Wanzole wa Samuele

11 Muna lubantiku lwa mvu,* muna ntangwa ina atinu bavaikanga muna vita, Davidi otumini Yoabe ye ntaudi zandi ye vu kiawonso kia makesa ma Isaele bafwasakesa Aneyamone, bazietele Raba,+ vo i Davidi okedi kuna Yerusaleme.+

2 Lumbu kimosi muna fuku,* Davidi okatukidi vana mfulu andi, wele azieti vana nludi a nzo a* ntinu. Vava kakala vana nludi, omwene nkento oyowelanga, o nkento wambote-mbote. 3 Davidi otumini muntu kenda zaya kana nani i nkento ndiona. Bamvovese vo: “Yandi i Bate-seba+ wa mwan’a Eleyame,+ wa nkaz’a Uriya+ wa Nkete.”+ 4 Davidi otumini wantu bantwasa.+ O nkento wizidi kwa yandi, unlele.+ (Ediadi diavangama vava kakivelelesanga muna funzuka kwandi.*)+ I bosi, ovutukidi kuna nzo andi.

5 Nkento oyimiti, i bosi, otwikidi nsangu kwa Davidi vo: “Ngimiti.” 6 Dianu vo, Davidi otwikidi nsangu kwa Yoabe vo: “Untwikila Uriya wa Nkete.” Yoabe otwikidi Uriya kwa Davidi. 7 Uriya vava kalwaka, Davidi unyuvuidi o vimpi wa Yoabe ye makesa ye nsangu za vita. 8 I bosi, Davidi ovovese Uriya vo: “Kulumuka kuna nzo aku, wavunda.”* Vava Uriya kavaika muna nzo a ntinu, o ntinu untwikidi lukau.* 9 Kansi, Uriya olele vana mwelo a nzo a ntinu ye selo yawonso ya mfumu andi, kasidi kulumuka kuna nzo andi ko. 10 Bazayisi dio kwa Davidi vo: “Uriya kakulumukini kuna nzo andi ko.” Muna diadi, Davidi ovovese Uriya vo: “Nga kutukidi mu nkangalu ko e? Ekuma olembele kulumukina kuna nzo aku?” 11 Uriya ovutwidi Davidi vo: “E Nkela+ ye Isaele ye Yuda mu sudi bena, o mfumu ame Yoabe ye selo ya mfumu ame mu nzanza bena. Aweyi ikulumukina kuna nzo ame yadia, yanua, yaleka yo nkaz’ame?+ Ndidi e ndofi ova ndose aku, yamuna moyo aku, kilendi wo vanga ko!”

12 Davidi ovovese Uriya vo: “Nangina vava o unu, mbazi ikusindika.” Dianu vo, Uriya onangini muna Yerusaleme e lumbu kiakina ye kina kialanda. 13 Davidi umbokelese, odidi yo nua yandi, unkolwese. Kansi muna fuku ovaikidi, wele leka vana mfulu andi ye selo ya mfumu andi, kakulumukini kuna nzo andi ko. 14 Muna mene-mene, Davidi osonekene nkanda kwa Yoabe, otwikidi wo vana moko ma Uriya. 15 Osonekene muna nkanda vo: “Sia Uriya kuna ntwal’a vita, kuna e vita isundidi e ngolo. I bosi, nuvutuka manima, nuansisa yandi mosi kimana katelelwa yo fwa.”+

16 Yoabe walangidilanga mbanza, osidi Uriya vana fulu kina kazeye vo vena ye makesa ma ngolo. 17 Esi mbanza vava bavaikidi, banuanisi Yoabe, akaka muna selo ya Davidi bafwidi, Uriya wa Nkete mpe ofwidi.+ 18 I bosi Yoabe otwikidi nsangu kwa Davidi, unzayisi mawonso mabwidi kuna vita. 19 Ovovese kwa nati a nsangu vo: “Vava omana zayisa kwa ntinu mawonso ma vita, 20 dilenda kala vo, o ntinu ofunga makasi yo kuvovesa vo, ‘Ekuma lwele nuanina lukufi ye mbanza? Nga ke nuzeye wo ko vo yau vana ntandu a yaka benongenanga? 21 Nani wavonda Abimeleke+ wa mwan’a Yerubesete?+ Nga ka nkento ko wantubila e nsindulu tuka vana ntandu a yaka yo kumvondela kuna Tebese? Ekuma lwele nuanina lukufi ye yaka?’ Ozevo, umvovesa vo: ‘Selo kiaku Uriya wa Nkete mpe, ofwidi.’”

22 O nati a nsangu, wele, ozayisi kwa Davidi mawonso kamvovese Yoabe. 23 O nati a nsangu ovovese Davidi vo: “E mbeni batusundidi e ngolo, batuvaikidi vana nzanza; kansi oyeto tubayinganese yakuna vitu dia mbanza. 24 Akwa maswanga bakala vana ntandu a yaka banongene selo yaku, akaka muna selo ya ntinu bafwidi; e selo kiaku Uriya wa Nkete mpe, ofwidi.”+ 25 Muna diadi, Davidi ovovese nati a nsangu vo: “Vovesa Yoabe vo: ‘Kuyambula ko vo diambu diadi diatokanesa, kadi nsosolo ke usolanga muntu ko. Siamisa e vita muna mbanza, wabaka yo.’+ Unkasakesa mpe.”

26 O nkaz’a Uriya vava kawá wo vo Uriya ofwidi, oyantikidi dila nkaz’andi. 27 Vava lumbu ya kifwidi yafokoka, Davidi otumini wantu, bantwese muna nzo andi, unkitwidi se nkaz’andi+ yo kunwutila mwan’a yakala. Kansi, e diambu kavanga Davidi diakendeleka kikilu* Yave.+