Nsiku
24 “Avo yakala osompele nkento kansi kanyangalele ko wau vo diambu diambi kasolwele muna yandi, o yakala kafwete soneka nkanda wa vondela longo,+ okumvana wo yo kumvaikisa muna nzo andi.+ 2 Vava o nkento kekatuka muna nzo a yakala diodio, olenda kwandi kituka nkento a yakala diankaka.+ 3 Avo yakala dianzole umengene* yo kunsonekena nkanda wa vondela longo, kamvana wo yo kumvaikisa muna nzo andi, yovo o yakala dianzole ona wansompa avo ofwidi, 4 o yakala diandi diantete ona wansindika ke kala yo nswa ko wakumbonga diaka se nkaz’andi wau vo wafunzukidi, kadi ediadi diangemi kuna kwa Yave. Kufwete twasa sumu ko muna nsi ina Yave wa Nzambi aku kekuvana se vua.
5 “Avo yakala ke kolo ko kasompele, kafwete kota mu salu kia kisoladi ko ngatu vewa salu yankaka. Ke sala salu ko mu mvu wamvimba, okala kuna nzo yo yangidika nkento andi.+
6 “Ke vena muntu ko obonga tadi dia nikina yovo nsindilu se nsimbi mu kuma kia mfuka,+ kadi kina kisadisanga o nkwandi mu zinga i kebonga* se nsimbi.
7 “Avo muntu osolokele vo mosi muna mpangi zandi za Aneyisaele kanete mu kingolo, umwesese mpasi yo kunteka,+ o muntu onete nkw’andi mu kingolo kafwete vondwa.+ Ofwete katula edi diambi ova kati kwaku.+
8 “Avo vuku kia wazi kivaikidi,* toma keba wavanga mawonso bekulonga angang’a Anelevi.+ Toma keba wavanga wauna yabakanikina. 9 Sungamena dina Yave wa Nzambi aku kavanga kwa Mireyame muna nzila vava nuavaika muna Engipito.+
10 “Avo odevese konso lekwa kwa mfinangani aku,+ kufwete kota mu nzo andi ko mu bonga kina katambulwidi kuvana se nsimbi. 11 Ongeye ofwete telama kuna mbazi, ndiona odevele kafwete twasa oku mbazi kina katambulwidi kuvana se nsimbi. 12 Avo muntu nsukami, kuleki ko ye lekwa kavene se nsimbi.+ 13 Vava e ntangwa idimuka, ofwete kumvutulwila kina kavene se nsimbi, oyandi okwenda leka yo mvuatu andi,+ okusambula; ongeye obadikilwa se nsongi vana ndose a Yave wa Nzambi aku.
14 “Kuvuni nsadi ko ona ofutwanga, ona una mu mpasi ye nsukami, kiakala mosi muna mpangi zaku yovo nzenza una omu nsi aku, muna kati kwa mbanza zaku.*+ 15 Ofwete kumvana o mfutu andi muna lumbu kiakina,+ vitila e ntangwa yadimuka, kadi oyandi nsukami, e zingu kiandi* muna mfutu andi kina. Avo ke wau ko, oyandi okaza kwa Yave mu kuma kiaku, ediadi dikala se sumu kwa ngeye.+
16 “Amase ke bafwete vondelwa mu dina wan’au bavangidi ko, o wana mpe ke bafwete vondelwa mu dina mase mau bavangidi ko.+ O muntu kafwete vondelwa kaka muna sumu dia yandi kibeni.+
17 “Kufwete bendomona nzengo za nzenza ko muna mfundu yovo nzengo za mwana wakondwa o se,+ kubongi mvuatu a nkento wafwilwa yakala ko se nsimbi mu kuma kia mfuka.+ 18 Sungamena vo ngeye mbundu wakituka muna Engipito, o Yave wa Nzambi aku wakûla mwamuna.+ Kiaki i kuma ikukanikinanga wavanga wo.
19 “Vava okutika e mbongo a mpatu aku, avo ovilakene nkuta muna mpatu, kuvutukila wo ko. Ufwete siswa mu kuma kia nzenza yo mwana wakondwa se yo nkento wafwilwa yakala,+ kimana o Yave wa Nzambi aku kasambula muna mawonso ovanga.+
20 “Vava oninginisa* o nti aku a olive, kuvutukila ninginisa tayi yandi ko. E bundu isala, ikala se ya nzenza, ya mwana wakondwa se yo nkento wafwilwa yakala.+
21 “Vava okutika e uva muna mpatu aku a vinyu, kufwete vutuka ko wakutika zina zisidi. Zifwete siswa mu kuma kia nzenza yo mwana wakondwa se yo nkento wafwilwa yakala. 22 Sungamena vo ngeye mbundu wakituka muna nsi ya Engipito. Kiaki i kuma ikukanikinanga wavanga wo.