Yosua
22 Yosua okutakese Anerubeni ye Anengadi ye bula kati-kwa kanda dia Manase 2 ubavovese vo: “Nuvangidi mawonso kanukanikina Mose wa selo kia Yave+ yo wila nding’ame muna mawonso yanukanikina.+ 3 Ke nubembwele mpangi zeno ko e kolo kiaki kiawonso yamu unu;+ nulundidi nkanikinu mia Yave wa Nzambi eno.+ 4 Owau, Yave wa Nzambi eno ovundisi ampangi zeno wauna kabasila o nsilu.+ Dianu vo, nuvutuka muna saba yeno, muna nsi ina Mose wa selo kia Yave kanuvana, nuavua yo kuna simu dia* Yodani.+ 5 Kansi, nuyikenga yo lunda nkanikinu yo Nsiku una Mose wa selo kia Yave kanuvana,+ nuazola Yave wa Nzambi eno,+ nuadiatila muna nzila zandi zawonso,+ yo lunda nkanikinu miandi,+ nuantatidila+ yo kunsadila muna ntim’eno wawonso+ yo moyo* eno wawonso.”+
6 I bosi, Yosua ubasambwidi yo kubasindika, bele muna saba yau. 7 Mose wavana e vua kwa bula-kati kwa kanda dia Manase kuna Basani,+ vo i ndambu yankaka, o Yosua ubavene e nsi kuna ndambu a weste ya Yodani+ kumosi ye mpangi zau. O Yosua vava kabasindikidi muna saba yau, ubasambwidi 8 yo kubavovesa vo: “Nuvutuka muna saba yeno ye kimvuama kiayingi ye twelezi yayingi ye palata yo wolo ye nsongo ye sengwa ye mvuatu miayingi.+ Nukayana e sanzu+ dia mbeni zeno ye mpangi zeno.”
9 I bosi Anerubeni ye Anengadi ye bula-kati kwa kanda dia Manase bavutukidi, basisidi Aneyisaele akaka tuka kuna Silo kuna nsi a Kenani, bele kuna nsi a Ngiladi+ kuna nsi au akivuila ina batambula muna lutumu lwa Yave muna Mose kimana bakala mo.+ 10 Vava balweke muna zunga kia Yodani kuna nsi ya Kenani, Anerubeni ye Anengadi ye bula-kati kwa kanda dia Manase batungidi e ziku vana ndambu a Yodani, e ziku diampwena kikilu. 11 I bosi, Aneyisaele ankaka vava bawidi wo,+ bavovele vo: “Anerubeni ye Anengadi ye bula-kati kwa kanda dia Manase batungidi e ziku vana mwingilu a nsi a Kenani muna zunga kia Yodani kuna ndambu ina ivuilu kwa Aneyisaele.” 12 Aneyisaele vava bawidi wo, nkutakani yawonso ya Aneyisaele ilungalakene kuna Silo+ kimana benda kubanuanisa.
13 Aneyisaele batumini Finekase+ wa mwan’a Elaza wa nganga, kenda kuna Ngiladi, kuna kwa Anerubeni ye Anengadi ye bula-kati kwa kanda dia Manase, 14 wele ye akuluntu kumi, mosi-mosi muna konso nzo a mase muna makanda mawonso ma Isaele. Konso nkuluntu i ntu muna nzo a mase mandi vana vena mafunda* ma Isaele.+ 15 Vava balweke kuna kwa Anerubeni ye Anengadi ye bula-kati kwa kanda dia Manase kuna nsi a Ngiladi, babavovese vo:
16 “I wau wuwu uvovele nkutakani awonso a Yave: ‘Nkia sumu+ diadi nusumukini Nzambi a Isaele? Nuyambwidi landa Yave o unu, nuyitungidi e ziku yo kolamena Yave.+ 17 E mbi ina twavanga kuna Peo, nga ke ifwene ko vava tuna? Ke twayivelelesa ko muna bi wau yamu unu, kana una vo e vuku kiayiza muna nkutakani a Yave.+ 18 Nga nuzolele yambula landa Yave? Avo o unu nutelamene Yave, o mbazi se kafungila nkutakani yawonso a Isaele o makasi.+ 19 Avo e nsi eno akukivuila ifunzukidi, ozevo, nusauka kweno kuna nsi a Yave yakukivuila+ kuna kwina e saba kia Yave,+ nuakala vava twina. Kansi ke nutelamena Yave ko, ngatu kutufila twantelamena wau nuyitungidi e ziku diankaka, ke mu ziku dia Yave wa Nzambi eto ko.+ 20 Vava Akani+ wa mwan’a Zera kasumuka mu kuma kia lekwa yayekolwa mu fwaswa, o Nzambi ke nkutakani yawonso ya Isaele ko kafungila makasi?+ Ke yandi kaka ko wafwila muna bi wandi.’”+
