Yosua
24 Yosua okutakese makanda mawonso ma Isaele kuna Sekeme, obokelese mbuta za Isaele ye ntu miau, ye afundisi, ye akuluntu,+ batelamene vana ndose a Nzambi aludi. 2 Yosua ovovese nkangu wawonso vo: “I wau wuwu kavovele o Yave wa Nzambi a Isaele, ‘Kuna nz’ankulu+ o mase meno+—Tera wa se dia Abarayama yo se dia Nako ana bazingilanga kuna simu dia Nzadi*—nzambi zankaka basadilanga.+
3 “‘Kuna kwalanda, yabonga se dieno Abarayama+ tuka kuna simu dia Nzadi* yamfila kuna nsi a Kenani yawonso, yawokesa mbongo andi.+ Yamvana Isaki;+ 4 i bosi, o Isaki yamvana Yakobo yo Esau.+ Yavana zunga kia Mongo a Seyire kwa Esau se vua diandi;+ o Yakobo yo wan’andi bakulumuka kuna Engipito.+ 5 I bosi yatuma Mose yo Arone,+ yatwasa e vuku muna Engipito,+ yanuvaikisa mo. 6 Vava yavaikisa mase meno muna Engipito,+ oyeno nulweke kuna mbu, Angipito balakamene mase meno yo makalu ma vita ye akwa mvalu yakuna Mbu Ambwaki.+ 7 Mase meno baboka kwa Yave,+ obukikidi e tombe vana kati kwa yeno ye Angipito, ubavutulwidi o mbu yo kubafuka,+ meso meno mamona mambu yavanga muna Engipito.+ I bosi, nuakala muna makanga mu mvu miayingi.*+
8 “‘Yanuluakisa muna nsi a Aneyamore ana bazingilanga kuna simu dia* Yodani, oyau banunuanisa.+ Kansi, yabayekola vana koko kweno kimana nuavua nsi au, yabafwasakesela vana ndose eno.+ 9 I bosi, Balaki wa mwan’a Sipo wa ntinu a Moabe, otelamene, onuanisi Isaele. Otumini Bilami wa mwan’a Beo kanusiba.+ 10 Kansi kiawila Bilami ko.+ I dianu kanusambulwila nkumbu miayingi,+ omono yanuvuluza vana koko kwandi.+
11 “‘Nuasauka Yodani+ yo lwaka kuna Yeriko.+ E mfumu* za Yeriko, Aneyamore, Aneperese, Anekenani, Anekete, Anengirengase, Anekivi ye Aneyebuse banunuanisa, kansi yabayekola vana moko meno.+ 12 Yatwika lukendalalu* kuna ntwal’eno, luna lwabatinisa vovo nuina+—ntinu miole mia Aneyamore. Ke mu nsosolo ko ngatu mu mata meno.+ 13 Muna mpila yayi yanuvanina e nsi ina ke nuafuntukina ko, ye mbanza zina ke nuatunga ko,+ yo kala mûna. Nudianga uva ye olive zina ke nuakuna ko.’+
14 “Ozevo, nuvumina Yave yo kunsadila kuna ziku ye kwikizi,*+ nukatula nzambi zina zasadila mase meno kuna simu dia Nzadi,* ye muna Engipito,+ nusadila Yave. 15 Owau avo diambi kwa yeno dia sadila Yave, o unu nusola ona nusadila,+ kana nzambi zina zasadila mase meno kuna simu dia Nzadi,*+ yovo nzambi za Aneyamore mwamu nsi yayi nukalanga.+ Vo i mono ye esi nzo ame, Yave tusadila.”
16 Muna diadi, o nkangu uvutwidi vo: “Katulendi nkutu yambula Yave ko muna sadila nzambi zankaka. 17 Kadi Yave wa Nzambi eto, yandi watuvaikisa yo mase meto muna Engipito+ muna nsi ya ubundu,*+ wavanga sinsu yayina yanene muna meso meto+ yo kutulunga-lunga muna nzila yawonso ina twadiatila ye muna nkangu miawonso mina twaviokela.+ 18 O Yave wayinga nkangu miawonso vava twina, kumosi ye Aneyamore ana bateka zingila mu nsi yayi. Muna kuma kiaki, yeto mpe Yave tusadila, kadi i Nzambi eto.”
19 Yosua ovovese nkangu vo: “Oyeno ke nuafwana ko mu sadila Yave, kadi i Nzambi avauka;+ ovavanga vo wantu basadila kaka yandi.+ Ke loloka makuzuka meno* ko ngatu masumu meno.+ 20 Avo nubembwele Yave yo sadila nzambi za nzenza, oyandi mpe okunusia kintantu yo kunufukisa, kana una vo otekele kunuvanga o wete.”+
21 O nkangu uvovese Yosua vo: “Ke wau ko, Yave tusadila!”+ 22 O Yosua ovovese nkangu vo: “Nu mbangi muna nzengo zeno wau vo yeno kibeni nusolele Yave, nuansadila.”+ Oyau bavutwidi vo: “Tu ambangi kweto.”
23 “Owau, nukatula nzambi za nzenza vovo nuina, nusia e ntima mieno kwa Yave wa Nzambi a Isaele.” 24 O nkangu uvovese Yosua vo: “Yave wa Nzambi eto tusadila yo wila nding’andi!”
25 Dianu vo, Yosua okangidi e kangu yo nkangu e lumbu kiakina, yo kubasikidisila e nsiku ye nzengo kuna Sekeme. 26 I bosi, Yosua osonekene mambu mama muna nkand’a Nsiku a Nzambi,+ obongele tadi diampwena+ otongekele dio kwakuna, kuna nsi a nti ampwena una vana ndambu a fulu kiavauka kia Yave.
27 O Yosua ovovese diaka nkangu wawonso vo: “Tala, e tadi diadi i mbangi vava twina,+ kadi diwidi mvovo miawonso mia Yave mina katuvovese, dikala se mbangi kwa yeno, kimana nualembi vakulwila Nzambi eno o nkalu.” 28 Muna diadi, Yosua osindikidi nkangu, konso muntu muna vua diandi.+
29 Vava kiavioka mambu mama, Yosua wa mwan’a Nuni, wa selo kia Yave, ofwidi ye kimbuta kia mvu 110.+ 30 Banzikidi muna zunga kia vua diandi muna Timenati-sera,+ ina kuna zunga kia miongo mia Eferaime, kuna node a Mongo a Ngasi. 31 O Isaele okwamanene sadila Yave muna lumbu yawonso ya Yosua ye muna lumbu yawonso ya akuluntu ana bazinga kunima lufwa lwa Yosua, ana bazaya mavangu mawonso ma Yave mana kavanga muna wete dia Isaele.+
32 E visi ya Yosefe+ ina batwasa Aneyisaele tuka kuna Engipito, bazikidi yo muna Sekeme muna ndambu a ntoto una kasumba o Yakobo kwa wan’a Kamo+ wa se dia Sekeme, muna 100 za sekele za palata;+ ikedi se vua dia wan’a Yosefe.+
33 O Elaza wa mwan’a Arone+ mpe ofwidi. Banzikidi muna Kundubulu kia Finekase wa mwan’andi+ kina kavewa muna zunga kia miongo mia Eferaime.