diandi, dikwamanene dia nsweki, o nkento uyifunzwidi kana una vo ke vena mbangi ko olenda kumfunda kadi kabakamene ko: 14 Avo yakala okitukidi nkwa nsongo yo katikisa e kwikizi kia nkento andi, ye o nkento funzula kikilu kayifunzwidi, yovo yakala okitukidi nkwa nsongo yo katikisa e kwikizi kia nkento andi, kansi o nkento kayifunzwidi kwandi ko, 15 o yakala kafwete nata o nkento andi kwa nganga kumosi yo lukau mu kuma kia nkento, tini kiakumi kia efa* kia mfumfu ya bale. Kafwete lo yitila mazi ko ngatu sia lo e ndumbu a nti a lebona, kadi i lukau lwa mbwaza mu kuma kia nsongo, lukau lwa mbwaza lusungamesanga e kuzuka.

16 “‘O nganga onata o nkento kuna ntwala yo kuntelamesa vana ntadisi a Yave.+ 17 O nganga obonga maza mavauka muna kinzu kia tuma, obonga ndambu a mbundukutu a ntoto a saba yo sia yo muna maza. 18 O nganga otelamesa o nkento vana ndose a Yave, okutulula e nsuki za nkento yo sia vana moko ma nkento o lukau lwa mbwaza lwa luyindulu, i sia vo, lukau lwa mbwaza mu kuma kia nsongo,+ o nganga okala yo maza mandudi vana moko, mana metwasanga e sibu.+

19 “‘I bosi, nganga odisa o nkento e ndofi yo kumvovesa vo: “Avo ka vena yakala diankaka ko ovukane yaku ekolo wina muna wisa kia yakala diaku,+ avo kubendomokene ko ngatu kuyifunzula, yambula wavevoka muna mpasi za maza mama mandudi metwasanga e sibu. 20 Kansi, avo wabendomokene ekolo wina muna wisa kia yakala diaku muna kuyifunzula yo vukana yo yakala diankaka—”+ 21 Ozevo, o nganga olomba kwa nkento kadia e ndofi ya sibu, nganga ovovesa nkento vo: “Yambula Yave kakitula se mbandu ifwete yikwa muna sibu ye muna ndofi vana vena o nkangu aku. Avo vanga ovangidi wo, yambula Yave kabwisa* e tungi* diaku dia kulu yo vimbisa e vumu kiaku. 22 O maza mama metwasanga e sibu mekota muna ndia miaku mu vimbisa e vumu kiaku yo bwisa* e tungi* diaku dia kulu.” Muna diadi, o nkento ovova vo: “Amen! Amen!”*

23 “‘I bosi, o nganga osoneka e sibu yayi muna nkanda yo vunzunuina yo muna maza mandudi. 24 I bosi, onuika maza mandudi metwasanga e sibu kwa nkento, o maza mama mekota muna nkento yo twasa e mpasi. 25 Nganga obonga lukau lwa mbwaza mu kuma kia nsongo+ vana koko kwa nkento yo zunganisa lukau lwa mbwaza kuna ntwala y’oku nima se lukau lwa zunganisa vana ntadisi a Yave yo twasa lukau vana ndambu a ziku. 26 Nganga obonga koko kumosi kwa lukau lwa mbwaza se sinsu kisunzulanga lukau lwawonso* yo futumuna ko vana ziku,+ i bosi onuika nkento o maza. 27 Vava kenuika maza kwa nkento, avo nkento funzula kikilu kayifunzwidi yo kondwa e kwikizi muna yakala diandi, o maza metwasanga e sibu mekota muna yandi yo twasa e mpasi, e vumu kiandi kivimba, e tungi* diandi dia kulu dibwa,* o nkento okituka se mbandu a sibu vana vena o nkangu andi. 28 Kansi, avo nkento kayifunzwidi ko ye wavelela, ovevoka muna tumbu kiaki, wafwana yimita yo wuta wana.

29 “‘Owau i nsiku mu kuma kia nsongo,+ avo nkento obendomokene yo kuyifunzula ekolo kena muna wisa kia yakala diandi, 30 yovo avo yakala okitukidi nkwa nsongo yo katikisa e kwikizi kia nkento andi; o yakala kafwete telamesa o nkento andi vana ntadisi a Yave, o nganga kafwete lungisa o nsiku wau wawonso mu kuma kiandi. 31 O yakala ovevoka muna kuzuka, kansi o nkento andi otumbwa mu kuma kia kuzuka diandi.’”