Wanzole wa Ntinu

1 Akabi vava kafwa, Moabe+ otelamene Isaele.

2 Akaziya osotokele vana ntoto tuka vana zianela ya suku diandi dia ntandu muna Samaria, olwele. Dianu vo, otumini anati a nsangu yo kubavovesa vo: “Nuenda yuvula Bale-zebube wa nzambi a Ekerone+ muna zaya kana vo sasuka isasuka muna mputa yayi.”+ 3 Kansi, mbasi a Yave ovovese Eliya*+ wa Ntesebe vo: “Telama, wenda wanana ye anati a nsangu a ntinu a Samaria, ubavovesa vo: ‘Ekuma nuzolele kwenda yuvulwila Bale-zebube wa nzambi a Ekerone?+ Nga muna Isaele ke muna Nzambi ko e? 4 I wau kavovele o Yave: “Kukatuka ko vana mfulu ina olele, kadi fwa ofwa.”’” Eliya wele kwandi.

5 Vava anati a nsangu bavutukidi, vana vau Akaziya ubayuvuidi vo: “Ekuma nuvutukidi?” 6 Bamvutwidi vo: “Muntu mosi wizidi wanana yeto utuvovese vo, ‘Nuvutuka kwa ntinu unutumini, numvovesa vo, “I wau wuwu kavovele o Yave: ‘Nga muna Isaele ke muna Nzambi ko wau otumini wantu benda yuvula Bale-zebube wa nzambi a Ekerone? Muna kuma kiaki, kukatuka ko vana mfulu ina olele, kadi fwa ofwa.’”’”+ 7 Muna kuma kiaki, ubayuvuidi vo: “Aweyi ikedi e mpw’a muntu owanane yeno ona unuvovese mvovo miami?” 8 Bamvutwidi vo: “Mvuatu a mika kavuete+ ye mponda nkand’a bulu muna luketo lwandi.”+ Vana vau ovovele vo: “I Eliya wa Ntesebe.”

9 Ozevo, ntinu untwikidi mfumu a makesa 50 ye 50 ma makesa mandi. Wele wanana yo Eliya ona ovuende vana ntandu a mongo. Umvovese vo: “E muntu a Nzambi aludi,+ o ntinu edi kavovele, ‘Kulumuka.’” 10 Kansi Eliya ovutwidi kwa mfumu a makesa 50 vo: “Avo i muntu a Nzambi, yambula vakulumuka tiya tuka kuna zulu+ twabomona ngeye yo 50 ma makesa maku.” Tiya tukulumukini tuka kuna zulu, tumbomwene ye 50 ma makesa mandi.

11 I bosi, o ntinu untwikidi diaka mfumu a 50 ye 50 ma makesa mandi. Wele, ovovese Eliya vo: “E muntu a Nzambi aludi, i wau wuwu kavovele o ntinu, ‘Kulumuka mu nzaki.’” 12 Kansi Eliya ubavutwidi vo: “Avo i muntu a Nzambi aludi, yambula vakulumuka tiya tuka kuna zulu twabomona ngeye yo 50 ma makesa maku.” Tiya twa Nzambi tukulumukini tuka kuna zulu, tumbomwene ye 50 ma makesa mandi.

13 I bosi, o ntinu otwikidi diaka mfumu wantatu wa 50 ye 50 ma makesa mandi. Kansi, mfumu wantatu wa 50 otombokele vana mongo, ofukamene vana vena Eliya, undodokele yo kumvovesa vo: “E muntu a Nzambi aludi, yambula moyo ame ye mioyo mia 50 ma ntaudi zaku miakala miantalu vana meso maku. 14 Kadi vabwidi tiya tutukidi kuna zulu tubomwene mfumu zole za 50 ana bavitidi yo 50 ma makesa mau, kansi owau yambula moyo ame wakala wantalu vana meso maku.”

15 Mbasi a Yave ovovese Eliya vo: “Kulumuka yandi. Kumweni wonga ko.” Eliya otelamene, okulumukini, wele yandi kawanana yo ntinu. 16 Eliya ovovese ntinu vo, “I wau wuwu kavovele o Yave: ‘Otumini wantu benda yuvula Bale-zebube wa nzambi a Ekerone.+ Nga muna Isaele ke muna Nzambi ko e?+ Ekuma olembi kunyuvulwila? Dianu vo, kukatuka ko vana mfulu ina olele, kadi fwa ofwa.’” 17 Ozevo, Akaziya ofwidi mun’owu wa diambu dia Yave dina kavova muna Eliya; wau vo kakala ye mwana ko, Yorame*+ oyantikidi yala vana fulu kiandi muna mvu wanzole wa luyalu lwa Yorame+ wa mwan’a Yosafate wa ntinu a Yuda.

18 Vo i mambu mankaka ma lusansu lwa Akaziya+ ye mana kavanga, nga ke masomana ko muna nkand’a lusansu lwa ntinu mia Isaele?