Afundisi
13 Aneyisaele bavangidi diaka mambu mambi vana meso ma Yave,+ o Yave ubayekwele vana moko ma Afelesetia+ mu mvu 40.
2 Muna kolo kiakina, vakala musi Sora+ wa vumu kia Anedani,+ e nkumbu andi Manoa.+ O nkaz’andi sita, kakala yo wana ko.+ 3 Lumbu kimosi, mbasi a Yave omonekene kwa nkento yo kumvovesa vo: “Tala, u sita, kuna yo wana ko. Kansi yimita oyimita, mwan’ayakala owuta.+ 4 Keba, kunue vinyu ko ngatu lekwa kiankaka kia nkolwa,+ kudie mpe konso lekwa kiafunzuka ko.+ 5 Tala, yimita oyimita yo wuta mwan’a yakala, e nsuki zandi ke zifwete zengwa ko,+ kadi o mwana Mvambuki kekala kuna kwa Nzambi tuka muna luwutuku.* Yandi ovita ntu muna vuluza Isaele vana moko ma Afelesetia.”+
6 O nkento wele vova kwa nkaz’andi vo: “Muntu a Nzambi aludi wizidi oku ngina, e mpw’andi nze mbasi a Nzambi aludi, imwesa kikilu wonga. Kinyuvuidi kuna katukidi ko, oyandi mpe kampovese nkumbu andi ko.+ 7 Kansi, edi kampovese vo: ‘Tala, yimita oyimita yo wuta mwan’ayakala. Kunue vinyu ko ngatu lekwa kiankaka kia nkolwa, kudie konso lekwa kiafunzuka ko, kadi o mwana Mvambuki kekala kuna kwa Nzambi tuka muna luwutuku* yamuna lumbu kia lufwa lwandi.’”
8 Manoa ododokele Yave oku vo: “Dodokolo e Yave. Yambula muntu a Nzambi aludi ona watuma keza diaka katulonga dina tuvanga muna mwana ona owutuka.” 9 O Nzambi aludi owidi ndomb’a Manoa, mbasi a Nzambi aludi wizidi diaka kwa nkento wau kavuende muna mpatu; kansi Manoa wa nkaz’andi kakala yandi ko. 10 O nkento olundumukini kwa nkaz’andi, umvovese vo: “Tala, o muntu ona wayiza kwa mono e lumbu kiakina, undwakidi diaka.”+
11 Manoa otelamene wele yo nkaz’andi. Olweke kwa muntu, umvovese vo: “Nga ongeye i muntu ona wamokene yo nkaz’ame?” Ovutwidi vo: “Ingeta.” 12 Manoa ovovele vo: “Yambula e mvovo miaku mialungana! Aweyi tusansila o mwana, nkia salu kesala?”+ 13 Mbasi a Yave ovovese Manoa vo: “Mawonso yavovele kwa nkaz’aku, yambula katoma mo lunda.+ 14 Kadie konso lekwa kituka muna nsing’a vinyu ko, kanue vinyu ko yovo lekwa kiankaka kia nkolwa+ ngatu konso lekwa kiafunzuka.+ Kalunda mawonso yamvovesa.”
15 Manoa ovovese mbasi a Yave vo: “Dodokolo, vingila, twakubikila mwan’a nkombo.”+ 16 Mbasi a Yave ovovese Manoa vo: “Avo mvingidi, kidia madia maku ko; kansi avo ozolele tambika lukau lwa ngioka kwa Yave, tambika lo.” Manoa kazaya wo ko vo mbasi a Yave. 17 Manoa oyuvuidi mbasi a Yave vo: “Nkumbu aku nani,+ kimana twàzitisa vava mvovo miaku milungana?” 18 Mbasi a Yave umvovese vo: “Ekuma oyuvulwidi e nkumbu ame, wau vo ya sivi?”
19 Manoa obongele mwan’a nkombo yo lukau lwa mbwaza, otambikidi lo kwa Yave vana tadi, ona wavanga diambu dia sivi wau Manoa yo nkaz’andi batalanga. 20 O nlaku a tiya vava watomboka kuna zulu tuka vana ziku, Manoa yo nkaz’andi bamwene mbasi a Yave otombokele muna nlaku a tiya. Vana vau, bavumbamene yo bokeka ndose vana ntoto. 21 Mbasi a Yave kamonekene diaka ko kwa Manoa yo nkaz’andi. I bosi, Manoa obakwidi vo i mbasi a Yave.+ 22 Manoa ovovese nkaz’andi vo: “Fwa tufwa, kadi tumwene Nzambi.”+ 23 O nkaz’andi umvovese vo: “Kele vo Yave kazola kutuvonda, kadi tambula lukau lwa ngioka+ ye lukau lwa mbwaza ko ova moko meto. Kadi kutusonga mawonso mama ko ngatu kutuvovesa mambu mama.”
24 Kuna kwalanda, o nkento owutidi mwan’ayakala, umvene nkumbu a Samesone;+ vava mwana kakula, Yave okwamanene kunsambula. 25 I bosi, o mwand’a Yave wayantika sala muna yandi+ kuna Makane-dani,+ vana kati kwa Sora ye Esetaole.+