21 Anerubeni ye Anengadi ye bula-kati kwa kanda dia Manase bavutwidi kwa ntu mia mafunda* ma Isaele vo:+ 22 “O Yave wa Nzambi osundidi nzambi zawonso, o Yave wa Nzambi osundidi nzambi zawonso,+ yandi ozeye, o Isaele mpe ozaya. Avo Yave tutelamene yo sumukina, katuvuluzi ko o unu. 23 Avo tutungidi ziku diadi muna yambula landa Yave yo futumwina vo tukau twangioka yo tukau twa mbwaza, yo kelela vo yimenga ya ungudi, o Yave tumba kekututumba.+ 24 Diambu diankaka diatufididi mu tunga e ziku diadi, kadi edi twayindwidi vo, ‘Muna lumbu ilanda, o wan’eno bevovesa wan’eto vo: “Nkia diambu nuna diau yo Yave wa Nzambi a Isaele? 25 Yave osidi Yodani se mwingilu ova kati kweto yo yeno, oyeno Anerubeni ye Anengadi. Ke luna ye kunku ko muna Yave.” O wan’eno bekakidila wan’eto muna sambila* Yave.’
26 “I dianu twavovele vo: ‘Yambula twatunga e ziku, ke tufutumwinina vo lukau lwa ngioka ko ngatu kelela vo yimenga, 27 kansi, dikala se mbangi kwa yeno yo yeto+ yo wan’eto* ana bekutulandila, vo tusadila Yave vana kena muna tukau tweto twangioka ye muna yimenga, ye muna tukau twa ungudi,+ kimana o wan’eno balembi vova kwa wan’eto muna lumbu ilanda vo: “Ke luna ye kunku ko muna Yave.”’ 28 I dianu twavovele vo: ‘Vava bevova wo kwa yeto yovo kwa wan’eto* muna lumbu ilanda, tuvova vo: “Nutala e fwani-fwani kia ziku dia Yave, dina diatunga mase meto, ke mu futumwina vo lukau lwa ngioka ko yovo kelela vo kimenga, kansi, dikala se mbangi kwa yeto yo yeno.”’ 29 Ke tutelamena nkutu Yave ko ngatu yambula landa Yave+ o unu muna tunga e ziku dia tukau twangioka yo tukau twa mbwaza, yo kela yimenga, avo ke ziku dia Yave wa Nzambi eto ko dina mantalani ye saba kiandi!”+
30 Finekase wa nganga ye akuluntu a nkutakani ye ntu mia mafunda* ma Isaele ana bakala yandi, vava bawidi mvovo mia Anerubeni ye Anengadi ye Anemanase, bayangalele.+ 31 O Finekase wa mwan’a Elaza wa nganga, ovovese Anerubeni ye Anengadi ye Anemanase vo: “O unu tuzeye wo vo, o Yave wina yeto, wau vo ke nusumukini Yave ko. Owau nuvuluzi Aneyisaele vana koko kwa Yave.”
32 O Finekase wa mwan’a Elaza wa nganga ye akuluntu basisidi Anerubeni ye Anengadi kuna Ngiladi, bavutukidi kuna nsi a Kenani, batwese nsangu kuna kwa Aneyisaele. 33 E nsangu ziyangidikidi Aneyisaele. Aneyisaele batondele Nzambi, ke bavovele diaka diambu ko dia kwenda nuanisa Anerubeni ye Anengadi muna fwantakesa nsi ina bakala.
34 O Anerubeni ye Anengadi bavene ziku* e nkumbu, kadi bavovele vo: “E ziku diadi i mbangi vava twina vo Yave i Nzambi aludi.”